ໄອຍະການ ແຂວງສະຫວັນນະເຂດ ແລະ ພະແນກກະສິກຳ-ປ່າໄມ້ ແຂວງ ລົງນາມຮ່ວມມືດ້ານການດຳເນີນຄະດີອາຍາຕໍ່ຜູ້ລະເມີດກົດໝາຍ

ພິທີລົງນາມເຊັນບົດບັນທຶກຮ່ວມມືລະຫວ່າງ ອົງການໄອຍະການແຂວງສະຫວັນນະເຂດ ແລະ ພະແນກກະສິກຳ ແລະ ປ່າໄມ້ ແຂວງ ໄດ້ມີຂຶ້ນໃນວັນທີ 25 ພະຈິກ 2022 ຜ່ານມາ ທີ່ຫ້ອງປະຊຸມອົງການໄອຍະການ ປະຊາຊົນແຂວງ, ໂດຍເຂົ້າຮ່ວມຂອງທ່ານ ນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ມີຕາງໜ້າຈາກ ພາກ ສ່ວນທີ່ກ່ຽວຂ້ອງເຂົ້າຮ່ວມ.

ການລົງນາມຄັ້ງນີ້, ເພື່ອເຮັດໃຫ້ການຈັດຕັ້ງການປະຕິບັດກົດໝາຍວ່າດ້ວຍການດຳເນີນຄະດີອາຍາ ແລະ ກົດໝາຍວ່າດ້ວຍປ່າໄມ້ ແລະ ກົດໝາຍວ່າດ້ວຍສັດນ້ຳ-ສັດປ່າເຂົ້າສູ່ການຈັດຕັ້ງປະຕິບັດຕົວຈິງຂອງອົງການໄອຍະການປະຊາຊົນແຂວງ ແລະ ອົງການສືບສວນສອບສວນຂອງເຈົ້າໜ້າທີ່ປ່າໄມ້ ແລະ ກົດໝາຍວ່າດ້ວຍສັດນ້ຳ-ສັດປ່າ, ເຄົາລົບ ແລະ ປະຕິບັດຕາມພາລະບົດບາດ, ໜ້າທີ່, ຂອບເຂດສິດຂອງແຕ່ລະພາກສ່ວນທີ່ກຳນົດໄວ້ໃນກົດໝາຍ ແລະ ນິຕິກຳລຸ່ມກົດໝາຍ ພ້ອມທັງຮັບປະກັນຄວາມສັກສິດຂອງກົດໝາຍ, ປະຕິບັດຕາມ ຫລັກການລວມສູນ ພ້ອມທັງເປັນເອກະພາບຕາມລະບົບສາຍຕັ້ງແຕ່ຂັ້ນ ສູນກາງລົງຮອດຂັ້ນທ້ອງຖິ່ນ ໃນຂອບເຂດທົ່ວປະເທດ, ເຮັດໃຫ້ການດຳເນີນຄະດີອາຍາຕໍ່ຜູ້ລະເມີດກົດໝາຍວ່າດ້ວຍປ່າໄມ້ ແລະ ກົດໝາຍວ່າດ້ວຍສັດນ້ຳ-ສັດປ່າ ໄດ້ດຳເນີນໄປຢ່າງຖືກຕ້ອງ, ໂປ່ງ ໃສ່, ທັນຕາມກຳນົດເວລາ ແລະ ຍຸດຕິທຳ.