ຍີ່ປຸ່ນພົບ “ໄຂ້ຫວັດສັດປີກ” ລະບາດເພີ່ມ ເຕືອນກະສິກອນເຝົ້າລະວັງ

ວັນທີ 7 ທັນວາ, ກະຊວງກະສິກຳ, ປ່າໄມ້ ແລະ ປະມົງຂອງຍີ່ປຸ່ນ ກະຕຸ້ນເຕືອນຟາມສັດປີກ ແລະ ລັດຖະບານທ້ອງຖິ່ນຍົກລະດັບການປ້ອງກັນການລະບາດຂອງໄຂ້ຫວັດສັດປີກເພີ່ມອີກ. ຂະນະທີ່ພະຍາດດັ່ງກ່າວແພ່ລະບາດທົ່ວປະເທດຢ່າງວ່ອງໄວ ໂດຍພົບການລະບາດແລ້ວ 27 ກໍລະນີໃນ 16 ແຂວງ ເມື່ອໄລ່ຮອດວັນທີ 7 ທັນວາ ແລະ ນຳໄປສູ່ການກຳຈັດໄກ່ 4 ລ້ານກວ່າໂຕ.

ຍີ່ປຸ່ນພົບໄຂ້ຫວັດສັດປີກລະບາດໃນອັດຕາໄວກວ່າເມື່ອສອງປີກ່ອນ ເຊິ່ງເປັນປີທີ່ມີການກຳຈັດໄກ່ຈຳນວນຫລາຍເປັນປະຫວັດສາດ ນັບແຕ່ມີລາຍງານການລະບາດປະຈຳລະດູການປີ 2022 ຄັ້ງທຳອິດໃນທ້າຍເດືອນຕຸລາຜ່ານມາ.

ທ່ານ ເທັດສິໂຣະ ໂນມູຣະ ລັດຖະມົນຕີວ່າການກະຊວງດັ່ງກ່າວ ລະບຸວ່າ: ການສະກັດກັ້ນການແພ່ລະບາດນັ້ນມີຄວາມສຳຄັນ ເນື່ອງຈາກຜູ້ເດີນທາງໃນໄລຍະມື້ພັກປີໃໝ່ເພີ່ມຂຶ້ນ ໂດຍທ່ານຮຽກຮ້ອງໃຫ້ຝ່າຍທີ່ກ່ຽວຂ້ອງດຳເນີນມາດຕະການປ້ອງກັນພາຍໃຕ້ສົມມຸດຖານວ່າພື້ນທີ່ອ້ອມຮອບໂຮງລ້ຽງໄກ່ນັ້ນມີການປົນເປື້ອນ.

ນອກຈາກນັ້ນ, ທ່ານ ໂນມູຣະ ກ່າວວ່າ: ຟາມລ້ຽງໄກ່ທີ່ພົບການລະບາດຫລາຍແຫ່ງບໍ່ໄດ້ດຳເນີນມາດຕະການສຸຂະອະນາໄມຂັ້ນພື້ນຖານ ແລະ ກຳນົດໃຫ້ເທສະບານ ແລະ ກະສິກອນຜູ້ລ້ຽງສັດຂ້າເຊື້ອສິ່ງອຳນວຍຄວາມສະດວກຢ່າງຄວບຄຸມ ລວມທັງໃຊ້ມາດຕະການສຸຂະອະນາໄມອື່ນໆ.