ຜົນງານ 11 ເດືອນ ປະຕິບັດວາລະແຫ່ງຊາດ ຂອງ ປກສ ທົ່ວປະເທດ ສາມາດມ້າງຄະດີຢາເສບຕິດ ໄດ້ 4 ພັນກວ່າຄະດີ ຢຶດຢາບ້າໄດ້ 139 ລ້ານກວ່າເມັດ
ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ລາຍງານຕໍ່ກອງປະຊຸມສະໄໝສາມັນ ເທື່ອທີ່ 4 ຂອງສະພາແຫ່ງຊາດ ຊຸດທີ lX ວັນທີ 8 ທັນວາ 2022, ຕໍ່ກອງປະຊຸມວ່າ: ໄລຍະເດືອນມັງກອນ ຫາ ເດືອນພະຈິກ 2022 ທົ່ວປະເທດສາມາດແກ້ໄຂມ້າງລາຍຄະດີຢາເສບຕິດ ໄດ້ 4.707 ຄະດີ, ຈັບຜູ້ຖືກຫາໄດ້ 6.873 ຄົນ ຍິງ 795 ຄົນ ໃນນີ້ມີຄົນຕ່າງປະເທດ 135 ຄົນ ຍິງ 11 ຄົນ, ຢຶດຢາບ້າໄດ້ 139.587.060 ເມັດ, ຢາບ້າເປັນຝຸ່ນ 7,52 ກິໂລກຣາມ ນໍ້າໜັກລວມ 13.966,22 ກິໂລກຣາມ, ຢາໄອສ໌ 2.199,9 ກິໂລກຣາມ, ເຮໂຣອິນ 175,77 ກິໂລກຣາມ, ຄັນຊາ 10.284,27 ກິໂລກຣາມ, ຢາຝິ່ນ 250,36 ກິໂລກຣາມ, ຢາອີ 2.605 ເມັດ, ໂຄເຄນ 3 ກິໂລກຣາມ, ແປ້ງຝຸ່ນປະສົມຢາເສບຕິດ 11.576,76 ກິໂລກຣາມ, ເຄຕາມິນ 1.930,28 ກິໂລກຣາມ, ຄາເຟອິນ 168 ກຣາມ, ນໍ້າຢາສານເຄມີ 849 ກຣາມ ແລະ ນໍ້າກົດ 9.400 ລິດ, ຢຶດລົດໃຫຍ່ 162 ຄັນ, ລົດຈັກ 734 ຄັນ, ເຮືອ 1 ລຳ.
ສົກປີ 2021-2022 ຢູ່ 8 ແຂວງພາກເໜືອ ກວດພົບເຫັນສວນຝິ່ນ 2.000 ກວ່າຕອນ ແລະ ໄດ້ລົງທໍາລາຍຖິ້ມ ຈໍານວນ 617 ເຮັກຕາ ແລະ ສັງລວມສະຖິຕິຜູ້ຕິດຢາເສບຕິດເຂົ້າປິ່ນປົວຢູ່ສູນບຳບັດປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ 13 ແຫ່ງ ມີທັງໝົດ 3.802 ຄົນ ຍິງ 106 ຄົນ, ໃນນັ້ນມີຜູ້ທີ່ປິ່ນປົວດີແລ້ວກັບຄືນບ້ານມີທັງໝົດ 1.222 ຄົນ ຍິງ 32 ຄົນ, ຍັງສືບຕໍ່ປິ່ນປົວ 2.580 ຄົນ ຍິງ 74 ຄົນ.
