ປະທານໄກສອນ ພົມວິຫານ ບໍ່ສະແຫວງຫາຜົນປະໂຫຍດສ່ວນຕົວເກີນຂອບເຂດຖານະ

ໃນໂອກາດວັນເກີດຄົບຮອບ 102 ປີ(13 ທັນວາ 1920-13 ທັນວາ 2022)

ຄວາມເປັນແບບຢ່າງບາງດ້ານຂອງ ປະທານ ໄກສອນ ພົມວິຫານ ທີ່ພວກເຮົາຕ້ອງໄດ້ຮ່ຳຮຽນເອົາ ເຊັ່ນຄວາມບໍລິສຸດຜຸດຜ່ອງ ບໍ່ສະແຫວງຫາ ຜົນປະໂຫຍດສ່ວນຕົວເກີນຂອບເຂດໃນຖານະແບບຢ່າງທີ່ດີຂອງເພິ່ນ. ຍາມໃດເພິ່ນກໍສຸມສະຕິປັນຍາ, ກຳລັງວັງຊາ ຮັບໃຊ້ຊາດ, ຮັບໃຊ້ປະຊາຊົນໝາຍວ່າເພິ່ນເປັນຄົນມີແບບແຜນວິທີເຮັດວຽກລະອຽດ, ມີແຜນການ ແລະ ລົງແທດເຖິງຕົວຈິງ“ ທຸກແນວທາງນະໂຍບາຍບໍ່ແມ່ນວາງອອກມາ ພຽງເປັນຮູບການຊ່ອນໄວ້ໃນຕູ້ເຊັບ, ແຕ່ຕ້ອງໄດ້ຮັບການເຜີຍແຜ່, ຈັດຕັ້ງປະຕິບັດ ແລະ ມີການສະຫລຸບຖອດຖອນຢ່າງເປັນປະຈຳ ແລະ ເພື່ອຢາກເຮັດໄດ້, ພະນັກງານ ສະມາຊິກພັກ ຜູ້ຈະນຳເອົາ ແນວທາງນະໂຍບາຍດັ່ງກ່າວລົງຈັດຕັ້ງປະຕິບັດຕ້ອງຮູ້ຈຳກັດທັດສະນະແບບແຜນເຮັດວຽກແບບຜິວເຜີນບໍ່ໜັກແໜ້ນ, ບໍ່ເຂັ້ມງວດ ບໍ່ເຮັດຕາມແນວທາງວາງອອກ ຫລື ເຮັດແບບມະລຸມມະລ້ວຍ ພຽງເປັນຮູບການ ເທົ່ານັ້ນ” ປະທານ ໄກສອນ ພົມວິຫານ ກ່າວ.

ໃນຄວາມເປັນຈິງ, ຕະຫລອດຊີວິດຂອງເພິ່ນ ຍາມໃດເພິ່ນກໍຖືຜົນປະໂຫຍດຂອງຊາດ, ຂອງປະຊາຊົນ ເໜືອກວ່າ, ເພິ່ນເປັນຫວ່ງເປັນໃຍຕໍ່ວຽກງານຂອງຊາດ, ຂອງປະຊາຊົນ, ເພິ່ນບໍ່ເຫັນແກ່ຕົວ, ເພິ່ນເປັນຜູ້ ນຳອ່ອນໂຍນ, ສຸຂຸມ ແລະ ຮັກແພງປະຊາຊົນ, ພະນັກງານ, ນັກຮົບ, ເພິ່ນເຊື່ອໝັ້ນມະຫາຊົນ ແລະ ປະ ຊາຊົນບັນດາເຜົ່າ ເພາະມູນເຊື້ອສັດຊື່ ເຮັດແທ້ທຳຈິງ, ບໍ່ຂີ້ຕົວະ, ຫລອກຫລວງ.

ຂະນະດຽວກັນເພິ່ນຍັງຮູ້ນຳໃຊ້ ທັງກໍ່ສ້າງໃຫ້ກາຍເປັນພະນັກງານກ້າວໜ້າ, ເພິ່ນເປັນແບບຢ່າງທີ່ດີສຳລັບມານະຈິດປະຕິວັດບຸກຄື ການນັບຖື ໂມງເວລາ, ເຮັດວຽກຕ້ອງສຸມສະຕິປັນຍາຢ່າງຈົດຈໍ່ ເຮັດຢ່າງລະອຽດ ແລະ ມີວິທະຍາສາດແທ້, ເພິ່ນເປັນຜູ້ນຳທີ່ມີແບບແຜນການດຳລົງຊີວິດປອດໃສຂາວສະອາດ, ກະທັດຮັດງ່າຍດາຍບໍ່ໂລບມາກໂລພາ, ເພິ່ນເປັນຄົນເຄັ່ງຄັດຕໍ່ການໃຫ້ສິນບົນ, ຂອງຕ້ອນຂອງຝາກຈາກບ່ອນຕ່າງໆເນື່ອງຈາກເພື່ອຄວາມ ປອດໄພ ແລະ ມາລະຍາດຂອງຜູ້ນຳ, ເພິ່ນບໍ່ມີເຮືອນສ່ວນຕົວນອກຈາກເຮືອນມູນທີ່ພໍ່ແມ່ປະໃຫ້ຢູ່ບ້ານເກີດ, ກົງກັນຂ້າມ ເພິ່ນພັດເປັນຫ່ວງເປັນໃຍຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ, ຄວາມທຸກສຸກ ຂອງພະນັກງານອາວຸໂສບຳນານ ແລະ ເຂດພື້ນຖານການປະຕິວັດເກົ່າ ໃນເມື່ອກ່ອນ. ເພິ່ນຖືສຳຄັນຕໍ່ມູນ ເຊື້ອປະຕິວັດ ແລະ ມູນເຊື້ອສິລະປະວັດທະນະທຳ, ຮີດຄອງປະເພນີອັນດີງາມຂອງປະຊາຊົນບັນດາເຜົ່າ ໂດຍເພິ່ນຍາດເວລາໄປຮ່ວມ ຫລື ສົ່ງສານອວຍພອນບຸນປະຈຳຊາດ, ບຸນປະເພນີ.

ປະທານ ໄກສອນ ພົມວິຫານ ເປັນຄົນທີ່ມີສາຍຕາຄົມແຫລມ, ສະຫລາດສະຫລຽວວ່ອງໄວ, ປາກເວົ້າໄປກັບການເຮັດຕົວຈິງ, ເປັນຄົນມີຄວາມຮູ້ຄວາມສາມາດ, ແຕ່ຍາມໃດກໍຖະໜອມຖອມຕົນ ເປັນທີ່ນັບຖືຂອງໝູ່ຄະນະ ແລະ ມະຫາຊົນ…