ຍີ່ປຸ່ນລົງນາມໃຫ້ການຊ່ວຍເຫລືອລາວ ລົດເກັງ ໂຕໂຢຕ້າ ໄຮບຼິດ 33 ຄັນ ແລະ ເຄື່ອງໄອທີສຳລັບການເປັນປະທານອາຊຽນ 2024 ລວມມູນຄ່າ 500 ລ້ານເຢັນ
ວັນທີ 28 ພະຈິກ 2022 ນີ້ ກະຊວງການຕ່າງປະເທດ ໄດ້ມີພິທີລົງນາມເອກະສານແລກປ່ຽນ ເພື່ອຮັບເອົາການຊ່ວຍເຫຼືອລ້າຈາກລັດຖະບານຍີ່ປຸ່ນ ສໍາລັບການເປັນປະທານອາຊຽນ ຂອງ ສປປ ລາວ ໃນປີ 2024. ຕາງໜ້າລັດຖະບານ ສປປ ລາວ ແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ແລະ ຕາງໜ້າລັດຖະບານຍີ່ປຸ່ນ ແມ່ນ ທ່ານ ໂຄບາຢາຊິ ເຄນອິຈິ, ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ ເປັນຜູ້ລົງນາມ ແລະ ໃຫ້ກຽດເຂົ້າຮ່ວມເປັນສັກຂີພິຍານໃນພິທີຄັ້ງນີ້ ມີ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ບັນດາຄະນະກົມທີ່ກ່ຽວຂ້ອງພາຍໃນກະຊວງການຕ່າງປະເທດ ແລະ ຜູ້ຕາງໜ້າຈາກກະຊວງຂະແໜງການທີ່ກ່ຽວຂ້ອງ.
ການຊ່ວຍເຫຼືອຂອງຍີ່ປຸ່ນຄັ້ງນີ້ ລວມມີລົດເກັງ ໂຕໂຢຕ້າ ໄຮບຼິດ (Toyota Camry Hybrid) ຈໍານວນ 33 ຄັນ ເພື່ອນຳໃຊ້ເຂົ້າໃນການຮັບຕ້ອນບັນດາລັດຖະມົນຕີຈາກປະເທດອາຊຽນ ແລະ ປະເທດຄູ່ຮ່ວມມືພາຍນອກອາຊຽນ ໃນໂອກາດເຂົ້າຮ່ວມກອງປະຊຸມອາຊຽນ ຢູ່ ສປປ ລາວ ໃນປີ 2024 ແລະ ນອກຈາກນີ້, ກໍມີອຸປະກອນໄອທີ ເພື່ອປັບປຸງວຽກງານການສື່ສານ ແລະ ລະບົບອິນເຕີເນັດໃຫ້ມີຄວາມພ້ອມ ແລະ ທັນສະໄໝຂຶ້ນ ໃນໄລຍະການເປັນປະທານອາຊຽນ, ເຊິ່ງລວມມູນຄ່າທັງໝົດ 500 ລ້ານເຢັນ.
ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຂອບໃຈ ແລະ ຕີລາຄາສູງຕໍ່ການຮ່ວມມື ແລະ ການຊ່ວຍເຫຼືອຂອງລັດຖະບານ ກໍຄື ປະຊາຊົນຍີ່ປຸ່ນ ອັນໄດ້ປະກອບສ່ວນສຳຄັນເຂົ້າໃນການສົ່ງເສີມການພົວພັນສອງຝ່າຍ ລາວ-ຍີ່ປຸ່ນ ແລະ ທັງເປັນການຢືນຢັນຄືນຄຳໝາຍໝັ້ນຂອງ ຍີ່ປຸ່ນ ໃນການສະໜັບສະໜູນ ສປປ ລາວ ໃນຂອບວຽກອາຊຽນ ໂດຍສະເພາະ ການເປັນປະທານອາຊຽນ ໃນປີ 2024.
ທ່ານ ໂຄບາຢາຊິ ເຄນອິຈິ, ເອກອັກຄະລັດຖະທູດຍີ່ປຸ່ນ ປະຈໍາ ລາວ ໄດ້ຢໍ້າຄືນຄວາມສໍາຄັນຂອງການພົວພັນສອງຝ່າຍ ລາວ-ຍີ່ປຸ່ນ ແລະ ຢືນຢັນຈະສືບຕໍ່ເຮັດວຽກຮ່ວມກັບຝ່າຍລາວ ເພື່ອກະກຽມເປັນປະທານອາຊຽນ 2024 ອັນເປັນການສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ຂອງ ສອງປະເທດ ກໍຄືການເປັນຄູ່ຮ່ວມຍຸດທະສາດ, ແລະ ທັງເປັນການສົ່ງເສີມການພົວພັນອາຊຽນ-ຍີ່ປຸ່ນ.
