ສະພາແຫ່ງຊາດ ພິຈາລະນາຮ່າງກົດໝາຍ ວ່າດ້ວຍທະນາຍຄວາມສະບັບປັບປຸງ

ໃນວາລະດຳເນີນກອງປະຊຸມກອງສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ວັນທີ 12 ທັນວາ 2022 ໂດຍການເປັນປະທານຂອງທ່ານ ຈະເລີນ ເຢຍປ່າວເຮີ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ ໄດ້ສືບຕໍ່ຄົ້ນຄວ້າພິຈາລະນາ ແລະ ປະກອບຄຳຄິດເຫັນໃສ່ຮ່າງກົດໝາຍ ວ່າດ້ວຍທະນາຍຄວາມສະບັບປັບປຸງ ທີ່ສະເໜີໂດຍທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ເຊິ່ງກົດໝາຍສະບັບນີ້ປະກອບມີທັງໝົດ 10 ພາກ, 15 ໝວດ, 87 ມາດຕາ. ໃນນັ້ນ, ໄດ້ປັບປຸງຄໍາສັບ 29 ມາດຕາ, ປັບປຸງເນື້ອໃນ 16 ມາດຕາ, ໄດ້ໂຮມສອງພາກເຂົ້າເປັນພາກດຽວກັນມີໜຶ່ງພາກ, ເພີ່ມເຂົ້າໃໝ່ 1 ໝວດ, 07 ມາດ ຕາ, ຮັກສາໄວ້ 35 ມາດຕາ. ທັງນີ້ ແນໃສ່ເຮັດໃຫ້ຮ່າງກົດໝາຍສະບັບດັ່ງກ່າວມີເນື້ອໃນຄົບຖ້ວນສົມບູນ, ຖືກຕ້ອງ, ສອດຄ່ອງກັບແນວທາງພັກ, ລັດວາງອອກ.

ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ກ່າວວ່າ: ເຫດຜົນ ແລະ ຄວາມຈໍາເປັນໃນການປັບປຸງກົດໝາຍ ວ່າດ້ວຍທະນາຍຄວາມ ແມ່ນເພື່ອຮັບປະກັນຄວາມເປັນທໍາ, ຖືກຕ້ອງໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງລູກຄວາມ, ຮັບປະກັນສະໜອງຫລັກຖານໃຫ້ແກ່ການແກ້ໄຂຄະດີ ຢ່າງຖືກຕ້ອງ ແລະ ທັນເວລາ ແລະ ສ້າງຄວາມເຂັ້ມແຂງແກ່ຂະບວນການຍຸຕິທຳ, ສ້າງເງື່ອນໄຂໃນການເຂົ້າເຖິງຂະບວນການຍຸຕິທາ, ສ້າງຄວາມເຊື່ອໝັ້ນແກ່ປະຊາຊົນ ແລະ ນັກລົງທຶນ ທັງພາຍໃນ ແລະ ຕ່າງປະເທດ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ເຮັດໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຍຸຕິທໍາ ຈຶ່ງມີຄວາມຈໍາເປັນຕ້ອງໄດ້ປັບປຸງກົດໝາຍສະບັບນີ້ເປັນເຄື່ອງມືທາງດ້ານນິຕິກຳ ແລະ ກຳນົດຫຼັກການ, ລະບຽບການ, ມາດຕະການ ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານທະນາຍຄວາມ.

ພາຍຫລັງກົດໝາຍ ວ່າດ້ວຍທະນາຍຄວາມສະບັບປັບປຸງນີ້ຖືກຮັບຮອງ ແລະ ປະກາດໃຊ້ແລ້ວ ຄາດວ່າຈະເຮັດໃຫ້ເນື້ອໃນກົດໝາຍມີຄວາມອຸດົມສົມບູນ, ລະອຽດຈະແຈ້ງຂຶ້ນ, ເຂົ້າໃຈງ່າຍໃນທາງປະຕິບັດ ແລະ ຕອບສະໜອງທັນກັບສະພາບການຂະຫຍາຍຕົວ ຂອງເສດຖະກິດ-ສັງຄົມໃນປັດຈຸບັນ ແລະ ອະນາຄົດ, ຈະເປັນເຄື່ອງມື ແລະ ເປັນບ່ອນອີງ ໃນການເຄື່ອນ ໄຫວວຽກງານຂອງສະພາທະນາຍຄວາມ ແລະ ທະນາຍຄວາມ ໃຫ້ມີປະສິດທິພາບ, ປະສິດທິຜົນສູງ ເພື່ອນຳໃຊ້ເຂົ້າໃນການບໍລິຫານ ແລະ ຄຸ້ມຄອງທະນາຍຄວາມ, ນໍາໃຊ້ເຂົ້າໃນການໃຫ້ບໍລິການທາງດ້ານກົດໝາຍຂອງທະນາຍຄວາມ ໃນການປົກປ້ອງສິດ ແລະ ຜົນປະໂຫຍດຂອງລູກຄວາມໄດ້ດີຂຶ້ນກວ່າເກົ່າ; ເປີດໂອກາດໃຫ້ແກ່ນັກສຶກສາ ທີ່ຮຽນຈົບກົດໝາຍລະດັບຊັ້ນສູງ ສາມາດສະໝັກເຂົ້າມາເປັນທະນາຍ ຄວາມ ໄດ້ຫລາຍຂຶ້ນ, ທັງເປັນການສົ່ງເສີມໃຫ້ນັກສຶກສາຊັ້ນສູງ ສາມາດຊອກຫາວຽກເຮັດງານທຳໃນຂະ ແໜງວິຊາຊີບທະນາຍຄວາມ ຊຶ່ງຈະສົ່ງຜົນດີໃຫ້ແກ່ການຫລຸດຜ່ອນຈໍານວນນັກສຶກສາກົດໝາຍຊັ້ນສູງ ທີ່ຍັງວ່າງງານ ແລະ ມີຈໍານວນຫລາຍໃນປັດຈຸບັນ.