ລົດໄຟລາວ-ຈີນ ສ້າງໂອກາດໃຫ້ ສປປ ລາວໄດ້ເປັນຈຸດເຊື່ອມຕໍ່ຂອງພາກພື້ນ ແລະ ສາກົນ

ໂດຍ: ທິດກໍ່າ

ເນື່ອງໃນໂອກາດການສະຫລຸບວຽກງານການເປີດນຳໃຊ້ເສັ້ນທາງລົດໄຟ ລາວ-ຈີນ ຄົບຮອບ 1 ປີ (3/12/2021-3/12/2022) ທ່ານ ຈູ່ໂກຈ່ຽງ ປະທານສະພາບໍລິຫານບໍລິສັດລົດໄຟ ລາວ-ຈີນ ຈຳກັດ ໄດ້ລາຍງານໃຫ້ຮູ້ວ່າ: ນັບແຕ່ເລີ່ມເປີດໃຫ້ບໍລິການທາງລົດໄຟ ລາວ-ຈີນ ໃນໄລຍະ 1 ປີຜ່ານມາ ສາມາດຂົນສົ່ງຜູ້ໂດຍສານໄດ້ທັງໝົດ 1.269.000 ເທື່ອຄົນ, ຂົນສົ່ງສິນຄ້າໄດ້ 1.995.500 ໂຕນ, ຂົນສົ່ງສິນຄ້າຂ້າມແດນເກີນ 1.570.000 ໂຕນ, ສ້າງວຽກເຮັດງານທຳໃຫ້ປະຊາຊົນ 100.000 ກວ່າເທື່ອຄົນ.

ທ່ານຍັງໄດ້ກ່າວຕື່ມວ່າ: ຕະຫລອດໄລຍະ 1 ປີຜ່ານມາ, ບໍລິສັດທາງລົດໄຟ ລາວ-ຈີນ ໄດ້ຍຶດໝັ້ນ ແລະ ຖືເອົາຄວາມປອດໄພໃນການເດີນທາງຂອງປະຊາຊົນເປັນຫລັກ, ເພີ່ມທະວີເນັ້ນໜັກການກວດກາບຳລຸງຮັກສາພື້ນຖານໂຄງລ່າງ, ສ້າງລະບົບປ້ອງກັນຄວາມປອດໄພນອກເສັ້ນທາງ, ປັບປຸງກົນໄກເຮັດວຽກ, ຮັບມືສຸກເສີນເພື່ອຮັບປະກັນຄວາມປອດໄພໃນການຂົນສົ່ງ.

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ກໍມີຄຳເຫັນບາງຕອນໃນມື້ນັ້ນວ່າ: ທາງລົດໄຟ ລາວ-ຈີນ ແມ່ນໂຄງການເຊື່ອມຈອດ ແລະ ເຊື່ອມໂຍງຍຸດທະສາດ, ຫັນຈາກປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມຕໍ່ຂອງລາວ, ແມ່ນໂຄງການວິສະວະກຳ “ໜຶ່ງແລວໜຶ່ງເສັ້ນທາງ” ແລະ ເປັນໂຄງການສັນຍາລັກມິດຕະພາບ ຈີນ-ລາວ.

ປັດຈຸບັນເສັ້ນທາງດັ່ງກ່າວໄດ້ກາຍເປັນສັນຍາລັກ ແລະ ຄວາມພູມໃຈຂອງປະເທດລາວ, ປະຊາຊົນລາວເປັນຢ່າງຍິ່ງ. ອີກຢ່າງເສັ້ນທາງສາຍນີ້ຈະຊ່ວຍໃຫ້ປະເທດລາວມີເສັ້ນທາງຄົມມະນາຄົມດ້ວຍຕາໜ່າງຈໍລະຈອນສິນຄ້າອອກສູ່ທະເລ ທັງກະຕຸກຊຸກຍູ້ການລົງທຶນ, ການທ່ອງທ່ຽວໃຫ້ຫລາຍຂຶ້ນ ເຊິ່ງໃນໄລຍະໜຶ່ງປີຜ່ານມາ ກໍເຫັນວ່າໄດ້ຮັບການຕອບຮັບຈາກຜູ້ໃຊ້ບໍລິການເປັນຢ່າງດີ. ນອກຈາກນັ້ນ ນັບແຕ່ມື້ເປີດນຳໃຊ້ບໍລິການລົດໄຟ ລາວ-ຈີນ ກໍເຫັນວ່າມີນັກທ່ອງທ່ຽວໄດ້ພາກັນຫລັ່ງໄຫລກັນເຂົ້າມາທ່ຽວລາວນັບມື້ຫລາຍຂຶ້ນ ໂດຍສະເພາະແມ່ນນັກທ່ອງທ່ຽວຈາກປະເທດໄທ, ເກົາຫລີ ແລະ ປະເທດອື່ນໆ.

ດັ່ງພວກເຮົາຮູ້ນຳກັນແລ້ວວ່າ, ນັບແຕ່ເສັ້ນທາງລົດໄຟຄວາມໄວສູງ ລາວ-ຈີນ ໄດ້ເລີ່ມເປີດນຳໃຊ້ບໍລິການເປັນຕົ້ນມາ ໄດ້ເຮັດໃຫ້ປະເທດລາວຖືກປົດລັອກອອກຈາກປະເທດທີ່ບໍ່ມີຊາຍແດນຕິດກັບທະເລ ກາຍເປັນປະເທດເຊື່ອມໂຍງເຊື່ອມຈອດໄປທົ່ວພາກພື້ນ ແລະ ທົ່ວໂລກ. ນອກນັ້ນ ຍັງໄດ້ປຽບທາງດ້ານການຂົນສົ່ງທາງລາງຈາກບັນດາປະເທດອ້ອມຂ້າງໄປສູ່ປະເທດຈີນໄດ້ຢ່າງວ່ອງໄວທັນໃຈ, ຖ້າທຽບໃສ່ກ່ອນບໍ່ທັນມີແມ່ນໃຊ້ເວລາເປັນອາທິດຈຶ່ງເຖິງຊາຍແດນຈີນ, ແຕ່ມາຮອດປັດຈຸບັນແມ່ນໃຊ້ເວລາພຽງໜຶ່ງວັນ ທັງປະຢັດເວລາ, ປະຢັດຄ່າຂົນສົ່ງຕັ້ງຫລາຍເທົ່າ.

ຢ່າງໃດກໍດີ, ອີກສິ່ງໜຶ່ງການທີ່ມີເສັ້ນທາງລົດໄຟ ລາວ-ຈີນ ນອກຈາກເປັນການສົ່ງເສີມການພັດທະນາແລ້ວ ຍັງເຮັດໃຫ້ຄົນລາວຫູແຈ້ງຕາໃສ, ຫລິ່ງເຫັນອະນາຄົດອັນກວ້າງໄກ, ສະຫວ່າງສະໄຫວໃນຄວາມຈະເລີນຮຸ່ງເຮືອງ ເພື່ອພັດທະນາຕົນເອງ ແລະ ປະເທດຊາດ ນັ້ນກໍຄືພາກັນຕື່ນຕົວດຸໝັ່ນ, ຫ້າວຫັນໃສ່ການຜະລິດສິນຄ້າເພື່ອສົ່ງອອກ ໂດຍສະເພາະແມ່ນສົ່ງໄປຂາຍຢູ່ຈີນດັ່ງໃນປັດຈຸບັນ, ລາວເຮົາສາມາດສົ່ງສິນຄ້າໄປຂາຍຢູ່ຈີນໄດ້ຫລາຍປະເພດເຊັ່ນ: ມັນຕົ້ນ, ກ້ວຍ, ຢາງພາລາ, ປະເພດສັດລ້ຽງ ຄືງົວ ແລະ ໝາກໄມ້ຊະນິດອື່ນໆ. ຄາດວ່າໃນອະນາຄົດ ຄົນລາວເຮົາຈະພາກັນຫູແຈ້ງຕາໃສ, ຫາເງິນຫາຄຳຮັ່ງມີຍ້ອນລົດໄຟ ລາວ-ຈີນ ຢ່າງແນ່ນອນ.