ກະຊວງອຸດສາຫະກຳ-ການຄ້າ ຈະເລັ່ງຄຸ້ມຄອງການດຳເນີນທຸລະກິດອອນລາຍໃຫ້ຮັດກຸມ ເພື່ອສິດອັນຊອບທຳຂອງຜູ້ຊື້-ຜູ້ຂາຍ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ວັນທີ 8 ທັນວາ 2022 ນີ້, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ ກ່ຽວກັບການຄ້າອອນລາຍໃນປັດຈຸບັນກຳລັງເປັນທີ່ນິຍົມ ແລະ ແຜ່ຫລາຍໃນທົ່ວສັງຄົມ, ແຕ່ການຄຸ້ມຄອງ, ຕິດຕາມກວດກາ ແລະ ການຈັດເກັບລາຍຮັບ ຈາກການດຳເນີນທຸລະກິດອອນລາຍ ຫລື ອີເລັກໂຕຣນິກ ຍັງບໍ່ທັນເປັນຮູບປະທຳ. ຕໍ່ບັນຫາດັ່ງກ່າວ, ທາງກະຊວງອຸດສາຫະກຳ ແລະ ການຄ້າ ຈະມີມາດຕະການປະຕິດບັດຄື:

1. ສຸ່ມໃສ່ການສ້າງຍຸດທະສາດການຄ້າທາງອີເລັກໂຕຣນິກຢູ່ໃນ ສປປ ລາວ, ແຜນການພັດທະນາ ແລະ ນິຕິກຳທີ່ກ່ຽວຂ້ອງ ເພື່ອຄຸ້ມຄອງສົ່ງເສີມ ການຄ້າອີເລັກໂຕຣນິກໃຫ້ມີຄວາມຮັດກຸມ ພ້ອມທັງສ້າງເງື່ອນໄຂອຳນວຍຄວາມສະດວກໃຫ້ແກ່ການດຳເນີນທຸລະກິດດັ່ງກ່າວ.
2. ສ້າງຈຸດປະສານງານ, ສ້າງຄວາມເຂັ້ມແຂງໃຫ້ແກ່ພະນັກງານ ເພື່ອເຮັດວຽກເປັນເສນາທິການປະສານສົມທົບ ອຳນວຍຄວາມສະດວກ ແລະ ຊຸກຍູ້ສົ່ງເສີມການຈັດຕັ້ງປະຕິບັດດຳລັດວ່າດ້ວຍການຄ້າອິເລັກໂຕຣນິກ ແລະ ນິຕິກຳທີ່ກ່ຽວຂ້ອງ. ນອກນີ້ທາງກະຊວງໄດ້ສະເໜີຫາກະຊວງພາຍໃນ ເພື່ອຈະສ້າງພະແນກໜຶ່ງໃນກົມສົ່ງເສີມການຄ້າ ຮັບຜິດຊອບສະເພາະດ້ານການຄ້າອີເລັກໂຕຣນິກ.
3. ຊຸກຍູ້ສ້າງເງື່ອນໄຂໃຫ້ຜູ້ດຳເນີນການຄ້າທາງອີເລັກໂຕຣນິກມາລົງທະບຽນ ແລະ ແຈ້ງຂໍ້ມູນກ່ຽວກັບການດຳເນີນທຸລະກິດຂອງຕົນ.
4. ເອົາໃຈໃສ່ໂຄສະນາເຜີຍແຜ່ໃຫ້ຄວາມຮູ້ ແລະ ສ້າງຄວາມເຂົ້າໃຈກ່ຽວກັບນະໂຍບາຍ, ນິຕິກຳຂອງລັດຖະບານ ພ້ອມທັງກາລະໂອກາດຄວາມສ່ຽງ ແລະ ສິດອັນຊອບທຳຂອງຜູ້ຊື້-ຜູ້ຂາຍ ໃນການຄ້າຂາຍດັ່ງກ່າວ.
5. ສ້າງກົນໄກປະສານງານ ແກ້ໄຂຂໍ້ຂັດແຍ່ງກ່ຽວພັນກັບທຸລະກຳການຄ້າທາງອີເລັກໂຕຣນິກຜ່ານລະບົບກົນໄກແກ້ໄຂຂໍ້ຂັດແຍ່ງທາງອອນລາຍທີ່ສາມາດເຊື່ອມຈອດກັບລະບົບສາຍດ່ວນ 1510 ຂອງກະຊວງອຸດສາຫະກຳ ແລະ ການຄ້າ ເພື່ອປົກປ້ອງຜູ້ຊົມໃຊ້.
6. ສ້າງລະບົບ, ຖານຂໍ້ມູນ ແລະ ເວບໄຊກ່ຽວກັບການສ້າງລະບົບທະບຽນອອນລາຍ ເພື່ອອຳນວຍຄວາມສະດວກໃຫ້ແກ່ຫົວໜ່ວຍທຸລະກິດໃນການແຈ້ງ ແລະ ຂໍອະນຸຍາດດຳເນີນທຸລະກິດທາງອີເລັກໂຕຣນິກ ພ້ອມທັງພັດທະນາ ສາມາດເຊື່ອມເຂົ້າກັບລະບົບ ເພື່ອແກ້ໄຂຂໍ້ຂັດແຍ່ງຕ່າງໆໃຫ້ເຊື່ອມເປັນລະບົບດຽວກັນ.
7. ສົ່ງເສີມຂົນຂວາຍການສ້າງຕັ້ງຄຸ້ມຄອງສະມາຄົມການຄ້າທາງອີເລັກໂຕຣນິກ ໃຫ້ສອດຄ່ອງ ຖືກຕ້ອງຕາມລະບຽບກົດໝາຍທີ່ກຳນົດໄວ້.
8. ຈະສ້າງສູນອີເລັກໂຕຣນິກ ຢູ່ 18 ແຂວງ ຜ່ານສູນບໍລິການການຄ້າອີເລັກໂຕຣນິກ 20 ຈຸດ ໃນທົ່ວປະເທດ ເພື່ອອຳນວຍຄວາມສະດວກໃຫ້ແກ່ຜູ້ເຮັດການຄ້າທາງນີ້ເຂົ້າເຖິງຖານຂໍ້ມູນດັ່ງກ່າວ.
9. ເພີ່ມການລົງທຶນທີ່ຕິດພັນກັບການຄ້າທາງອີເລັກໂຕຣນິກ ຢູ່ ສປປ ລາວ ເຊັ່ນ ການສ້າງສາງ ແລະ ຄັງສິນຄ້າ ຢູ່ຈຸດທີ່ເໝາະສົມລຽບທາງລົດໄຟລາວ-ຈີນ ເພື່ອໃຊ້ທ່າແຮງຂອງລົດໄຟລາວ-ຈີນ.
10. ຖອດຖອນບົດຮຽນຂະຫຍາຍການຮ່ວມມືສອງຝ່າຍ ແລະ ຫລາຍຝ່າຍ ເພື່ອຍົກລະດັບຄວາມສາມາດໃນການຄຸ້ມຄອງ ສົ່ງເສີມ ພັດທະນາ ເພື່ອເປັນເຄື່ອງມືທີ່ແຂງແຮງໃນການພັດທະນາເສດຖະກິດຢູ່ປະເທດລາວເຮົາ.