ການປະກວດຮ້ອງເພງຊິງຂັນລັດຖະມົນຕີກະຊວງສຶກສາທິການ ແລະ ກິລາຈະເລີ່ມຂຶ້ນໃນຕົ້ນເດືອນເມສານີ້

ໃນວັນທີ 28 ມີນານີ້, ທ່ານຫົວໜ້າກົມພາລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ບຸນສຸກ ທິລາສັກ, ທ່ານນາງ ແສງມະນີ ໄຊຍະກອນ ຜູ້ຈັດການເຄື່ອງດື່ມນ້ຳອັດລົມບໍລິສັດເບຍລາວຈຳກັດ ແລະ ທ່ານ ອານຸລັກ ປະຖຳມະວົງ ຜູ້ອຳນວຍການບໍລິຫານບໍລິສັດສາມາດອີເວັ້ນອໍການາຍເຊີຈຳກັດ, ໄດ້ຮ່ວມກັນຖະແຫລງຕໍ່ສື່ມວນຊົນກ່ຽວກັບການຈັດງານປະກວດຮ້ອງເພງ (PEPSI Singing Contest 2017) ຊິງຂັນທ່ານລັດຖະມົນຕີກະຊວງສຶກສາທິການ ແລະ ກິລາວ່າ: ງານດັ່ງກ່າວໄດ້ແບ່ງອອກເປັນ 3 ຮອບຄື: ຮອບທີ 1 ແມ່ນຮອບຄັດເລືອກຈະຈັດຂຶ້ນໃນວັນທີ 2 ເມສາທີ່ສູນການຄ້າລາວ-ໄອເຕັກ (ຕຶກເກົ່າ) ເປັນການຮ້ອງສຽງສົດບໍ່ມີດົນຕີ, ໂດຍຈະຄັດເລືອກເອົາພຽງແຕ່ 30 ຄົນໃນທົ່ວປະເທດ, ຮອບທີ 2 ແມ່ນຮອບຮອງຊະນະເລີດ, ເຊິ່ງຈະຈັດຂຶ້ນໃນວັນທີ 6 ເມສາທີ່ຄ້າຍເພງອິນດີເລັກຄອດ, ໂດຍຈະຄັດໃຫ້ເລືອກພຽງແຕ່ 12 ຄົນ ແລະ ຈະໄດ້ຮັບການຝຶກຊ້ອມທັກສະທາງດ້ານການຮ້ອງເພງ, ການສະແດງເທິງເວທີເປັນເວລາວ 3 ອາທິດຈາກຄະນະກຳມະການທີ່ເປັນນັກຮ້ອງອາຊີບ ເພື່ອກຽມພ້ອມໃນການແຂ່ງຂັນ ແລະ ສຳລັບຮອບທີ 3 ແມ່ນການຊິງຊະນະເລີດຂອງຜູ້ເຂົ້າຮອບ 12 ຄົນ ເພືອສະແດງຄວາມສາມາດໃນການຮ້ອງເພງສອງແບບຄື: ເພງໄວ ແລະ ເພງຊ້າ, ໂດຍສາມາດຮ້ອງເພງລາວ ຫລື ສາກົນກໍໄດ້ປະເພດລະໜຶ່ງບົດເພງ, ເຊິ່ງຮອບຊິງຊະນະເລີດນີ້ຈະຈັດຂຶ້ນໃນວັນທີ 5 ພຶດສະພາທີ່ສູນກິລາໃນຮົ່ມລ້ານຊ້າງ (ບ້ານໜອງໄຮ), ຜູ້ຊະນະເລີດຈະໄດ້ຮັບທຶນການສຶກສາຈໍານວນ 15 ລ້ານກີບພ້ອມຂັນລັດຖະມົນຕີກະຊວງສຶກສາທິການ ແລະ ກິລາ, ໃບກຽດຕິຍົດ ແລະ ຂອງຂວັນຈາກຜະລິດຕະພັນເປບຊີ, ລາງວັນທີ 2 ຈະໄດ້ຮັບທຶນການສຶກສາ 10 ລ້ານກີບພ້ອມຂອງຂວັນຈາກຜະລິດຕະພັນເປບຊີ, ລາງວັນທີ 3 ເງິນສົດ 8 ລ້ານກີບພ້ອມຂອງຂວັນຈາກຜະລິດຕະພັນເປບຊີ, ສ່ວນລາງວັນມິດຕະພາບຈະໄດ້ຮັບເງິນຈໍານວນ 4 ລ້ານກີບພ້ອມຂອງ ຂວັນຈາກຜະລິດຕະພັນເປບຊີ, ຊຶ່ງລວມມີມູນຄ່າຫລາຍກວ່າ 80 ລ້ານກີບ.

ໃນໂອກາດນີ້, ຄະນະຮັບຜິດຊອບຈັດງານປະກວດຈຶ່ງເຊີນຊວນໄວໜຸ່ມຍິງ-ຊາຍອາຍຸແຕ່ 15-20 ປີເຂົ້າຮ່ວມຄັດເລືອກປະກວດຮ້ອງເພງຄັ້ງນີ້, ໂດຍ ສາມາດຮັບແບບຟ້ອມໄດ້ທີ່ໂຮງຮຽນ, ໜ່ວຍລົດປະ ຊາສຳພັນໂຄງການ ແລະ ທາງ Facebook/Pepsilao ຫລື ຊອບຖາມຂໍ້ມູນໄດ້ທີ 020 28281234.