ກະຊວງກະສິກຳ ແລະ ປ່າໄມ້ ສ້າງນະໂຍບາຍການຜະລິດສະບຽງອາຫານ ແລະ ຜະລິດກະສິກຳເປັນສິນຄ້າ ໄດ້ລື່ນຄາດໝາຍ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ວັນທີ 7 ທັນວາ 2022, ທ່ານ ເພັດ ພົມພິທັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ຊີ້ແຈງຕໍ່ຄຳຊັກຖາມຂອງ ສະມາຊິກສະພາແຫ່ງຊາດ ກ່ຽວກັບການຈັດຕັ້ງນະໂຍບາຍການຜະລິດເພື່ອຄ້ຳປະກັນສະບຽງອາຫານ, ການຜະລິດເປັນສິນຄ້າ ທີ່ຜ່ານມາເປັນຄືແນວໃດ?

ຕໍ່ກັບຊັກຖາມດັ່ງກ່າວ ທ່ານໄດ້ຊີ້ແຈງວ່າ: ສະເພາະປີ 2022 ນີ້ອີງໃສ່ມະຕິສະພາແຫ່ງຊາດໄດ້ຮອງຮັບເອົາຕົວເລກຄາດໝາຍຂອງຂະແໜງການກະສິກຳ ແລະ ປ່າໄມ້ ອັດຕາເຕີບໂຕ ຫລື ອັດຕາຂະຫຍາຍຕົວ ຂອງຂະແໜງການ 2,7 ກວມເອົາ 16,7 ສ່ວນຮ້ອຍ GDP ຜ່ານການຈັດຕັ້ງປະຕິບັດຕົວຈິງ ຂະແໜງກະສິກຳມີອັດຕາເຕີບໂຕ 2,9 ສ່ວນຮ້ອຍ ຖ້າທຽບໃສ່ແຜນ ແມ່ນລື່ນຄາດໝາຍ 0,2 ສ່ວນຮ້ອຍ
– ການຜະລິດສະບຽງອາຫານ ປີ 2022 ເນື້ອທີ່ປູກເຂົ້າລວມມີ 959,404 ເຮັກຕາ ແລະ ຜົນຜະລິດ 3,78 ລ້ານໂຕນ ລື່ນຄາດໝາຍ 2 ສ່ວນຮ້ອຍ ສາມາດສະໜອງບໍລິໂພກຖ້າໄລ່ໃສ່ຫົວຄົນ 260 ກິໂລ/ຄົນ/ປີ ແມ່ນປະຊາຊົນສາມາດກຸ້ມກິນ ແຕ່ລາຄາຈະແພງກວ່າເກົ່າ
– ພືດ ປະຕິບັດໄດ້ 2,7 ລ້ານໂຕນ ເທົ່າກັບ 72 ສ່ວນຮ້ອຍ ສະເພາະຕົວເລກ 9 ເດືອນ ຄາດວ່າຈະໄດ້ຕາມແຜນຢູ່ໃນ 3,3ສ່ວນຮ້ອຍ ແລະ ຜະລິດຊີ້ນປາ ໄຂ່ ໄດ້ 57, 644 ໂຕນ ເທົ່າກັບ 99,7 ສ່ວນຮ້ອຍຂອງແຜນການປີ ແລະ ສາມາດສະໜອງ ຊີ້ນປາອາຫານສະເລ່ຍ 68 ກິໂລ/ຄົນ/ປີ
• ຜະລິດກະສິກຳເປັນສິນຄ້າ
ສາມາດປູກພືດສົ່ງອອກ 8,12 ລ້ານໂຕນ ເທົ່າກັບ 129 ສ່ວນຮ້ອຍ ຂອງແຜນການປີ ຜະລິດເປັນສິນຄ້າປັດຈຸບັນມີການຂະຫຍາຍຕົວ, ມີການລ້ຽງເປັນຟາມໂດຍນຳໃຊ້ເຕັກໂນໂລຊີທີ່ທັນສະໄໝ ປັດຈຸບັນມີຟາມລ້ຽງທັງໝົດ 2,252 ຟາມ ມີສັດລ້ຽງ 5 ລ້ານກວ່າໂຕ, ຟາມຄວາຍ 34 ຟາມ ມີຄວາຍ 1814 ໂຕ ຟາມງົວ 658 ຟາມ ມີງົວ 95,433 ໂຕ, ຟາມໝູ 700 ຟາມ ມີໝູ 3 ແສນກວ່າໂຕ ນອກນັ້ນຍັງມີຟາມແບ້, ເປັດ ໄກ່ ນົກ, ການສົ່ງອອກຢູ່ໃນຕົວເລກ 9 ເດືອນຜ່ານມາ ສາມາດບັນລຸໄດ້ 1,183 ຕື້ໂດລາສະຫະລັດ ສະເພາະຕົວເລກເດືອນສິບເອັດ 1,379 ຕື້ໂດລາສະຫະລັດ ລື່ນຄາດໝາຍ ຖ້າທຽບໃສ່ຕົວເລກໃນປີກາຍແມ່ນເພີ່ມຂຶ້ນ 25,42 ສ່ວນຮ້ອຍ ແລະ ສາມາດເປີດຕະຫລາດເຈລະຈາເລື່ອງສຸຂະອະນາໄມ ພືດ ສັດໄດ້ 17 ລາຍການ.