ຢືນຢັນແລ້ວ Apple ຈະເປີດໂຕ iPhone 8 ໃນວັນທີ 12 ກັນຍານີ້
ໃນວັນທີ 29 ສິງຫານີ້ ທາງ Apple ໄດ້ປະກາດອອມາແລ້ວວ່າຈະເປີດໂຕ iPhone 8 ໃນວັນທີ 12 ກັນຍາຈະເຖິງນີ້.
ຈາກລາຍງານທີ່ໜ້າເຊື່ອຖື ເຮັດໃຫ້ຮູ້ວ່າງານຄັ້ງນີ້ທາງ Apple ຈະເປີດໂຕ iPhone ຮຸ່ນໃຫມ່ດ້ວຍກັນ 3 ຮຸ່ນຄື: iPhone 7s, 7s Plus ເຊິ່ງເປັນຮຸ່ນປັບປຸງຈາກ iPhone 7, 7 Plus ໃນປັດຈຸບັນທີ່ຈະປ່ຽນໃນແງ່ຂອງສະເປັກພາຍໃນໃຫ້ຊົງພະລັງຫຼາຍຂຶ້ນດ້ວຍ CPU ໂຕໃຫມ່ ແລະ ການປັບສ່ວນຂອງຮູບແບບພາຍນອກໃຫ້ເປັນແບບຄືແວ່ນ ເພື່ອໃຫ້ຮອງຮັບລະບົບການສາກໄຮ້ສາຍໄດ້ ສ່ວນສະເປັກອື່ນໆນັ້ນຈະເປັນແນວໃດຕ້ອງລໍຕິດຕາມ.
iPhone 8 ຊື່ຫຼິ້ນທີ່ເອີ້ນກັນຈົນຕິດປາກ ແຕ່ຍັງບໍ່ແມ່ນຊື່ທາງການ ທີ່ທາງ Apple ຈະປະກາດ, ຮຸ່ນນີ້ຈະເປັນຮຸ່ນພິເສດສໍາລັບການສະເຫລີມສະຫລອງຄົບຮອບ 10 ປີຂອງ iPhone ທີ່ຮຸ່ນທໍາອິດນັ້ນຜະລິດໃນປີ 2007. ດັ່ງນັ້ນ ຮຸ່ນນີ້ຈຶ່ງຈະມີຄວາມພິເສດທີ່ສຸດແນ່ນອນ ແລະ ລາຄາກໍຈະພິເສດເຊັ່ນກັນ ເຊິ່ງຊື່ທີ່ເປັນໄປໄດ້ທີ່ Apple ຈະເອີ້ນ iPhone ຮຸ່ນນີ້ໄດ້ແກ່ iPhone Edition, iPhone X ຫຼື iPhone Pro.
ຈຸດເດັ່ນຂອງ iPhone 8 ນັ້ນຈະຢູ່ທີ່ກ້ອງຫຼັງແນວຕັ້ງ, ລະບົບສາກໄຮ້ສາຍ, ລະບົບການສະແກນໃບໜ້າ (Facial Scan) ແບບ 3 ມິຕິດ້ວຍແສງອິນຟຣາເຣດເພື່ອປົດລັອກ ໂດຍຈະມາແທນທີ່ລະບົບສະແກນນິ້ວ Touch ID, ແບັດເຕີຣີທີ່ໃຫຍ່ຂຶ້ນຮູບຊົງຕົວ L ແລະ ຮອງຮັບເຕັກໂນໂລຊີສາກໄວຍິ່ງຂຶ້ນ.
