ດີໃຈນຳນະຄອນຫລວງຈະເລັ່ງແກ້ໄຂ ຮ້ານບັນເທີງເຄື່ອນໄຫວຜິດລະບຽບ
ໂດຍ: ທ່ຽງທຳ
ເພື່ອນຜູ້ອ່ານທີ່ຮັກແພງ, ເມື່ອໄດ້ງິນຂ່າວນີ້ ໃຜໆກໍອາດຈະດີໃຈ ເພາະສິ່ງຫຍໍ້ທໍ້ໃນຂົງເຂດນີ້ມັນເປັນພະຍາດຊ້ຳເຮື້ອມາເປັນເວລາດົນນານແລ້ວ ແລະ ກໍມີການແກ້ໄຂກັນມາແລ້ວຈົນນັບບໍ່ຖ້ວນຈາກຂະແໜງຜູ້ປົກຄອງມະຫາພາກ, ແຕ່ແກ້ຜູ້ນັ້ນຜູ້ນີ້ພັດເກີດຂຶ້ນມາໃໝ່ ເບິ່ງແລ້ວຄືເຮັດຫລິ້ນ ຍາມໃດກໍວ່າ: ຮ້ານບັນເທີງນີ້ຜິດລະບຽບເປີດກາຍໂມງເວລາກຳນົດ, ປະປ່ອຍໃຫ້ໄວໜຸ່ມບໍ່ເຖິງອາຍຸກະສຽນເຂົ້າໃຊ້ບໍລິການ, ບ່ອນນີ້ໃຊ້ເປັນບ່ອນມົ້ວສຸມຢາເສບຕິດ, ໂສເພນີ ແລະ ອື່ນໆ ຟັງແລ້ວກໍເປັນຕາຢ້ານ, ບາງແຫ່ງກໍໄລ່ຍິງກັນຢ່າງປ່າເຖື່ອນ ແລະ ອື່ນໆ. ຈາກຄຳຕ້ອງຫານີ້ກໍມີຫລາຍຄົນຕັ້ງຄຳຖາມຂຶ້ນວ່າ: ເປັນຫຍັງ ? ເບື້ອງອຳນາດການປົກຄອງ ແລະ ຂະແໜງການຄຸ້ມຄອງຈຶ່ງປະປ່ອຍໃຫ້ມີສະພາບແບບນີ້ເກີດຂຶ້ນ, ຫລາຍຄຳເຫັນຕອບວ່າ: ການເປີດຮ້ານບັນເທີງ, ຮ້ານຄາລາໂອເກະ ຖ້າຜູ້ບໍ່ມີບາລະມີ, ບໍ່ມີແຂງມີຂາຢູ່ເບື້ອງໜ້າເບື້ອງຫລັງແດ່ກໍຍາກຈະດຳເນີນໄປໄດ້ ເພາະສິ່ງນີ້ມັນອາດມີນອກມີໃນນຳກັນ ວ່າຊັ້ນ !.
ເອົາລະ ! ຖ້າຈະຍົກສິ່ງຫຍໍ້ທໍ້ດ້ານນີ້ກໍມີຫລາຍ. ແຕ່ເຖິງຢ່າງໃດກໍຂໍຊົມເຊີຍພະແນກ ຖວທ ນະຄອນຫລວງ ຈະເລັ່ງແກ້ໄຂໃຫ້ສຳເລັດໂດຍໄວ ເພາະປັດຈຸບັນເພິ່ນມີຂໍ້ມູນ ແລະ ກວດກາເຫັນແລ້ວບັນດາຮ້ານບັນເທີງທີ່ເຄື່ອນໄຫວບໍ່ຖືກຕ້ອງດັ່ງກ່າວ ເພື່ອຄວາມເປັນລະບຽບຮຽບຮ້ອຍ ແລະ ຄວາມສະຫງົບສຸກຂອງບ້ານເມືອງ ແລະ ຄຽງຄູ່ກັນນີ້ ກໍຂໍໃຫ້ຂະແໜງກ່ຽວຂ້ອງດັ່ງກ່າວກວດກາ ແລະ ເລັ່ງແກ້ໄຂສະພາບຮ້ານເບຍກອດ, ຮ້ານກາເຟຢອດທີ່ມີການແອບແຝງຂອງສາວບໍລິການນັ້ນເບິ່ງໃນປັດຈຸບັນຖືວ່າອ່າວມີຫລາຍ ນັບທັງຂອງພາຍໃນ ແລະ ຕ່າງປະເທດກໍມີໃຫ້ເລືອກຢູ່ຫລາຍເສັ້ນທາງໃນເຂດຊານເມືອງ, ຂ້າພະເຈົ້າຄິດວ່ານີ້ກໍເປັນບັນຫາຮີບດ່ວນທີ່ຈະຕ້ອງໄດ້ແກ້ໄຂ.
