ບໍລິສັດລົດຫວຽດນາມ “ວິນຟາສ” ຍື່ນ IPO ເຂົ້າຕະຫລາດຫຸ້ນອາເມລິກາ
ສຳນັກຂ່າວຫວຽດນາມລາຍງານວ່າ: ວິນຟາສ (VinFast) ຜູ້ຜະລິດລົດໄຟຟ້າຂອງຫວຽດນາມ ໄດ້ຍື່ນແບບສະແດງລາຍການຂໍ້ມູນການສະເໜີຂາຍຫລັກຊັບໃນແບບຟອມເອັຟ-1 (F-1) ຕໍ່ຄະນະກຳມະການເບິ່ງແຍງຫລັກຊັບ ແລະ ຕະຫລາດຫລັກຊັບຂອງອາເມລິກາ (SEC) ເພື່ອການສະເໜີຂາຍຫຸ້ນແກ່ປະຊາຊົນທົ່ວໄປຄັ້ງທຳອິດ ຫລື IPO.
ຖະແຫລງການຂອງວິນຟາສໃນວັນທີ 7 ທັນວາ ລະບຸວ່າ: ປັດຈຸບັນຍັງບໍ່ມີການກຳນົດຈຳນວນຫຸ້ນ ແລະ ຂອບເຂດລາຄາຂອງຫຸ້ນທີ່ຈະສະເໜີຂາຍ ແລະ ບໍລິສັດຕັ້ງໃຈຈະຈົດທະບຽນຫຸ້ນສາມັນໃນຕະຫລາດຫຸ້ນແນສແດດພາຍໃຕ້ຊື່ຫຍໍ້ VFS ເຊິ່ງຈະເຮັດໃຫ້ວິນຟາສເປັນບໍລິສັດຫວຽດນາມແຫ່ງທຳອິດທີ່ຈົດທະບຽນໃນອາເມລິກາ ຖ້າດຳເນີນງານສຳເລັດ.
ວິນຟາສຂຶ້ນແທ່ນເປັນຜູ້ຜະລິດລົດໃນປະເທດແຫ່ງທຳອິດຂອງຫວຽດນາມຈາກການຜະລິດລົດສັນດາບພາຍໃນ (ICE) ໃນປີ 2019 ໂດຍປັດຈຸບັນບໍລິສັດເນັ້ນການຜະລິດລົດໄຟຟ້າຢ່າງເຕັມຮູບແບບ ໂດຍມີໂຊລູມລະດັບໂລກໃນອາເມລິກາ, ການາດາ ແລະ ເອີຣົບ.
ສະມາຄົມຜູ້ຜະລິດລົດແຫ່ງຫວຽດນາມ ລະບຸວ່າ: ຈຳນວນຈຳໜ່າຍລົດຂອງຕະຫລາດຫວຽດນາມໄລຍະເດືອນມັງກອນ-ຕຸລາ ລວມມີ 332.963 ຄັນ ເພີ່ມຂຶ້ນ 52% ເມື່ອທຽບໃສ່ປີຕໍ່ປີ.
