ສປປ ລາວ ມີໂອກາດໃຊ້ປະໂຫຍດຈາກສະຖານະພາກພື້ນຂອງຕົນ ເພື່ອຊຸກຍູ້ການເຕີບໂຕຂອງເສດຖະກິດ

ອີງຕາມບົດລາຍງານສະບັບໃໝ່ຂອງທະນາຄານພັດທະນາອາຊີ (ADB) ໃຫ້ຮູ້ໃນທ້າຍອາທິດຜ່ານມາ ທີ່ນະຄອນຫລວງວຽງຈັນ ວ່າ: ສປປ ລາວ ໜຶ່ງໃນປະເທດສະມາຊິກຂອງແຜນງານຮ່ວມມືທາງດ້ານເສດຖະກິດ ອະນຸພາກພື້ນແມ່ນໍ້າຂອງ (GMS) ມີໂອກາດທີ່ຈະໃຊ້ປະໂຫຍດຈາກສະຖານະພາກພື້ນຂອງຕົນ ເພື່ອຊຸກຍູ້ການເຕີບໂຕຂອງເສດຖະກິດ ແລະ ເພີ່ມທະວີຄວາມພ້ອມຮັບມືກັບຜົນກະທົບຢ່າງກະທັນຫັນຈາກພາຍນອກ, ເຊິ່ງຜົນປະໂຫຍດຂອງການເຊື່ອມໂຍງທາງດ້ານເສດຖະກິດໃນພາກພື້ນສະແດງໃຫ້ເຫັນເຖິງວິທີການທີ່ ສປປ ລາວ ສາມາດໝູນໃຊ້ສະຖານະພາກພື້ນຂອງຕົນ ເພື່ອຊຸກຍູ້ການຄ້າ, ເພີ່ມທະວີການຜະລິດກະສິກຳ ແລະ ໝູນໃຊ້ ກຳລັງຂອງບັນດາຕົວເມືອງຂອງຕົນ ເພື່ອສົ່ງເສີມການເຕີບໂຕຢ່າງທົ່ວເຖິງ ແລະ ສະເໝີພາບ.

ບົດລາຍງານໃຫ້ລາຍລະອຽດຕື່ມວ່າ: ການປັບປຸງຄວາມສາມາດໃນການແຂ່ງຂັນ, ການເປັນປະຊາຄົມ ແລະ ການເຊື່ອມໂຍງສາມາດຊ່ວຍຊຸກຍູ້ເຮັດໃຫ້ລາຍຮັບ ແລະ ມາດຕະຖານການດຳລົງຊີວິດຂອງປະຊາຊົນຂອງປະເທດ ຄ່ອຍໆຫຍັບເຂົ້າສູ່ລະດັບດຽວກັບປະເທດສະມາຊິກອື່ນໆຂອງ ແຜນງານຮ່ວມມືທາງດ້ານເສດຖະກິດ GMS. ພ້ອມນີ້, ຍັງແລກປ່ຽນຄຳຄິດເຫັນກ່ຽວກັບ ຄວາມສາມາດບົ່ມຊ້ອນຂອງ ສປປ ລາວ ໃນການຍົກລະດັບສະຖານະຂອງຕົນໃນຕ່ອງໂສ້ມູນຄ່າ, ຫັນເປັນອຸດສາຫະກຳຂອງຕົນໃຫ້ມີຄວາມຫລາກຫລາຍ ແລະ ນຳໃຊ້ຜົນປະໂຫຍດຢ່າງເຕັມທີ່ຈາກການຮ່ວມມືໃນພາກພື້ນ ເພື່ອບັນລຸເປົ້າໝາຍການພັດທະນາຂອງຕົນ.

ທ່ານ ນາງ ໂຊໂນມິ ທະນາກະ ຫົວໜ້າສຳນັກງານ ADB ປະຈຳ ສປປ ລາວ ໃຫ້ຮູ້ວ່າ: ສປປ ລາວ ມີທີ່ຕັ້ງຢູ່ຈຸດໃຈກາງທາງຍຸດທະສາດຂອງ GMS ເຊິ່ງເປັນໂອກາດທີ່ຈະໝູນໃຊ້ປະໂຫຍດຈາກການຮ່ວມມືໃນພາກພື້ນ ເພື່ອເພີ່ມຄວາມກ້າວໜ້າຂອງການພັດທະນາໃຫ້ໄດ້ຫລາຍຍິ່ງຂຶ້ນ. ADB ເປັນໜຶ່ງໃນຄູ່ຮ່ວມມືທີ່ສຳຄັນ ທີ່ໃຫ້ການສະໜັບສະໜູນແກ່ການປະສານງານທາງດ້ານນະໂຍບາຍການພັດທະນາໃນອະນຸພາກພື້ນ, ໃນນັ້ນລວມມີການກຳນົດແຜນງານຈຸດສຸມເປົ້າໝາຍໃນທາງປະຕິບັດ ເພື່ອແນໃສ່ສົ່ງເສີມການຮ່ວມມືໃນພາກພື້ນ. ບົດລາຍງານຜົນການສຶກສາຂອງ ADB ລະບຸວ່າ ສູນລວມການຄ້າໃນປັດຈຸບັນຂອງ ສປປ ລາວ ຊີ້ໃຫ້ເຫັນວ່າອາດມີທ່າແຮງຍັງບໍ່ທັນໄດ້ຂຸດຄົ້ນສໍາລັບການຂະຫຍາຍໄປສູ່ຜະລິດຕະພັນທີ່ມີຄວາມຫລາກຫລາຍຍິ່ງຂຶ້ນ ເຊິ່ງມີການຊື້-ຂາຍກັບບັນດາຄູ່ຄ້າໃນພາກພື້ນ ແລະ ໃນທົ່ວໂລກ. ຫົນທາງໜຶ່ງທີ່ມີທ່າແຮງໃນການສ້າງຄວາມຫລາກຫລາຍທາງດ້ານເສດຖະກິດໃນຕໍ່ໜ້າແມ່ນຜ່ານການພັດທະນາຄວາມສາມາດດ້ານການຜະລິດ ແລະ ຄວາມສາມາດດ້ານການສົ່ງອອກ ໂດຍຜ່ານການຮ່ວມມືໃນພາກພື້ນທີ່ມີຫລາຍຍິ່ງຂຶ້ນ.