ອຸດສາຫະກຳ-ການຄ້າ ແຂວງສະຫວັນນະເຂດ ທຳລາຍສິນຄ້າເສື່ອມຄຸນ, ລອກຮຽນແບບ, ແລະ ລະເມີດເຄື່ອງໝາຍການຄ້າ
ໃນວັນທີ 29 ພະຈິກ 2022 ຜ່ານມາ, ພະແນກອຸດສາຫະກໍາ ແລະ ການຄ້າ (ອຄ) ແຂວງສະຫວັນນະເຂດ ໄດ້ຈັດພິທີທໍາລາຍສິນຄ້າ ເສື່ອມຄຸນເສຍຄຸນໝົດອາຍຸ, ສິນຄ້າລອກຮຽນແບບ ແລະ ສິນຄ້າລະເມີດເຄື່ອງໝາຍການຄ້າທີ່ຜິດ ຕໍ່ລະບຽບກົດໝາຍຈໍານວນໜຶ່ງ ຢູ່ທີ່ສະໜາມກໍາຈັດຂີ້ເຫຍື້ອບ້ານ ຊອກນະຄອນໄກສອນ ພົມວິຫານ ໂດຍການເຂົ້າ ຮ່ວມຂອງທ່ານ ວັນແສງ ແກ້ວບຸນພັນ ວ່າການ ຫົວໜ້າພະແນກ ອຄ ແຂວງ, ມີທ່ານ ສົມຊາຍ ນົງລາດ ຮອງຫົວ ໜ້າກົມການຄ້າພາຍໃນພ້ອມໜ່ວຍງານກ່ຽວຂ້ອງເຂົ້າຮ່ວມ.
ທ່ານ ແກ້ວອຸດອນ ສິດທິຊົນ ຫົວໜ້າອົງການປະຕິບັດວຽກງານກວດກາການຄ້າຂັ້ນ ແຂວງ ພະແນກ ອຄ ແຂວງ ລາຍງານວ່າ: ໂດຍປະຕິບັດຕາມທິດຊີ້ນໍາຂອງຫົວໜ້າພະແນກ ອຄ ແຂວງ ກໍຄືກົດໝາຍວ່າດ້ວຍປົກປ້ອງຜູ້ຊົມໃຊ້, ດໍາລັດວ່າດ້ວຍການກວດກາການຄ້າ, ຂໍ້ຕົກລົງຂອງລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ ວ່າດ້ວຍມາດຕະການຄວບຄຸມການນໍາເຂົ້າ, ຜະລິດ, ຈໍາໜ່າຍຜະລິດຕະພັນຢາສູບ ແລະ ຜະລິດຕະພັນທີ່ຄ້າຍຄືຢາສູບ ຢູ່ ສປປ ລາວ ເພື່ອເປັນການກວດກາສະກັດກັ້ນການນໍາເຂົ້າ-ຈໍາໜ່າຍ ສິນຄ້າທີ່ບໍ່ມີຄຸນະພາບ, ສິນຄ້າເສື່ອມຄຸນເສຍຄຸນໝົດອາຍຸທີ່ສົ່ງຜົນກະທົບໂດຍກົງຕໍ່ຊີວິດ, ສຸຂະພາບ, ຊັບສິນ, ສິດ, ຜົນປະໂຫຍດ ຂອງຜູ້ຊົມໃຊ້, ປະຊາຊົນ ແລະ ສິ່ງແວວລ້ອມ, ບັນດາສິນຄ້າປອມແປງລອກຮຽນແບບ, ສິນຄ້າ ລະເມີດເຄື່ອງໝາຍການຄ້າ ເຊິ່ງຜິດຕໍ່ລະບຽບກົດໝາຍ, ລະບຽບການວາງອອກ ແລະ ເພື່ອເປັນການກະຕຸກຊຸກຍູ້ສົ່ງເສີມການລົງທຶນພາຍໃນ, ຕ່າງປະເທດທີ່ດໍາເນີນທຸລະກິດຖືກຕ້ອງ, ມີການແຂ່ງຂັນຢ່າງເທົ່າທຽມ ແລະ ຮັບປະກັນໄດ້ການເກັບລາຍຮັບເຂົ້າງົບປະມານ.
ສຳລັບການທຳລາຍສິນຄ້າເສື່ອມຄຸນເສຍຄຸນໝົດອາຍຸ, ສິນຄ້າລອກຮຽນແບບ ແລະ ສິນຄ້າລະເມີດເຄື່ອງໝາຍການຄ້າ (ຍີ່ຫໍ້ຄູໂບຕ້າ) ທີ່ຜິດຕໍ່ລະບຽບກົດໃນຄັ້ງນີ້ຈະໄດ້ຈັດປະເພດການທໍາລາຍ, ເຊິ່ງບາງສ່ວນຈະໃຊ້ວິທີເອົາດິນກົບຝັງ, ບາງສ່ວນຈະໃຊ້ວິທີຈູດ, ບາງສ່ວນຈະເອົາໄປລີໄຊເຄີ້ນ (ນໍ້າມັນເຄື່ອງ, ກະຕຸກຢາງ ເພື່ອຫລຸດຜ່ອນການທໍາລາຍສິ່ງແວວລ້ອມ) ແລະ ບາງສ່ວນທີ່ຍັງໃຊ້ໄດ້ຈະເອົາໄປປະກອບສ່ວນໃຫ້ບັນດາໂຮງຮຽນການຊ່າງຂອງແຂວງ (ເພື່ອເປັນອຸປະກອນໃນການ ຮຽນ-ການສອນຕົວຈິງ).
ສິນຄ້າທີ່ນຳມາທຳລາຍຖິ້ມຄັ້ງນີ້ປະກອບມີ: ເຂົ້າໜົມ 99 ກັບ, ນົມຜົງ 23 ກ່ອງ, ກາເຟ 60 ກັບ, ນົມຂຸ້ນຫວານ 10 ກັບ, ນໍ້າອັດລົມ 13 ແກັດ, ສິນຄ້ານໍາເຂົ້າ-ຈໍາໜ່າຍບໍ່ຜ່ານ ອ.ຢ: ສະບູລວມ 327 ແພັກ, ຄຣີມ ທາຜິວລວມ 418 ກັບ, ສິນຄ້າປະເພດຢາສູບນອກລະບົບ 863 ຊອງ, ຢາສູບໄຟຟ້າ 51 ອັນ, ສິນຄ້ານໍາເຂົ້າ-ຈໍາໜ່າຍບໍ່ໄດ້ຮັບອະນຸຍາດ: ຈານດາວທຽມ-ອຸປະກອນ 602 ຊຸດ, ສິນຄ້າປອມແປງລອກຮຽນແບບ: ນໍ້າມັນເຄື່ອງ-ນໍ້າມັນເກຍກາຊ້າງ 181 ຕຸກ, ອຸປະກອນອາໄຫລ່ຄູໂບຕ້າ 56 ລາຍການ ແລະສິນຄ້າລະເມີດ ເຄື່ອງໝາຍການຄ້າອາໄຫລ່ຄູໂບຕ້າ 17 ລາຍການ.
