ຍາດພີ່ນ້ອງຜູ້ສູນເສຍຮ້ອນໃຈ 5 ມື້ຜ່ານໄປບໍ່ໄດ້ຮັບຂ່າວຈາກເຈົ້າໜ້າທີ່ກ່ຽວກັບການຈັບກຸມຄາຕະກອນ
November 26, 2022 - 10:05 AM
ວັນທີ 21 ພະຈິກ 2022 ນີ້ ມີເຫດຄາຕະກຳເກີດຂຶ້ນຢູ່ບ້ານ ສະໜາມໄຊ ນະຄອນໄກສອນ ພົມວິຫານ ມີຜູ້ເສຍຊີວິດຄາທີ່ 1 ຄົນ.ຕາມການລາຍງານເບື້ອງຕົ້ນຂອງເຈົ້າໜ້າທີ່ ປກສ ນະຄອນໄກສອນ ພົມວິຫານໃຫ້ຮູ້ວ່າ: ເວລາ 4 ໂມງເຊົ້າ ວັນທີ 21 ພະຈິກ ນີ້ ໄດ້ເກີດມີເຫດຄາຕະກຳເກີດຂຶ້ນ ຜູ້ເສຍຊີວິດຊື່ທ້າວ ຊັນນີ ອາຍຸ 28 ປີ ອາຊີບຄ້າຂາຍ ຢູ່ບ້ານນາເຊັງ ນະຄອນໄກສອນ ພົມວິຫານ, ຜູ້ກໍ່ເຫດຄາຕະກຳ ຊື່ທ້າວໝີ ອາຍຸ 25 ປີ ອາຊີບຄ້າຂາຍ ຢູ່ບ້ານສະໜາມໄຊ ນະຄອນໄກສອນ.
ຜູ້ກໍ່ເຫດໄດ້ໃຊ້ປືນອາກາທ້າຍພັບ ຈີ້ໃສ່ໜ້າເບືອງຊ້າຍແລ້ວຍິງ ເຮັດໃຫ້ເສຍຊີວິດຄາທີ່ ເຊິ່ງຄາດວ່າເຫດຈູງໃຈໃນຄັ້ງນີ້ແມ່ນ ທັງສອງເຄີຍຜິດຖຽງກັນຍ້ອນເວົ້າສຽດສີກັນກ່ອນໜ້ານີ້.
ປັດຈຸບັນຜູ້ກໍ່ເຫດ ໄດ້ເອົາຕົວຫລົບ ເຊິ່ງເຈົ້າໜ້າທີ່ພວມເລັ່ງຈັບຕົວຜູ້ກ່ຽວມາດຳເນີນຄະດີຕາມລະບຽບກົດໝາຍ.
ຫລ້າສຸກວັນທີ 25 ພະຈິກ 2022 ນີ້ຕາງໜ້າຄອບຄົວຜູ້ສູນເສຍລູກຊາຍ ແລະ ເປັນພີ່ນ້ອງ ຂອງທ້າວ ຊັນນີ່(ຜູ້ເສຍຊີວິດ) ອອກມາເຄື່ອນໄຫວໂພສຜ່ານເຟສບຸກສ່ວນຕົວວ່າ: ຂໍອະນຸຍາດລົງພາບທີ່ຝັງໃນໃຈຂອງຄອບຄົວ ແລະ ຍາດຕິພີ່ນ້ງຂ້າພະເຈົ້າຂໍວິງວອນທາງເຈົ້າໜ້າທີ່ຕຳຫຼວດ ແລະ ພາກສວນທີ່ກ່ຽວຂ້ອງຊ່ວຍນຳເອົາຜູ້ກະທຳຜິດມາດຳເນີນຄະດີຕາມລະບຽບກົດໜາຍບ້ານເມືອງ. ຜ່ານມາ 5 ວັນແລ້ວຍັງບໍມີຄວາມຄືບໜ້າ ແລະ ສັງຄົມສິມີຄວາມຄິດເຫັນແນວໃດ”
ເລື່ອງນີ້ກາຍເປັນປະເດັນໃຫຍ່ຢູ່ໂລອອນລາຍໃນມື້ຜ່ານມາ ເນື່ອງຈາກປະຊາຊົນສ່ວນຫລາຍໃຈຄວາມໃຈຮ້ອນຮົນ, ຢາກຂະບວນການຍຸຕິທຳ ແລະ ຂະບວນການຈັບກຸມຄົນຮ້າຍຂອງເຈົ້າໜ້າທີ່ລັກສະນະວ່ອງໄວທັນໃຈ ເຫດເກີດປຸບ ຈັບຄົນຮ້າຍໄດ້ປັບ ພ້ອມນີ້ກໍມີຫາງສຽງວິພາກວິຈານຫລາຍແງ່ມຸມຕໍ່ເຈົ້າໜ້າທີ່ ເຊິ່ງເລື່ອງນີ້ເຈົ້ານ້າທີ່ຕ້ອງເຂົ້າໃຈຫົວອົກຂອງຜູ້ສູນເສຍ ແລະ ມຸມມອງຂອງສັງຄົມ.
ເຖິງຢ່າງໃດກໍຕາມ ປະຊາຊົນຄົນລາວ ກໍເຊື່ອໝັ້ນຕໍ່ຂະບວນໃນການເຮັດວຽກ ແລະ ດ້ານວິຊາສະເພາະຂອງເຈົ້າໜ້າທີ່ທຸກພາກສ່ວນ ເຊື່ອວ່າເຫດການສູນເສຍ ພ້ອມທັງຜູ້ກໍ່ເຫດດັ່ງກ່າວນັ້ນ ເປັນໄພຕໍ່ສັງຄົມຢ່າງມະຫາສານ ຄົງຈະບໍ່ນິ້ງນອນໃຈ ແລະ ປ່ອຍໃຫ້ເຫດການງຽບຫາຍໄປຕາມການເວລາ ເພາະຕະຫລອດໄລຍະຜ່ານມາ ເຈົ້າໜ້າທີ່ເຮັດວຽກເຕັມທີ່ ແລະ ທຸກໆເຫດການລ້ວນແລ້ວແຕ່ສາມາດຈັບກຸມບຸກຄົນບໍ່ດີມາດຳເນີນຄະດີໄດ້ຕາມລະບຽບກົດໝາຍ ແຕ່ຂັ້ນຕອນ, ວິທີການ ແລະ ໄລຍະເວລາໃນການຈັບກຸມຄົນຮ້າຍນັ້ນ ອາດຈະແຕກຕ່າງກັນ ບາງເຫດການກໍໄວ ບາງເຫດການກໍຊ້າ ທາງດ້ານນີ້ປະຊາຊົນ ປລະ ຜູ້ສູນເສຍກໍຕ້ອງທຳຄວາມເຂົ້າໃຈຕື່ມ.
ຫວັງວ່າເຫດການນີ້ ຜູ້ສູນເສຍຈະບໍ່ສູນເສຍເປົ່າ ແລະ ເຊື່ອວ່າເຈົ້າໜ້າທີ່ຈະສາມາດຈັບຕົວຜູ້ກໍ່ເຫດມາດຳເນີນຄະດີໄດ້ໂດຍໄວ.
