5 ປີຜ່ານມາ ແຂວງສະຫວັນນະເຂດ ສາມາດລຶບລ້າງຄວາມທຸກຍາກໄດ້ແລ້ວ 133.445 ຄອບຄົວ
ວັນທີ 5 ທັນວາ 2022, ແຂວງສະຫວັນນະເຂດ ໄດ້ຈັດກອງປະຊຸມສະຫລຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ແກ້ໄຂຄວາມທຸກ ແລະ ວຽກງານສາມສ້າງໄລຍະ ປີ 2016-2021 ແລະ ທິດທາງ ຮອດປີ 2025. ໂດຍການເຂົ້າຮ່ວມ ຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີຄະນະການນຳຂອງແຂວງ ພ້ອມພະນັກງານຫລັກແຫລ່ງເມືອງ, ພະແນກການ, ປກຊ-ປກສ ແລະ ຂະແໜງການກ່ຽວຂ້ອງ.
ຈາກບົດລາຍງານໃນກອງປະຊຸມຊີ້ໃຫ້ເຫັນວ່າ: ຮອດປີ 2021 ທົ່ວແຂວງມີຄອບຄົວພົ້ນທຸກຕາມມາດຖານດຳລັດ 348/ລບ ຈຳນວນ 132.817 ຄອບຄົວ, ກວມ 75,25%, ໃນນັ້ນກາຍເປັນຄອບຄົວພັດທະນາແລ້ວ 91.454 ຄອບຄົວ, ກວມ 51,81% ຂອງຄອບຄົວ ທັງໝົດທົ່ວແຂວງ, ບ້ານພົ້ນທຸກຍາກມີ 673 ບ້ານ, ກວມ 65,66%. ໃນນັ້ນກາຍເປັນບ້ານພັດທະນາແລ້ວ 85 ບ້ານ, ກວມ 8,29% ຂອງຈຳນວນບ້ານໃນທົ່ວແຂວງ. ຮອດເດືອນ 9 ປີ 2022 ທົ່ວແຂວງ ມີຄອບຄົວພົ້ນທຸກແລ້ວ 133.445 ຄອບຄົວ, ກາຍເປັນຄອບຄົວພັດທະນາແລ້ວ 91.986 ຄອບຄົວ, ບ້ານພົ້ນທຸກໄດ້ 688 ບ້ານ, ກາຍເປັນບ້ານພັດທະນາແລ້ວ 88 ບ້ານ ແລະ ມີເມືອງພົ້ນທຸກ 5 ເມືອງ 1 ນະຄອນຄື: ນະຄອນໄກສອນພົມວິຫານ, ເມືອງໄຊບູລີ, ໄຊພູທອງ, ສອງຄອນ, ຈຳພອນ ແລະ ເມືອງອຸທຸມພອນ.
