ທາງການລັດຮາວາຍ ເຕືອນໄພຜູ້ໃຊ້ຖະໜົນ ຫລັງພູເຂົາໄຟລະເບີດ ລາວາໄຫລເຂົ້າໃກ້ທາງຫລວງ

ສຳນັກງານຕ່າງປະເທດລາຍງານວ່າ: ວັນທີ 30 ພະຈິກ 2022 ນີ້ ທາງການລັດຮາວາຍ ຮຽກຮ້ອງປະຊາຊົນບໍ່ໃຫ້ຈອດລົດຢູ່ຕາມເສັ້ນທາງຫລວງ ຫລັງຈາກທີ່ພູເຂົາໄຟ 2 ລູກລະເບີດຕໍ່ເນື່ອງກັນ ໃນອາທິດທີ່ຜ່ານມາ ເຮັດໃຫ້ລາວາໄຫລເຂົ້າໃກ້ຫົນທາງຫລາຍຂຶ້ນເລື້ອຍໆ.

ເບື້ອງຕົ້ນເຈົ້າໜ້າທີ່ເຊື່ອວ່າການລະເບີດຄັ້ງນີ້ ຈະບໍ່ກະທົບຕໍ່ບ້ານເຮືອນຂອງປະຊາຊົນ ຫລື ໂຄງສ້າງພື້ນຖານໃກ້ຄຽງ ແຕ່ພໍມາຮອດ ວັນທີ 29 ພະຈິກ ເກີດມີທາດລາວາໄຫລອອກມາຈາກພູເຂົາໄຟເມົານາໂອລາເພີ່ມອີກ 2 ສາຍ ແລະ ມີສາຍໜຶ່ງໄຫລມາເຖິງເສັ້ນທາງສາຍຫລັກໃນພາກກາງຂອງເກາະ ບິກໄອແລນ, ຈາກສະຖານະການທີ່ເກີດຂຶ້ນເຮັດໃຫ້ສຳນັກງານປ້ອງກັນພົນລະເຮືອນອອກມາຮຽກຮ້ອງ ບໍ່ໃຫ້ຜູ້ໃຊ້ລົດໃຊ້ຖະໜົນ ຈອດຍານພາຫະນະຢູ່ເທິງເສັ້ນທາງດັ່ງກ່າວ.

ສຳນັກງານສາທາລະນະສຸກອອກມາເຕືອນກ່ອນໜ້ານີ້ ໃຫ້ປະຊາຊົນກຽມຮັບມືກັບບັນຫາສະພາບອາກາດ ຈາກໝອກຄວັນ ເຖົ່າຖ່ານໃນອາກາດ ແລະ ລະດັບກ໊າສຊັລເຟີໄດອອກໄຊ ທີ່ເພີ່ມສູງ.