ກຳປູເຈຍນຳເຂົ້າ “ນ້ຳມັນ-ແກັສ” ໄລຍະ 11 ເດືອນ ປີ 2022 ມູນຄ່າ 3,38 ພັນລ້ານໂດລາ

ວັນທີ 12 ທັນວາ, ລາຍງານຈາກກົມພາສີ ແລະ ອາກອນຂອງກຳປູເຈຍ ເປີດເຜີຍຈຳນວນນຳເຂົ້າຜະລິດຕະພັນນ້ຳມັນ ແລະ ແກັສ ມູນຄ່າ 3,38 ພັນລ້ານໂດລາສະຫະລັດ ໃນໄລຍະ 11 ເດືອນ ຂອງປີ 2022 ເພີ່ມຂຶ້ນເກືອບ 58% ຈາກໄລຍະດຽວກັນຂອງປີຜ່ານມາ.

ເຖິງຢ່າງໃດກໍດີ, ລາຍງານບໍ່ໄດ້ລະບຸປະລິມານນ້ຳມັນ ແລະ ແກັສທີ່ກຳປູເຈຍນຳເຂົ້າໃນໄລຍະເວລາດັ່ງກ່າວ ໂດຍປັດຈຸບັນກຳປູເຈຍອາໄສນ້ຳມັນ ແລະ ແກັສນຳເຂົ້າພຽງຢ່າງດຽວ ເນື່ອງຈາກຍັງບໍ່ໄດ້ເລີ່ມໃຊ້ນ້ຳມັນ ແລະ ແກັສສຳຮອງຈາກກົ້ນທະເລ.

ເມື່ອບໍ່ດົນມານີ້, ທ່ານ ຊຸຍ ເສມ ລັດຖະມົນຕີວ່າການກະຊວງບໍ່ແຮ່ ແລະ ພະລັງງານກຳປູເຈຍ ຄາດຄະເນຄວາມຕ້ອງການຜະລິດຕະພັນນ້ຳມັນໃນປະເທດຈະສູງເຖິງ 4,8 ລ້ານໂຕນໃນປີ 2030 ເພີ່ມຂຶ້ນຈາກ 2,8 ລ້ານໂຕນໃນປີ 2020 ພ້ອມກ່າວວ່າ: ກຳປູເຈຍຈຳເປັນຕ້ອງລົງທຶນເພີ່ມອີກໃນຂະແໜງດັ່ງກ່າວເພື່ອຕອບສະໜອງຄວາມຕ້ອງການທີ່ສູງຂຶ້ນ.