ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານຄົ້ນຄວ້າປັບປຸງຫລາຍບັນຫາ ເພື່ອພັດທະນາສີມືແຮງງານ ແລະ ສ້າງວຽກເຮັດງານທຳໃຫ້ປະຊາຊົນ

ໃນວາລະການດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ວັນທີ 9 ທັນວາ 2022, ທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ຕາງໜ້າຄະນະປະຈຳສະພາແຫ່ງຊາດ ກ່າວມີຄຳເຫັນຕໍ່ບົດລາຍງານກ່ຽວກັບການສ້າງອາຊີບ, ການພັດທະນາສີມືແຮງງານ ເພື່ອການມີວຽກເຮັດງານທຳ ແລະ ແກ້ໄຂບັນຫາການວ່າງງານ ຂອງກະຊວງແຮງງານ ແລະ ສະຫວັດດີການສັງຄົມວ່າ:  ຜ່ານການຕິດຕາມກົດກາຕົວເລກອັດຕາວ່າງງານຍັງມີຄວາມແຕກຕ່າງກັນລະຫວ່າງຂໍ້ມູນຈາກກະຊວງແຮງງານ ແລະ ສະຫວັດດີການສັງຄົມ ແມ່ນ 18,5% ກັບຈາກສູນສະຖິຕິແຫ່ງຊາດ ຂອງຜົນສຳຫລວດກຳລັງແຮງງານປີ 2022 ມີພຽງ 2,4% ແລະ ຜ່ານການຕິດຕາມກວດກາຕົວຈິງຂອງຄະນະປະຈຳສະພາແຫ່ງຊາດ ຕົ້ນເດືອນກັນຍາ 2022, ຢູ່ໃນບັນດາແຂວງ, ເຂດເສດຖະກິດພິເສດ, ໂຮງງານອຸດສາຫະກຳຈຳນວນໜຶ່ງ ຍັງເຫັນວ່າເຂົາເຈົ້າຍັງຕ້ອງການກຳລັງແຮງງານພາຍໃນເປັນຈຳນວນຫລາຍ ແຕ່ພວກເຮົາບໍ່ມີກຳລັງແຮງງານສະໜອງໃຫ້. ນອນີ້ຍັງມີການເຄື່ອນຍ້າຍກຳລັງແຮງງານຈາກຊົນນະບົດເຂົ້າສູ່ຕົວເມືອງ ຈາກແຂວງພາກເໜືອລົງໄປເຮັດວຽກຢູ່ສວນກ້ວຍ, ສວນຢາງພາລາ ຢູ່ແຂວງພາກໃຕ້ ແລະ ມີການເຄື່ອນຍ້າຍແຮງງານໄປອອກແຮງງານຢູ່ຕ່າງປະເທດ ໂດຍສະເພາະປະເທດເພື່ອນບ້ານໃກ້ຄຽງ ແບບບໍ່ຖືກຕ້ອງຕາມລະບຽບກົດໝາຍເປັນຈຳນວນຫລາຍ ຍ້ອນຄ່າແຮງງານຢູ່ປະເທດໃກ້ຄຽງສູງກວ່າປະເທດພວກເຮົາ.

ໂດຍອີງຕາມຂໍ້ມູນ ຂອງສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ບາງກອກ ປະເທດໄທ ໃຫ້ຮູ້ວ່າ: ປັດຈຸບັນແຮງງານລາວກຸ່ມທີ່ຕົກຄ້າງ ໃນໄລຍະການແຜ່ລະບາດ ຂອງພະຍາດໂຄວິດ-19 ແລະ ກຸ່ມແຮງງານລາວທີ່ເດີນທາງເຂົ້າປະເທດໄທໃນຮູບແບບນັກທ່ອງທ່ຽວ ແລະ ແບບເຂົ້າເມືອງບໍ່ຖືກຕ້ອງຕາມກົດໝາຍ, ພາຍຫລັງການເປີດປະເທດມີ 152.424 ຄົນ; ໃນນັ້ນ, ບໍ່ລວມແຮງງານທີ່ຈັດສົ່ງໄປຕາມລະບົບ MOU ແລະ ຍັງບໍ່ລວມແຮງງານທີ່ເຂົ້າ-ອອກ ຕາມດ່ານປະເພນີຢູ່ແຕ່ລະທ້ອງຖິ່ນ.

ໃນໄລຍະຜ່ານມາກົນໄກການຄຸ້ມຄອງການພັດທະນາສີມືແຮງງານ, ການສ້າງວິຊາຊີບ, ການສ້າງວຽກເຮັດງານທຳໃຫ້ປະຊາຊົນເພື່ອແກ້ໄຂບັນຫາການວ່າງງານ ເຫັນວ່າຍັງບໍ່ທັນເປັນລະບົບເອກະພາບ, ບໍ່ທັນຕິດພັນກັບຄວາມຕ້ອງການຂອງຕະຫລາດແຮງງານລວມທັງຄຸນນະພາບຍັງຕໍ່າ, ການປະສານສົມທົບລະຫວ່າງສະຖານອາຊີວະສຶກສາ, ພັດທະນາສີມືແຮງງານ, ໂຮງຮຽນ, ສູນຝຶກອົບຮົມວິຊາຊີບຂອງອົງການຈັດຕັ້ງມະຫາຊົນ, ພາກເອກະຊົນ, ຜູ້ປະກອບການ ແລະ ຜູ້ລົງທຶນບໍ່ທັນເປັນລະບົບກົມກຽວກັນ, ຕ່າງຝ່າຍຕ່າງເຮັດ ແລະ ມີການສ້າງຊ້ຳຊ້ອນກັນເຮັດໃຫ້ມີສະພາບແຮງງານເຫລືອບໍ່ພໍ, ນອກນີ້ການຮຽນຈົບມາແລ້ວ ຊອກວຽກເຮັດງານທຳຍາກ ແລະ ບໍ່ເປັນທີ່ຍອມຮັບຂອງຜູ້ໃຊ້ແຮງງານ.

ສະນັ້ນ, ສະພາແຫ່ງຊາດໄດ້ສະເໜີໃຫ້ລັດຖະບານຄົ້ນຄວ້າປັບປຸງຫລາຍບັນຫາສຳຄັນ ເພື່ອພັດທະນາສີມືແຮງງານ ແລະ ສ້າງວຽກເຮັດງານທຳໃຫ້ປະຊາຊົນບັນລຸຕາມແຜນທີ່ວາງໄວ ເປັນຕົ້ນຄົ້ນຄວ້າເພີ່ມຄ່າແຮງງານຂັ້ນຕໍ່າ ເພື່ອໃຫ້ສາມາດດຳລົງຊີວິດຢູ່ໄດ້ທັງເປັນແຮງຮູງໃຈໃຫ້ຜູ້ອອກແຮງງານ ແລະ ຮັບປະກັນໃຫ້ມີສະຫວັດດີການທີ່ດີໃຫ້ແກ່ຜູ້ອອກແຮງງານຕາມກົດໝາຍກຳນົດ; ຈັດງານຕະຫລາດນັດແຮງງານ ເພື່ອເຮັດໃຫ້ແຮງງານລາວ ໄດ້ມີໂອກາດເຂົ້າເຖິງຕະຫລາດແຮງງານຫລາຍຂຶ້ນກວ່າເກົ່າ ທັງເຮັດໃຫ້ເຂົ້າເຈົ້າໄດ້ເຂົ້າເຖິງ ຂໍ້ມູນຂ່າວສານກ່ຽວກັບກົດໝາຍ, ນິຕິກຳ ແລະ ຂໍ້ມູນຕະຫລາດແຮງງານລວມທັງຄວາມຮູ້ຮອບຕົວທີ່ກ່ຽວພັນກັບການອອກແຮງງານຢູ່ພາຍໃນ ແລະ ຕ່າງປະເທດ; ປັບປຸງພັດທະນາຫລັກສູດ, ວິທີການຮຽນ-ການສອນ, ການຝຶກວິຊາຊີບ ແລະ ການພັດທະນາສີມືແຮງງານ ໃຫ້ໄດ້ມາດຕະຖານໃນທຸກກຸ່ມເປົ້າໝາຍ; ເພີ່ມທະວີໂຄສະນາເຜີຍແຜ່ກົດໝາຍ ແລະ ນິຕິກຳທີ່ກ່ຽວຂ້ອງກັບການນຳໃຊ້ແຮງງານ, ປັບປຸງກົນໄກ ແລະ ຂັ້ນຕອນການປະສານງານກ່ຽວກັບວຽກງານການຄຸ້ມຄອງແຮງງານໃຫ້ມີປະສິດທິພາບ.