ໂມຣິຢາສຶ ຊີ້ວົງການບານເຕະຍີ່ປຸ່ນພວມກ້າວເຂົ້າສູ່ຍຸກໃຫມ່
ຮາຈິເມະ ໂມຣິຢາສຶ ຜູ້ຈັດການທີມຍີ່ປຸ່ນ ຊີ້ວ່າວົງການບານເຕະຍີ່ປຸ່ນພວມກ້າວເຂົ້າສູ່ຍຸກໃຫມ່ທີ່ສົດໃສກວ່າເກ່ົາ ເຖິງວ່າທີມຊາມູໄຣສີຟ້າ ຈະຈອດປ້າຍ ພຽງຮອບ 16 ທີມສຸດທ້າຍ ບານໂລກ 2022 ກໍຕາມ.
ຮາຈິເມະ ໂມຣິຢາສຶ ຜູ້ຈັດການທີມຊາດຍີ່ປຸ່ນ ອອກມາໃຫ້ສຳພາດວ່າ ວົງການບານເຕະຍີ່ປຸ່ນພວມກ້າວເຂົ້າສູ່ຍຸກໃຫມ່ທີ່ສົດໃສກວ່າເກ່ົາ ເຖິງວ່າທີມຊາດ ຍີ່ປຸ່ນ ຈະພາດທ່າເສຍລູກໂທດໃຫ້ ໂຄຣເອເຊຍ 1-3 ຫລັງສະເຫມີກັນໃນເວລາ 120 ນາທີ 1-1 ຈອດປ້າຍພຽງຮອບ 16 ທີມສຸດທ້າຍບານໂລກ 2022 ເມື່ອວັນສຸກທີ່ຜ່ານມາກໍຕາມ.
ໂມຣິຢາສຶ ເບິ່ງວ່າ ເຖິງວ່າ ຍີ່ປຸ່ນ ຈະຍັງບໍ່ສາມາດໄປໄດ້ໄກເກີນກວ່າຮອບ 16 ທີມສຸດທ້າຍ ແຕ່ການທີ່ເອົາຊະນະ 2 ແຊ໊ມໂລກຢ່າງ ເຢຍລະມັນ ແລະ ສະເປນ ກ່ອນຈະຜ່ານຮອບທຳອິດມາໄດ້ໃນຖານະແຊ໊ມກຸ່ມ E ນັບເປັນສັນຍາທີ່ດີທີ່ບົ່ງບອກວ່າ ວົງການບານເຕະເມືອງປາດິບພວມກ້າວເຂົ້າສູ່ຍຸກໃຫມ່ແລ້ວ.
ໂມຣິຢາສຶ ກ່າວວ່າ : “ ເຖິງເຮົາຈະບໍ່ໄດ້ຜົນການແຂ່ງຂັນຢ່າງທີ່ຕ້ອງການ ແຕ່ຂ້ອຍກໍບອກກັບລູກທີມໄປວ່າ ມັນບໍ່ໄດ້ລົບລ້າງທຸກຢ່າງທີ່ເຮົາເຮັດກັນມາ ເຮົາຍັງບໍ່ສາມາດຝ່າຮອບ 16 ທີມສຸດທ້າຍໄປໄດ້ ແຕ່ທີມຊາດຍີ່ປຸ່ນກໍຊະນະແຊ໊ມໂລກຢ່າງ ເຢຍລະມັນ ແລະ ສະເປນ ”.
“ ນັກເຕະຊຸດນີ້ສະແດງໃຫ້ເຫັນເຖິງຍຸກໃຫມ່ຂອງວົງການບານເຕະຍີ່ປຸ່ນ ແລະ ພວກເຂົາຄວນຈະໃຊ້ຄວາມຜິດຫວັງຄັ້ງນີ້ເປັນພະລັງໃນການ ເອົາຊະນະໃຫ້ໄດ້ໃນຄັ້ງຕໍ່ໄປ ນັກເຕະຂອງເຮົາສາມາດຫມັ້ນໃຈໄດ້ວ່າພວກເຂົາສາມາດລົງຫລິ້ນໃນເວທີລະດັບໂລກໄດ້ ”.
“ ພວກເຂົາສະແດງໃຫ້ເຫັນແລ້ວວ່າ ສາມາດຫລິ້ນໄດ້ດີພຽງໃດໃນລາຍການໃຫຍ່ຢ່າງບານເຕະໂລກ ຂ້ອຍຫວັງວ່າ ພວກເຂົາຈະເຮັດໄດ້ດີແບບນີ້ຕໍ່ໄປ ແລະ ຂ້ອຍກໍຄິດວ່າ ວົງການບານເຕະຍີ່ປຸ່ນຍັງສາມາດເຕີບໃຫຍ່ໄດ້ຕໍ່ໄປເລື້ອຍໆ ” ຜູ້ຈັດການທີມຊາດຍີ່ປຸ່ນ ກ່າວປິດທ້າຍ.
