ສົກຮຽນ 2021-2022 ມຊ ມີນັກສຶກສາໄດ້ຮັບໃບປະກາດກຽດນິຍົມ 65 ຄົນ
ວັນທີ 1 ທັນວາ 2022 ນີ້, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫລຸບຊຸດຮຽນ 2018-2022 ແລະ ເປີດສົກຮຽນໃໝ່ 2022-2023 ພ້ອມປະດັບຫລຽນໄຊຂັ້ນຕ່າງໆ, ໂດຍການເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ມີທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ຫົວໜ້າກົມ-ຮອງກົມ, ຮອງອະທິການບໍດີ, ຄະນະບໍດີພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ອຸດົມ ພອນຄຳເພັງ ອະທິການບໍດີ ມຊ ກ່າວວ່າ: ການຈັດພິທີສະຫລຸບຊຸດຮຽນ 2018-2022 ຂອງນັກສຶກສາຄັ້ງນີ້ເປັນຮຸ່ນທີ 20 ແມ່ນການຈັດຕັ້ງເຄື່ອນໄຫວໃນສົກຮຽນ 2021-2022 ແລະ ແຜນພັດທະນາການສຶກສາໄລຍະ 5 ປີ (2021-2025), ມຊ ປະກອບດ້ວຍ 13 ຄະນະວິຊາ 11 ຫ້ອງການ 2 ສະຖາບັນ ແລະ 6 ສູນ, ມີຫໍສະໝຸດກາງ, ໂຮງໝໍວິທະຍາເຂດ, ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລທີ່ຂຶ້ນກັບ. ມີພະນັກງານຄູ-ອາຈານ ທັງໝົດ 1.763 ຄົນ ຍິງ 824 ຄົນ, ພະນັກງານບໍລິຫານ 311 ຄົນ ຍິງ 191 ຄົນ, ອາຈານສອນ 1.393 ຄົນ ຍິງ 625 ຄົນ, ພະນັກງານຄູ-ອາຈານມີລະດັບການສຶກສາລະດັບປະລິນ ຍາເອກ 204 ຄົນ ຍິງ 44 ຄົນ, ປະລິນຍາໂທ 956 ຄົນ ຍິງ 408 ຄົນ, ປະລິນຍາຕີ 499 ຄົນ ຍິງ 309 ຄົນ, ນອກນັ້ນຍັງມີອານຸປະລິນຍາ, ໄດ້ວິທະຍານາມມະຍົດຂັ້ນສາດສະດາຈານ 5 ຄົນ ຍິງ 1 ຄົນ, ຂັ້ນຮອງສາດສະດາຈານ 87 ຄົນ ຍິງ 13 ຄົນ, ຍັງມີຂັ້ນອາຈານ ແລະ ຜູ້ຊ່ວຍອາຈານ.
ປັດຈຸບັນ ມຊ ໄດ້ດໍາເນີນການຮຽນ-ການສອນໃນຫລາຍລະດັບນັບຕັ້ງແຕ່ຫລັກສູດອານຸປະລິນຍາຈົນເຖິງຫລັກສູດປະລິນຍາເອກມີທັງໝົດ 239 ຫລັກ ສູດ, ໃນນັ້ນຫລັກສູດປະລິນຍາເອກມີ 6 ຫລັກສູດ, ປະລິນຍາໂທ 66 ຫລັກສູດ, ຫລັກສູດນາໆຊາດປະລິນຍາໂທ 1 ຫລັກສູດ, ຫລັກສູດປະລິນຍາຕີ 118 ຫລັກສູດ ມີລະບົບ 4 ປີ, 5 ປີ, 6 ປີ. ສຳລັບຫລັກສູດນາໆຊາດປະລິນຍາຕີ 2 ຫລັກສູດ, ຫລັກສູດຕໍ່ເນື່ອງປະລິນຍາຕີ 42 ຫລັກສູດ, ຫລັກສູດອະນຸປະລິນຍາ 4 ຫລັກສູດ, ໃນສົກຮຽນ 2021-2022 ມີນັກສຶກສາສຳເລັດການສຶກສາຈຳນວນ 5.394 ຄົນ ຍິງ 2.702 ຄົນ, ລະດັບປະລິນຍາໂທ 631 ຄົນ ຍິງ 255 ຄົນ, ປະລິນຍາຕີ 4.741 ຄົນ ຍິງ 2.435 ຄົນ ແລະ ອະນຸປະລິນຍາ 22 ຄົນ ຍິງ 12 ຄົນ, ມີນັກສຶກສາໄດ້ຮັບໃບປະກາດກຽດນິຍົມ 65 ຄົນ ຍິງ 37 ຄົນ.
ນອກນີ້ຍັງມີຜົນງານດ້ານການຄົ້ນຄວ້າວິທະຍາສາດທັງໝົດ 86 ຫົວຂໍ້, ຄຽງຄູ່ກັນນັ້ນ ມຊ ໄດ້ຮ່ວມມືດ້ານວິຊາການທັງພາຍໃນ ແລະ ຕ່າງປະເທດໄດ້ເຊັນບົດບັນທຶກຄວາມເຂົ້າໃຈທາງດ້ານວິຊາການກັບບັນດາມະຫາວິທະຍາໄລ ແລະ ສະຖາບັນການສຶກສາຕ່າງປະເທດລວມທັງໝົດ 314 ສະບັບ, ໃນນັ້ນອາຊຽນ 7 ປະເທດ, ອາຊີ-ປາຊີຟິກ 8 ປະເທດ, ເອີຣົບ-ອາເມຣິກາ 16 ປະເທດ ແລະ ເຊັນສັນຍາຮ່ວມມືກັບອົງການສາກົນ 11 ແຫ່ງ ແລະ ເປັນສະມາຊິກສາກົນ 9 ແຫ່ງ.
ຄຽງຄູ່ຜົນສຳລັດດັ່ງກ່າວໃນໄລຍະ 5 ປີຜ່ານມາມີພະນັກງານ, ຄູ-ອາຈານທີ່ມີຜົນງານດີເດັ່ນໄດ້ຮັບຫລຽນໄຊແຮງງານຊັ້ນ I ຈໍານວນ 146 ຄົນ ແລະ 13 ກົມກອງ, ຫລຽນໄຊແຮງງານຊັ້ນ II ຈໍານວນ 155 ຄົນ ແລະ 8 ກົມກອງ, ຫລຽນໄຊແຮງງານຊັ້ນ III ຈໍານວນ 158 ຄົນ ແລະ 3 ກົມກອງ, ຫລຽນກາແຮງງານຈໍານວນ 129 ຄົນ ແລະ 4 ກົມກອງ, ໃບຍ້ອງຍໍລັດຖະບານຈໍານວນ 560 ຄົນ ແລະ 11 ກົມກອງ ໃຫ້ກຽດປະດັບຫລຽນໂດຍທ່ານ ພຸດ ສິມມາລາວົງ.
