ວຽກຈຸດສຸມຂອງລັດຖະບານໃນວາລະແຫ່ງຊາດແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ປະສົບຜົນສຳເລັດຫລາຍດ້ານ

ຕະຫລອດໄລຍະ 1 ປີ 3 ເດືອນຄືແຕ່ເດືອນສິງຫາ 2021 ເຖິງປັດຈຸບັນ, ບັນດາວຽກງານຈຸດສຸມຂອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນປະສົບຜົນສຳເລັດຫລາຍດ້ານພາຍຫລັງແຕ່ລະພາກສ່ວນແຕ່ຂັ້ນສູນກາງຮອດຂັ້ນທ້ອງຖິ່ນໄດ້ພະຍາຍາມຜັນຂະຫຍາຍ ແລະ ກຳນົດວຽກຈຸດສຸມແຕ່ລະດ້ານທີ່ຕິດພັນກັບຄວາມຮັບຜິດຊອບຂອງຕົນໂດຍອີງໃສ່ 3 ຫລັກການທີ່ກຳນົດໄວ້ ຄືຫລັກການເດັດຂາດ, ໂປ່ງໃສ ແລະ ເປັນມືອາຊີບ ເພື່ອສ້າງເງື່ອນໄຂຊຸກຍູ້ການຂະຫຍາຍຕົວຂອງຖານການຜະລິດ ແລະ ບໍລິການພາຍໃນ, ສ້າງຖານລາຍຮັບທີ່ເຂັ້ມແຂງ ແລະ ປະຢັດງົບປະມານ ແນໃສ່ແກ້ໄຂສະພາບຄ່ອງຂອງເສດຖະກິດ ແລະ ຫລຸດຜ່ອນຄວາມກົດດັນດ້ານໜີ້ສິນສາທາລະນະ.

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລາຍງານຕໍ່ກອງປະຊຸມໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 8 ທັນວາ 2022 ວ່າ: ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແຕ່ເດືອນສິງຫາ 2021 ເຖິງປັດຈຸບັນ ໄດ້ອີງໃສ່ 3 ຫລັກການດັ່ງກ່າວ ເຫັນວ່າປະສົບຜົນສຳເລັດຫລາຍດ້ານເປັນຕົ້ນຫລັກການຄວາມເດັດຂາດ, ລັດຖະບານ ໄດ້ຕັດສິນໃຈຈັດຕັ້ງປະຕິບັດບັນດາ ໂຄງການທົດລອງຂຸດຄົ້ນແຮ່ທາດ, ໂຄງການທົດລອງຂຸດຄົ້ນ ແລະ ແລກປ່ຽນຊື້-ຂາຍເງິນຄິບໂຕຣ ແລະ ປະຕິຮູບວິທີການເກັບລາຍຮັບທີ່ຮົ່ວໄຫລຈຳນວນໜຶ່ງ ສ້າງເງື່ອນໄຂໃຫ້ແກ່ການມອບພັນທະງົບປະມານ ເພີ່ມຂຶ້ນຈຳນວນໜຶ່ງ. ພ້ອມນັ້ນ, ຍັງເດັດຂາດຈຳກັດລາຍຈ່າຍງົບປະມານບໍລິຫານທີ່ບໍ່ຈໍາເປັນ ແລະ ຟຸມເຟືອຍລວມທັງໄດ້ປັບປຸງການຄຸ້ມຄອງລົດຂອງລັດຕາມທິດປະຢັດ, ເດັດຂາດແກ້ໄຂບັນຫາຕິດພັນກັບການ ຄຸ້ມຄອງເງິນຕາຕ່າງປະເທດ ໂດຍສະເພາະຕັດສິນໃຈຈໍາກັດບັນດາຮ້ານແລກປ່ຽນໃຫ້ຄ່ອຍໆໝົດໄປ ແລະ ຫັນໄປສູ່ຮ້ານແລກປ່ຽນຕົວແທນ, ໜ່ວຍບໍລິການ (ປ່ອງບໍລິການ) ຂອງທະນາຄານທຸລະກິດ, ສຸມໃສ່ປະຕິຮູບລັດວິສາຫະກິດ ແລະ ທະນາຄານທຸລະກິດລັດທີ່ດຳເນີນທຸລະກິດບໍ່ມີປະສິດທິຜົນກ້າວໄປສູ່ຮູບແບບໃໝ່ທີ່ບໍ່ສ້າງໜີ້ສິນໃຫ້ລັດຖະບານ; ຕັດສິນໃຈປັບປຸງກົນໄກການອະນຸມັດການລົງທຶນເປັນຕົ້ນການປັບປຸງຮູບແບບການອະນຸມັດການລົງທຶນໃໝ່ ພ້ອມເດັດຂາດຫລຸດຈຳນວນກົງຈັກລັດ ແລະ ຈໍາກັດໂຄຕ້າພະນັກງານໃໝ່ ຕາມທິດກະທັດຮັດ ແລະ ປະຢັດ.

ສຳລັບຫລັກການຄວາມໂປ່ງໃສ, ລັດຖະບານ ໄດ້ເປີດໂອກາດຮັບຟັງຄຳຄິດຄຳເຫັນຈາກພາກສ່ວນຕ່າງໆ ຕໍ່ການຈັດຕັ້ງຜັນຂະຫຍາຍວາລະແຫ່ງຊາດໃນໄລຍະຜ່ານມາ ເພື່ອເປັນຂໍ້ມູນປັບປຸງບັນດາວຽກຈຸດສຸມຂອງວາລະແຫ່ງຊາດໃຫ້ໄປຕາມແຜນການ. ພ້ອມນັ້ນ, ໂຄງການຕ່າງໆທີ່ສຳຄັນກໍໄດ້ແຕ່ງຕັ້ງຄະນະສະເພາະກິດເພື່ອຄັດເລືອກເອົາບໍລິສັດທີ່ມີມາດຖານເງື່ອນໄຂ ເຂົ້າມາດຳເນີນການລວມທັງມີການປະມູນຕາມມາດ ຖານເງື່ອນໄຂແຕ່ລະໂຄງການທີ່ໄດ້ກໍານົດໄວ້ພ້ອມທັງໄດ້ພະຍາຍາມຫັນເປັນທັນສະໄໝຄຸ້ມຄອງການເກັບລາຍຮັບ ແລະ ລາຍຈ່າຍງົບປະມານໂດຍໄດ້ຂະຫຍາຍການນໍາໃຊ້ເຄື່ອງມືທັນສະໄໝລະບົບແຈ້ງອາກອນ (TaxRis) ແລະ ພາສີ (ASYCUDA) ແລະ ການນໍາໃຊ້ລະບົບຊຳລະລາຍຮັບຜ່ານລະບົບທະນາຄານຫລາຍຂຶ້ນ. ພ້ອມໄດ້ຊຸກຍູ້ແຕ່ລະພາກສ່ວນທີ່ຕິດພັນການຄຸ້ມຄອງຖານລາຍຮັບເຊື່ອມໂຍງຂໍ້ມູນເພື່ອຂະຫຍາຍຖານລາຍຮັບທີ່ມີທ່າແຮງ ແລະ ໝັ້ນຄົງເປັນຕົ້ນທີ່ດິນ, ຊັບສິນລັດ ແລະ ຫົວໜ່ວຍແຮງງານ.ສ່ວນດ້ານຫລັກການຄວາມເປັນມືອາຊີບ, ໄດ້ອອກມະຕິ 07/ລບ ວ່າດ້ວຍການແບ່ງຄວາມຮັບຜິດຊອບຈັດຕັ້ງຜັນຂະຫຍາຍມະຕິຂອງສະພາແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ຈັດຕັ້ງປະຕິບັດຄຳສັ່ງ01/ກມສພ, ມະຕິ03/ສພຊ ເພື່ອຊຸກຍູ້ຂະແໜງການທັງຂັ້ນສູນກາງ ແລະ ທ້ອງຖິ່ນປະຕິບັດວຽກຈຸດສຸມຂອງຕົນ ພ້ອມທັງກໍານົດມາດຖານເງື່ອນໄຂຕ່າງໆຈັດຕັ້ງປະຕິບັດແຕ່ລະໂຄງ ການ. ນອກນີ້, ຍັງໄດ້ຍາດແຍ່ງຄວາມຄິດເຫັນຂອງຜູ້ປະກອບການລວມທັງຈາກຊ່ຽວຊານຂອງເພື່ອນມິດຕ່າງໆເພື່ອປະກອບສ່ວນແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃນຮູບການຕ່າງໆທີ່ເໝາະສົມ ແລະ ໄດ້ປັບປຸງ, ສັບຊ້ອນພະນັກງານແຕ່ລະລະດັບທີ່ມີຄວາມຮູ້ຄວາມສາມາດເຂົ້າສູ່ຕຳແໜ່ງທີ່ສຳຄັນແຕ່ລະຂະແໜງການຕົ້ນຕໍ ທີ່ຮັບຜິດຊອບວຽກງານຈຸດສຸມຂອງວາລະແຫ່ງຊາດ.