ເຊີນຊວນທຸກທ່ານເຂົ້າຮ່ວມງານເທສະການສະຕາດອັບລາວ 2022 ຊີງເງິນ 100.000.000 ກີບ
December 10, 2022 - 2:22 PM
ເທດສະການສະຕາດອັບລາວ Lao Startup Fest 2022 ແມ່ນເປັນກິດຈະກຳໜຶ່ງທີ່ສຳຄັນ ເຊິ່ງເປັນການຈັດຕັ້ງຜັນຂະຫຍາຍແຜນພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ 2021-2025 ແລະ ທັງເປັນການຜັນຂະຫຍາຍຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.
ນອກນັັ້ນ, ກໍເປັນການສົ່ງເສີມທຸລະກິດສະຕາດອັບ ໃຫ້ສາມາດເຂົ້າເຖິງຕະຫລາດທັງພາຍໃນ ແລະ ຕ່າງປະເທດ, ທັງເປັນການເຜີຍແຜ່ສ້າງຈິດສຳນຶກໃຫ້ແກ່ຜູ້ປະກອບກິດຈະການທຸລະກິດສະຕາດອັບກ່ຽວກັບກົດໝາຍ ແລະ ລະບຽບການທີ່ກ່ຽວຂ້ອງ.
ງານດັ່ງກ່າວ ແມ່ນຈະໄດ້ຈັດຂຶ້ນໃນວັນທີ 16-18 ທັນວາ 2022 ທີ່ໂຮງແຮມຄຣາວພລາຊ່າ ນະຄອນຫລວງວຽງຈັນ. ສຳລັບກິດຈະກຳພາຍໃນງານ ແມ່ນຈະມີການວາງສະແດງຜະລິດຕະພັນ ແລະ ການບໍລິການຂອງຜູ້ປະກອບກິດຈະການສະຕາດອັບລາວ, ເວທີເຜີຍແຜ່ນະໂຍບາຍຕ່າງໆຈາກພາກລັດ ແລະ ແລກປ່ຽນບົດຮຽນຈາກຜູ້ປະກອບກິດຈະການສະຕາດອັບຈາກພາຍໃນ ແລະ ຕ່າງປະເທດ ແລະ ການແຂ່ງຂັນສະຕາດອັບລາວ (Lao Startup Award) ເພື່ອຊິງເງິນລາງວັນລວມຫລາຍ ກວ່າ 100.000.000 ກິບ ເຊິ່ງເປັນເວທີທີ່ໃຫ້ຄວາມສົນໃຈຂອງສັງຄົມ ແລະ ຜູ້ທີ່ເຂົ້າຮ່ວມໄດ້ເປັນຢ່າງດີ.
ສາມາດຕິດຕາມຂໍ້ມູນ ແລະ ອັບເດດຂໍ້ມູນຂ່າວສານໄດ້ທີ່ Facebook Page: Lao Startup Fest
