ຜູ້ວ່າການທະນາຄານແຫ່ງ ສປປ ລາວ ຕອບຄຳຊັກຖາມຂອງ ສສຊ ຕໍ່ການໃຊ້ເງິນຕາຕ່າງປະເທດໃນການຈ່າຍຢູ່ທ້ອງຕະຫລາດ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ວັນທີ 7 ທັນວານີ້, ທ່ານນາງ ຂັນກາບ ໄຊຍະກຸມມານ ສະມາຊິກສະພາແຫ່ງຊາດເຂດເລືອກຕັ້ງທີ 18 ໄດ້ຊັກຖາມຜູ້ວ່າທະນາຄານແຫ່ງ ສປປ ລາວ ຫລັງລາຍງານການຈັດຕັ້ງປະຕິບັດແຜນເງິນຕາ ປີ 2022 ແລະ ແຜນເງິນຕາປະຈຳປີ 2023 ວ່າ: ອີກດົນປານໃດ, ລາວເຮົາຈະມີນິຕິກຳໃຕ້ກົດໝາຍເພື່ອນຳໃຊ້ຄຸ້ມຄອງການໃຊ້ເງິນຕາຕ່າງປະເທດໃນການໃຊ້ຈ່າຍຢູ່ທ້ອງຕະຫລາດ ເພາະປັດຈຸບັນເວລາໄປຕະຫລາດເຂົາເຈົ້າຈະບໍ່ເວົ້າເປັນເງິນກີບ ເຂົາເຈົ້າຈະເວົ້າເປັນເງິນໂດລາ ຫລື ເງິນບາດ. ຂະນະທີ່ເອົາເງິນກີບໃຫ້ພັດໄລ່ຕາມອັດຕາແລກປ່ຽນທະນາຄານ ຖ້າມີນິຕິກຳໃຕ້ກົດໝາຍໂຕນີ້ນຳໄປຄຸ້ມຄອງຈະດີບໍ່? ຖ້າດີ ຈະໄວບໍ່? ຖ້າໄວແລ້ວ ຈະດີກວ່າບໍ່?

ຕໍ່ການຊັກຖາມດັ່ງກ່າວ, ທ່ານ ບຸນເຫລືອ ສິນໄຊວໍລະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຊີ້ແຈງວ່າ: ຫລັງຈາກໄດ້ດັດສົມຮ້ານແລກປ່ຽນເງິນຕາໃຫ້ຫລຸດໜ້ອຍລົງ ຫລື ບໍ່ມີຢູ່ບາງແຂວງ, ແຕ່ບັນຫາຂອງມັນ ມີຮ້ານຄ້າຂາຍທົ່ວໄປຫັນເປັນຮ້ານແລກປ່ຽນໂດຍອັດຕະໂນມັດ ແລະ ແລກປ່ຽນຊື້ຂາຍກັນເອງ ໂດຍຈຸດນີ້ສຳຄັນທີ່ສຸດທີ່ທະນາຄານ ແຫ່ງ ສປປ ລາວ ພວມຮີບຮ້ອນເອົາໃຈໃສ່ຄຸ້ມຄອງ ແລະ ໄດ້ເລີ່ມຮ່າງນິຕິກຳໃຕ້ກົດໝາຍແຕ່ເດືອນທັນວາ 2022 ແລະ ຄາດວ່າຈະສາມາດນຳໃຊ້ໄດ້ໃນເດືອນມັງກອນ 2023 .  ດັ່ງນັ້ນຖ້າໄດ້ເລີ່ມຈັດຕັ້ງປະຕິບັດ ໃຫ້ບັນດາຂະແໜງການກ່ຽວຂ້ອງປະຕິບັດນຳກັນຢ່າງເຂັ້ມງວດ ເພື່ອຄຸ້ມຄອງ-ຍູ້ດັນ ແລະ ຫລຸດຜ່ອນອັດຕາເງິນເຟີ້ ໃຫ້ເງິນກີບແຂງຄ່າ.