ເຈົ້າໜ້າທີ່ພະແນກຕໍາຫລວດຈະລະຈອນ ປກສ ແຂວງວຽງຈັນ ມອບລົດຈັກຄືນໃຫ້ເຈົ້າຂອງເດີມ

ໃນວັນທີ 12 ທັນວາ 2022ນີ້, ເຈົ້າໜ້າທີ່ພະແນກຕໍາຫລວດຈະລາຈອນ ປກສ ແຂວງວຽງຈັນ ສາມາດຮິບໂຮມ ແລະ ເກັບກູ້ຄືນ ລົດຈັກ WAVE 100 ຈໍານວນ 1 ຄັນ ທີ່ຖືກຄົນບໍ່ດີລັກໄປມາມອບຄືນໃຫ້ເຈົ້າຂອງເດີມແລ້ວ. ຕາງໜ້າມອບໂດຍ ທ່ານ ພັທ ພູວັນນີ ຫລິນວັນນະລາດ ຫົວໜ້າພະແນກຕຳຫລວດຈະລາຈອນ ຫ້ອງຕໍາຫລວດ ປກສ ແຂວງວຽງຈັນ.

ພ້ອມນີ້, ເຈົ້າໜ້າທີ່ຕໍາຫລວດຈະລາຈອນ ປກສ ແຂວງ ໄດ້ຮຽກຮ້ອງໃຫ້ປະຊາຊົນບັນດາເຜົ່າທຸກຄົນໃນທົ່ວສັງຄົມ ຈົ່ງມີສະຕີຮັກສາເຄື່ອງຂອງມີຄ່າໄວ້ໃຫ້ດີເພື່ອບໍ່ໃຫ້ກຸ່ມຄົນບໍ່ດີສວຍໂອກາດລັກຊັບສິນຂອງພວກທ່ານ, ສ່ວນການຊື້-ຂາຍເຄື່ອງຂອງມີຄ່າ ໂດຍສະເພາະລົດຈັກແມ່ນໃຫ້ກວດກາຢ່າງລະອຽດທາງດ້ານເອກະສານທີ່ຄົບຖ້ວນຕາມລະບຽບກົດໝາຍ, ຖ້າວ່າເອກະສານບໍ່ຄົບຖ້ວນກໍບໍ່ຄວນຊື້-ຂາຍ ແລະ ຊ່ວຍເປັນຫູເປັນຕາໃຫ້ເຈົ້າໜ້າທີ່ຕຳຫລວດໃນການສະກັດກັ້ນ-ຕ້ານປະກົດການຫຍໍ້ທໍ້ທີ່ອາດຈະສ້າງຄວາມບໍ່ສະຫງົບໃນສັງຄົມ.