ຮົງກົງຫລຸດຜ່ອນມາດຕະການໂຄວິດ ຫລຸດວັນກັກຕົວ-ກວດຫາເຊື້ອ

ລັດຖະບານຮົງກົງປະກາດໃນວັນທີ 8 ທັນວາວ່າ: ຈະຫລຸດໄລຍະເວລາການກັກຕົວຜູ້ຕິດເຊື້ອໂຄວິດ-19 ແລະ ຜູ້ສຳຜັດໃກ້ຊິດ ຈາກ 7 ວັນ ເປັນ 5 ວັນ ລວມທັງຂໍ້ບັງຄັບສຳລັບຜູ້ເດີນທາງເຂົ້າຮົງກົງທີ່ຕ້ອງກວດຫາເຊື້ອໂຄວິດ-19 ດ້ວຍວິທີການກວດແບບຮີບດ່ວນຕິດຕໍ່ກັນທຸກວັນ ກໍຫລຸດລົງຈາກ 7 ວັນເປັນ 5 ວັນ.

ເຖິງຢ່າງໃດກໍຕາມ, ມາດຕະການອື່ນໆເຊັ່ນ: ການເວັ້ນໄລຍະຫ່າງທາງສັງຄົມ, ການໃສ່ຜ້າປິດປາກ ແລະ ການໃຊ້ແອບພລິເຄຊັນຕິດຕາມການເຂົ້າໃຊ້ສະຖານທີ່ໃນອາຄານສາທາລະນະ, ຮ້ານບັນເທີງ ແລະ ຮ້ານອາຫານ ຈະຍັງມີຜົນບັງຄັບໃຊ້ຈົນຮອດວັນທີ 28 ທັນວາ.

ສຳນັກຂ່າວຣອຍເຕີລາຍງານວ່າ: ການເຄື່ອນໄຫວດັ່ງກ່າວມີຂຶ້ນຫລັງຈາກວັນທີ 7 ທັນວາ ຈີນປະກາດຫລຸດຜ່ອນຄວາມເຂັ້ມງວດຂອງມາດຕະການປ້ອງກັນໂຄວິດ-19 ຄັ້ງໃຫຍ່ທີ່ສຸດນັບແຕ່ເລີ່ມເກີດການແພ່ລະບາດເມື່ອ 3 ປີກ່ອນ.