ເຈົ້າໜ້າທີ່ໄທ ນຳໝາຍສານເຂົ້າກວດຄົ້ນບ້ານຈັດສັນຫລູ ທີ່ມີຄົນຈີນເຄືອຂ່າຍກຸ່ມທຶນສີເທົາເປັນເຈົ້າຂອງຫລາຍສິບຫລັງ.

ວັນທີ 29 ພະຈິກ 2022 ສຳນັກຂ່າວໄທThe Reportersໄດ້ລາຍງານຂ່າວວ່າ: ທ່ານ ພົນເອກ ຕໍ່ສັກ ສຸກວິມົນ ຮອງຜູ້ບັນຊາການຕຳຫລວດແຫ່ງຊາດໄທ ໄດ້ນຳໝາຍສານເຂົ້າກວດຄົ້ນໝູ່ບ້ານຈັດສັນຫລູ ມີເຮືອນ 66 ຫລັງ, ຈາກການສືບສວນ ແລະ ກວດສອບ ພົບຄົນຈີນຊື້ດ້ວຍເງິນສົດ 50 ຫລັງ, ແຕ່ລະຫລັງມີມູນຄ່າ 35-60 ລ້ານບາດ (ຫລືປະມານ 17-30 ຕື້ກີບຕໍ່ຫລັງ) ທີ່ມີສ່ວນກ່ຽວຂ້ອງກັບເຄືອຂ່າຍ ຕູ້ຫ່າວ ກຸ່ມທຸລະກິດຈີນສີເທົາ, ສ່ວນທີ່ເຫລືອ 16 ຫລັງ ຄົນໄທເປັນເຈົ້າຂອງ.

ບ້ານຈັດສັນດັ່ງກ່າວສ້າງຂຶ້ນໃນປີ 2020 ຄົນຈີນເຫລົ່ານີ້ໄດ້ເຂົ້າມາຊື້ໃນລັກສະນະເປັນກຸ່ມກ້ອນ ຊື້ດ້ວຍເງິນສົດ ກະຈາຍຢູ່ເຕັມ ສ້າງຄວາມເດືອດຮ້ອນໃຫ້ກັບຄົນໄທທີ່ອາໄສຢູ່ໝູ່ບ້ານດຽວກັນ ເພາະມັກຈະຈັດປາຕີ້ໃຊ້ສຽງດັງໃນຕອນເດິກ ມີໄຮເດີ້ ເຂົ້າອອກຕະຫລອດຄືນ ມີລົດຕູ້ຖ້າຮັບ-ສົ່ງສາວບໍລິການມາໃຫ້ບໍລິການ ລ່າສຸດ ເຮືອນ 16 ຫລັງທີ່ຄົນໄທເປັນເຈົ້າຂອງ ກຳລັງຂາຍເຮືອນທີ່ຢູ່ຕິດກັບຄົນຈີນດັ່ງກ່າວແລ້ວ.