ແບບຢ່າງທີ່ດີ ທີ່ທຸກຄົນທົ່ວສັງຄົມຕ້ອງຮໍ່າຮຽນ ແລະ ປະພຶດໃຫ້ໄດ້

ສັງຄົມມັກມີການຮຽນແບບຖ້າແຍກການປະພຶດຂອງຄົນກໍມີ “ສອງດ້ານ ຄື “ດີ ແລະ ບໍ່ດີ. ຜູ້ມັກຄວາມດີ ກໍຮຽນເອົາແບບຢ່າງທີ່ດີຈາກການກະທຳ ກໍຄືນິໄສໃຈຄໍ ຜູ້ທີ່ດີກວ່າ ເຊິ່ງໄດ້ຮັບການຍ້ອງຍໍຊົມເຊີຍຈາກສັງຄົມ (ວ່າດີ) ມາແລ້ວ, ເຖິງວ່າບຸກຄົນທີ່ກ່ຽວຂ້ອງກັບການກະທຳດີນັ້ນໄດ້ລາຈາກໂລກໄປແລ້ວ ຫລາຍຮ້ອຍປີ, ສ່ວນຜູ້ບໍ່ມັກດີ ກໍມັກຮຽນແບບຄົນບໍ່ດີຕາມຈຸດຢືນຂອງເຂົາ. ເຖິງແນວໃດກໍດີການມີແບບຢ່າງທີ່ດີຫລາຍໃນສັງຄົມຖືເປັນເລື່ອງປະເສີດສຳລັບສັງຄົມນັ້ນ. ການສ້າງແບບຢ່າງທີ່ດີມີຫລາຍລະດັບນັບແຕ່ຂັ້ນຄອບຄົວພື້ນຖານຂຶ້ນໄປ.

ໃນໂອກາດຄົບຮອບ 102 ປີ (13 ທັນວາ 1920-13 ທັນວາ 2022) ວັນເກີດປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຊຶ່ງຄວາມເປັນຢ່າງທີ່ດີງາມນັ້ນ, ຂໍເອົາສ່ວນໜຶ່ງແບບຢ່າງຂອງເພິ່ນຄື ເມື່ອວາງວຽກງານອອກແລ້ວກໍມີການແບ່ງງານໃຫ້ແຕ່ລະສະຫາຍຮັບຜິດໍອບແລ້ວ ໃກ້ຊິດຕິດຕາມກວດກາໃຫ້ຮູ້ເຖິງຜົນໄດ້, ຄວາມຫຍຸ້ງຍາກ, ຂໍ້ຕິດຂັດຄົງຄ້າງເພື່ອຊ່ວຍຄຳເຫັນແກ້ໄຂໃຫ້ທັນເວລາ. ເມື່ອກຳນົດເວລາປະຕິບັດສຳເລັດແຜນວຽກງານແລ້ວຊຸກຍູ້ໃຫ້ແຕ່ລະສະຫາຍສະຫລຸບຕີລາຄາຜົນໄດ້ຮັບ, ຈຸດດີ, ຈຸດອ່ອນ, ຂໍ້ຄົງຄ້າງ, ສາເຫດ ແລະ ວິທີແກ້ໄຂ. ໃນສ່ວນຂອງແບບແຜນການດຳລົງຊີວິດທີ່ງ່າຍດາຍ ບໍ່ວ່າຈະເປັນການນຸ່ງຖື, ການກິນ, ການພັກຜ່ອນ; ບ່ອນຢູ່, ຫ້ອງນອນ, ຫ້ອງເຮັດວຽກຂອງເພິ່ນທັງຕອນຢູ່ຄຸ້ມຫລັກ 6 ວຽງຈັນ ແລະ ຢູ່ເຂດປົດປ່ອຍກໍຄືກັນ ສະແດງເຖິງທັດສະນະມະຫາຊົນ, ການກິນອາຫານເຊົ້າ ກໍມີແຕ່ຖ້ວຍເຂົ້າປຽກແບບງ່າຍດາຍ, ການພົວພັນກັບຄອບຄົວລູກເມຍກໍມີແຜນການເວລາເພື່ອຄົ້ນຄວ້າຮໍ່າຮຽນ, ມີເວລາພັກຜ່ອນ, ມີເວລາລົງໄປຫາພະນັກງານ, ນັກຮົບ, ປະຊາຊົນ.

ເປັນທີ່ຮູ້ກັນດີວ່າ ຄອບຄົວໃດມີຫົວໜ້າຄອບຄົວ ຫລື ຜູ້ອາວຸໂສກວ່າເປັນແບບຢ່າງທີ່ດີ, ລູກຫລານກໍປະ ພຶດດີນຳ, ເຖິງວ່າອາດຈະບໍ່ໄດ້ໝົດທຸກຄົນ, ແຕ່ຢ່າງໜ້ອຍກໍແມ່ນຄົນສ່ວນຫລາຍເປັນຄົນດີ. ການປະພຶດແລະ ສະແດງອອກໃນທາງທີ່ດີ ແມ່ນຄວາມຮຽກຮ້ອງຕ້ອງການຂອງທຸກສັງຄົມ. ການສ້າງຄ່ານິຍົມ ກໍເຊັ່ນດຽວກັນລ້ວນແຕ່ເກີດຈາກການປະພຶດໃນທາງດີ, ເວົ້າຄຽງຄູ່ກັບປະຕິບັດ (ດີ) ດັ່ງຄຳບູຮານລາວວ່າ: “ແມ່ມານບອກຢາປ້າງ ແມ່ຮ້າງບໍ່ຢາສະເໜ ອັນນີ້ບໍ່ໃຫ້ນັບ” ໝາຍວ່າການກະທຳ ກັບຄຳເວົ້າຕ້ອງຄຽງຄູ່ກັນ, ປາກເວົ້າເປັ້ງໆ ສອນຜູ້ອື່ນ, ແຕ່ການກະທຳຕົວຈິງຕົນເອງພັດບໍ່ໄດ້ ຖືວ່າໃຊ້ບໍ່ໄດ້ຜົນ, ບໍ່ອາດເປັນແບບ ຢ່າງທີ່ດີງາມໄດ້. ການສ້າງຄ່ານິຍົມປຸກລະດົມ ໃຫ້ນຸ່ງເສື້ອສີແດງ, ແຕ່ຜູ້ປຸກລະດົມ ພັດນຸ່ງສີຟ້າບາງທີກໍອາດບໍ່ໄດ້ຜົນ. ການປຸກລະດົມໃຫ້ຄົນຂີ່ລົດຖີບເພື່ອຫລຸດຜ່ອນຄວັນລົດ ແລະ ຄວາມແອອັດການຈະລາ ຈອນ, ແຕ່ຜູ້ປຸກລະດົມ ບໍ່ເຄີຍຂີ່ລົດຖີບ ເຄື່ອນໄຫວປະຈຳວັນອັນນີ້ ກໍບໍ່ຄ່ອຍຄັກ.