ການສ້າງລະບົບການເມືອງຢູ່ລາວ ຕາມແນວຄິດຊີ້ນຳຂອງປະທານ ໄກສອນ ພົມວິຫານ

ເພື່ອນຳພາການກໍ່ສ້າງສັງຄົມນິຍົມຢູ່ລາວໃຫ້ສຳເລັດຜົນ, ບັນຫາຕົ້ນຕໍ ແລະ ຕັດສິນແມ່ນການກໍ່ສ້າງພັກ ປະຊາຊົນປະຕິວັດລາວ ເພາະນີ້ເປັນປັດໄຈສຳຄັນອັນດັບໜຶ່ງຂອງທຸກໄຊຊະນະແຫ່ງການປະຕິວັດລາວນັບແຕ່ອະດີດເຖິງປັດຈຸບັນ ແລະ ເພື່ອສືບຕໍ່ໄປໃນອະນາຄົດ.

ປະທານ ໄກສອນ ພົມວິຫານ ເນັ້ນວ່າ: “ການກໍ່ສ້າງພັກໃຫ້ເຕີບໃຫຍ່ເຂັ້ມແຂງສົມບູນກັບໜ້າທີ່, ຮັບປະກັນໃຫ້ພັກປອດໃສ, ໜັກແໜ້ນເຂັ້ມແຂງ, ມີຄວາມສາມາດພຽງພໍຊີ້ນໍາ-ນໍາພາ ແລະ ຈັດຕັ້ງປະຕິບັດບັນ ດາແນວທາງການປະຕິວັດສັງຄົມນິຍົມ, ປະຕິບັດພາລະກິດປ່ຽນແປງໃໝ່ຮອບດ້ານ ແລະ ມີຫລັກການຢູ່ລາວໃຫ້ສຳເລັດຜົນ”. ແຕ່ມື້ສ້າງຕັ້ງພັກ 22 ມີນາ 1955 ເປັນຕົ້ນມາ ແລະ ໄລຍະຜ່ານມາ, ປະທານ ໄກສອນ ພົມວິຫານ ໄດ້ເອົາໃຈໃສ່ເປັນປະຈຳຕໍ່ການກໍ່ສ້າງພັກ, ເອົາໃຈໃສ່ສຶກສາອົບຮົມພະນັກງານ, ສະມາຊິກພັກ, ຍົກສູງຄຸນນະພາບການນຳພາຂອງພັກ ແລະ ກຳລັງສູ້ຮົບຂອງບັນດາອົງການຈັດຕັ້ງພັກພ້ອມຮັດແໜ້ນສາຍພົວພັນອັນສະໜິດແໜ້ນລະຫວ່າງພັກກັບມະຫາຊົນ. ເມື່ອຄົ້ນຄວ້າບັນດາບົດນິພົນຂອງປະທານໄກສອນ ພົມວິຫານ ພວກເຮົາຈຶ່ງເຫັນແຈ້ງລະບົບທັດສະນະທິດສະດີທີ່ສຳຄັນ ແລະ ແຫລມຄົມຂອງເພິ່ນພິເສດແມ່ນບັນດາແນວຄິດການປ່ຽນແປງໃໝ່ໂດຍສະເພາະການປ່ຽນແປງໃໝ່ ແລະ ການປົວແປງພັກຈົນເຖິງປັດຈຸບັນຍັງຄົງມີຊີວິດຊີວາໄປຕາມເວລາຄືຍົກສູງລະດັບແນວຄິດ-ທິດສະດີຂອງພັກຢ່າງບໍ່ຢຸດຢັ້ງ, ຈົງຮັກພັກດີ ແລະ ໝູນໃຊ້ຢ່າງມີຫົວຄິດປະດິດສ້າງລັດທິມາກ-ເລນິນເຂົ້າໃນສະພາບຕົວຈິງຂອງການປະຕິວັດລາວ.

ຄວາມສາມາດການນຳພາຂອງພັກ, ກ່ອນອື່ນໝົດ ແມ່ນຄວາມສາມາດການກຳແໜ້ນທິດສະດີກ້າວໜ້າ, ສະຫລຸບພຶດຕິກຳເພື່ອຂະຫຍາຍທິດສະດີ. ປົກປັກຮັກສາ ແລະ ເສີມຂະຫຍາຍທາດແທ້ຂອງຊົນຊັ້ນກຳມະກອນຂອງພັກ, ພິເສດໃນສະພາບແວດລ້ອມຂອງພັກປະຊາຊົນ ປະຕິວັດລາວ ທີ່ສະມາຊິກພັກສ່ວນຫລາຍກຳເນີດມາຈາກຊາວນາ, ຊົນຊັ້ນກຳມະກອນ ທີ່ຍັງອ່ອນນ້ອຍດ້ານປະລິມານ ແລະ ຍັງບໍ່ທັນໄດ້ຮັບການພັດທະນາຢ່າງຄົບຖ້ວນທາດແທ້ຂອງຊົນຊັ້ນກຳມະກອນອຸດສາຫະກຳ. ເອົາໃຈໃສ່ເປັນພິເສດຕໍ່ການສຶກສາອົບຮົມແນວຄິດ-ການເມືອງພາຍໃນພັກ, ຝຶກຝົນຫລໍ່ຫລອມຄຸນສົມບັດສິນທຳປະຕິວັດຖັນແຖວພະນັກງານ, ສະມາຊິກພັກ ໂດຍສະເພາະເງື່ອນໄຂພັກກຳອຳນາດນຳພາການປົກຄອງ. ເສີມຂະຫຍາຍການຮັກສາຫລັກການລວມສູນປະຊາທິປະໄຕ ໃຫ້ໝັ້ນຄົງ, ປັບປຸງກຳລັງແຮງແຫ່ງຄວາມສາມັກຄີພາຍໃນພັກ, ເພີ່ມທະວີກຳລັງແຮງສູ້ຮົບຂອງພັກ. ປັບປຸງ ແລະ ເສີມຂະຫຍາຍສາຍພົວພັນລະຫວ່າງພັກ-ມະຫາຊົນ, ຕໍ່ສູ້ຕ້ານພະຍາດອາດຍາສິດ, ຕ້ານການຟຸມເຟືອຍ, ການສໍ້ລາດບັງຫລວງ, ແຍກພັກແບ່ງພວກ, ເຫັນ ແຕ່ສິດຜົນປະໂຫຍດສ່ວນຕົວ ແລະ ຈຸ້ມເຈື້ອເຊື້ອສາຍຂອງຕົນເອງເປັນຈຸດຢືນ, ຮັບປະກັນຍົກສູງບົດບາດອິດທິພົນ ແລະ ຜົນສະທ້ອນອັນດີງາມຂອງພັກໃນໝູ່ມະຫາຊົນຢ່າງບໍ່ຢຸດຢັ້ງ. ສາມັກຄີພາຍໃນພັກ ເພື່ອຊຸກຍູ້ຄວາມສາມັກຄີທົ່ວປວງຊົນ, ສາມັກຄີທຸກຊົນຊາດຊົນເຜົ່າ, ເສີມຂະຫຍາຍກຳລັງແຮງຂອງຊາດກັບກຳລັງແຮງຂອງຍຸກສະໄໝ, ລັດທິຮັກຊາດ ຕິດພັນກັບລັດທິສາກົນທີ່ແທ້ຈິງ. ກໍ່ສ້າງ, ບຳລຸງພະນັກງານ, ຮັບປະກັນຄຸນນະພາບໃນຖັນແຖວພະນັກງານຂອງພັກ, ອຳນາດການປົກຄອງ, ອົງການຈັດຕັ້ງມະຫາຊົນເພື່ອມີຄວາມສາມາດພຽງພໍປະຕິບັດສຳເລັດພາລະກຳປະຫວັດສາດຂອງພັກ, ໜ້າທີ່ຄວາມຮັບຜິດຊອບຂອງພັກທີ່ມີຕໍ່ປະຊາຊົນ ແລະ ສັງຄົມ.

ປະທານ ໄກສອນ ພົມວິຫານ ເປັນຜູ້ລິເລີ່ມການປ່ຽນແປງໃໝ່ຢູ່ລາວທັງເປັນບາດລ້ຽວແຫ່ງທິດສະດີການປ່ຽນແປງໃໝ່. ກ່ອນອື່ນໝົດ ແມ່ນການປ່ຽນແປງໃໝ່ດ້ານຈິນຕະນາການ, ປ່ຽນແປງໃໝ່ທີ່ຕິດພັນກັບການເປີດປະຕູບົນພື້ນຖານຄວາມສະຫງົບ ແລະ ມີສະຖຽນລະພາບ ຊຶ່ງໄດ້ເອົາໃຈໃສ່ 2 ຂົງເຂດຕົ້ນຕໍເຊັ່ນເສດຖະກິດ ແລະ ການເມືອງ. ຈາກການວາງ 6 ຫລັກການຂອງການປ່ຽນແປງໃໝ່ຕາມທິດສັງຄົມນິຍົມ ຊຶ່ງນີ້ແມ່ນການອຸທິດທິດສະດີທີ່ສຳຄັນເປັນພິເສດຂອງເພິ່ນ ສຳລັບປະເທດລາວ. ຂະນະດຽວກັນເພິ່ນຍັງໄດ້ເອົາ ໃຈໃສ່ເປັນພິເສດປັບປຸງ-ດັດແກ້ລະບອບລະບຽບການຕໍ່ການສ້າງລັດແຫ່ງອໍານາດກົດໝາຍ ແລະປ່ຽນແປງ ໃໝ່ລະບົບການເມືອງ. ພາຍຫລັງກອງປະຊຸມໃຫຍ່ຄັ້ງທີ V ຂອງພັກ (1991), ປະເທດລາວເຮົາໄດ້ມີລັດຖະທຳມະນູນສະບັບທຳອິດ ແລະ ເພິ່ນໄດ້ຮັບເລືອກຕັ້ງເປັນປະທານປະເທດ ຊຶ່ງເປັນບາດລ້ຽວການຄຸ້ມຄອງລັດ, ກໍ່ສ້າງລະບົບການເມືອງຢູ່ປະເທດລາວ ໂດຍເພິ່ນໄດ້ປະກອບສ່ວນສຳຄັນກໍ່ສ້າງລັດແຫ່ງອຳ ນາດກົດໝາຍ, ສ້າງພື້ນຖານປະຊາທິປະໄຕ ສັງຄົມນິຍົມ ຢູ່ປະເທດລາວ, ປ່ຽນແປງໃໝ່ລະບົບການເມືອງເພື່ອຮັບປະກັນໃຫ້ສິດອຳນາດຂອງປະຊາຊົນໄດ້ຮັບການປະຕິບັດ.

ພຶດຕິກຳແຫ່ງການຂະຫຍາຍຕົວຂອງການປະຕິວັດລາວໃນເຄິ່ງສະຕະວັດຜ່ານມາ, ບັນດາຜົນສຳເລັດທີ່ຍິ່ງໃຫຍ່ຂອງພັກ ແລະ ປະຊາຊົນລາວບັນດາເຜົ່າທົ່ວທັງຊາດໃນຫລາຍປີແຫ່ງການປ່ຽນແປງໃໝ່ໄດ້ສະ ແດງເຖິງການນຳພາຢ່າງຖືກຕ້ອງ, ສະຫລາດສ່ອງໃສຂອງພັກ, ພະລັງແຫ່ງຫົວຄິດປະດິດສ້າງຂອງປະຊາຊົນ, ທ່າແຮງບົ່ມຊ້ອນທີ່ໃຫຍ່ຫລວງ ແລະ ຄວາມຫວັງອັນສົດໃສຂອງຊາດລາວບົນເສັ້ນທາງກ້າວຂຶ້ນສັງຄົມນິຍົມ, ກໍ່ສ້າງປະເທດລາວຮັ່ງມີ, ສີວິໄລ ແລະ ສົມບູນພູນສຸກ, ເປັນການຢັ້ງຢືນເຖິງການອຸທິດທີ່ເປັນປະຫວັດສາດລ້ຳຄ່າຂອງປະທານ ໄກສອນ ພົມວິຫານ ນັກແນວຄິດ-ທິດສະດີທີ່ດີເດັ່ນຂອງພັກ, ເປັນຜູ້ນຳການປະຕິວັດ ແລະ ປະຊາຊົນລາວ, ເປັນເພື່ອນມິດຜູ້ຍິ່ງໃຫຍ່ ແລະ ສະໜິດສະໜົມທີ່ສຸດຂອງປະຊາຊົນ ໃນວົງຄະນະຍາດແຫ່ງສັງຄົມນິຍົມສາກົນ.