ບັນຫາຄາໃຈ ! ຢາເສບຕິດລາຍໃຫຍ່ຂ້າມດ່ານສາກົນແບບສະບາຍ, ເຈົ້າໜ້າທີ່ກ່ຽວຂ້ອງຝ່າຍລາວເຮົາຈະຊີ້ແຈງຕໍ່ສັງຄົມແນວໃດ?

ຈາກກໍລະນີທີ່ເຈົ້າໜ້າທີ່ດ່ານສາກົນໜອງຄາຍ ປະເທດໄທ ຢຶດຢາເສບຕິດ ປະເພດຢາບ້າເກືອບ 4 ລ້ານເມັດ, ຢາອີ 5.000 ເມັດ ແລະ ຢາໄອສ໌ 10 ກິໂລກຣາມ ທີ່ຊຸກເຊື່ອງໃນລົດບັນທຸກນໍ້າມັນເຊື້ອໄຟຜ່ານດ່ານສາກົນຂົວມິດຕະພາບລາວ-ໄທແຫ່ງທີ 1 ວັນທີ 23 ພະຈິກ 2022 ຜ່ານມາ ຊຶ່ງຜູ້ຖືກຈັບສາລະພາບຕໍ່ເຈົ້າໜ້າທີ່ໄທວ່າ: “ໄດ້ຮັບເງິນຈ້າງ 5 ໝື່ນບາດຈາກຍິງສາວຄົນໜຶ່ງຢູ່ລາວທີ່ຮູ້ຈັກກັນ ແລະ ໄດ້ເຮັດມາຫລາຍຄັ້ງແລ້ວ”ນັ້ນ, ມີຫລາຍປະເດັນທີສັງຄົມສົນໃຈ.

ປະເດັນທໍາອິດ ຈາກກໍລະນີທີ່ຜູ້ຖືກຈັບໄດ້ກ່າວເຖິງຍິງສາວຊາວລາວຖືກນໍາມາເປັນຂໍ້ສົງໄສ ແລະ ຊີ້ເປົ້າໄປຫາ CEO ຜະລິດຕະພັນເສີມຄວາມງາມຄົນໜຶ່ງ ເຊິ່ງຫລ້າສຸດນີ້ ຜູ້ໃຊ້ເຟສບຸກ ຊື່ ໄໝພອນ ສີພູທອນ ໄດ້ມາຖ່າຍທອດສົດໃນເຟສສ່ວນຕົວ ແລະ ຢືນຢັນວ່າ: ຕົນປອດໄພ, ມີບໍລິສຸດ, ບໍ່ມີສ່ວນກ່ຽວຂ້ອງໃດໆກັບຢາເສບຕິດທີ່ພວມເປັນກະແສ, ເງິນທີ່ມີກໍແມ່ນເງິນທີ່ໄດ້ມາຈາກການຄ້າຂາຍອອນລາຍ ແລະ ເຮັດທຸລະກິດຫລາຍຢ່າງ.

ນອກນີ້ ວັນທີ 25 ພະຈິກ 2022 ນີ້, ທ້າວ ອິນປອນ ຄູນມີໄຊ ຜົວຂອງນາງ ໄຫມພອນ ສີພູທອນ ໄດ້ໃຫ້ສຳພາດຕໍ່ໜັງສືພິມລາວພັດທະນາ ຕື່ມວ່າ ຄວາມຈິງໄດ້ໄລສົດຜ່ານເຟສສ່ວນຕົວແລ້ວ ເພື່ອສະແດງຄວາມບໍລິສຸດໃຈຕໍ່ສາທາລະນະວ່າບໍ່ໄດ້ມີຄວາມກ່ຽວຂ້ອງໃດໆກັບຢາເສບຕິດທີ່ພວມເປັນຂ່າວ ແລະ ທາງດ້ານຄະດີທີ່ເກີດຂຶ້ນນັ້ນຂໍໃຫ້ເປັນເຈົ້າໜ້າທີ່ກ່ຽວຂ້ອງອອກມາຊີ້ແຈງ ຫລື ຖະແຫລງຂ່າວຕໍ່ສັງຄົມ ບໍ່ຢາກໃຫ້ສັງຄົມຕັດສິນກັນເອງ ຢາກໃຫ້ເຊື່ອໝັ້ນໃນກົດລະບຽບກົດໝາຍ ເເລະ ໃຫ້ເຈົ້າໜ້າເພິ່ນກວດກາກວດສອບຫາຄວາມຈິງທີ່ແທ້ຈິງກ່ອນ, ອີກອັນໜຶ່ງຄອບຄົວຂ້າພະເຈົ້າຈະບໍ່ຂໍຮ້ອງຟ້ອງບຸກຄົນໃດສື່ໃດໆທັງສິ້ນທີ່ໄດ້ຄອມເມັ້ນ ທັງອອກຂ່າວທາງລົບໃຫ້ຄອບຄົວຂ້າພະເຈົ້າ ແລະ ພວກຂ້າພະເຈົ້າພ້ອມໃຫ້ຄວາມຮ່ວມມືກັບເຈົ້າໜ້າທີ່ຢ່າງສຸດຄວາມສາມາດ”

ປະເດັນທີສອງ, ສັງຄົມກໍສົງໄສວ່າແລ້ວບໍລິສັດຂົນສົ່ງ ແລະ ຄູ່ຮ່ວມຄ້ານໍ້າມັນເຊື້ອໄຟ ມີສ່ວນກ່ຽວຂ້ອງຫລື ແນວໃດ ເຊິ່ງຫລ້າສຸດ ເຈົ້າຂອງບໍລິສັດຂົນສົ່ງນໍ້າມັນທີ່ຄົນຂັບລົດໃຊ້ເປັນພາຫະນະຂົນສົ່ງຢາ ກໍອອກມາຊີ້ແຈງຢືນຢັນ ແລະ ປະຕິເສດ ຜ່ານເພຈຂ່າວ ຈັງຫວັດໜອງຄາຍ ວ່າບໍ່ໄດ້ກ່ຽວຂ້ອງໃດໆກັບການຂົນສົ່ງຢາເສບຕິດ ພ້ອມຈະຮ່ວມມືກັບເຈົ້າໜ້າທີ່ສຸດກົກສຸດປາຍໃນການດຳເນີນຄະດີ.

ປະເດັນທີສາມ ສັງຄົມເລັງໄປເຖິງຂະບວນການຢູ່ເບື້ອງຫລັງການຂົນສົ່ງຢາເສບຕິດຄັ້ງນີ້ ຊຶ່ງມີບາງຂໍ້ສັງເກດທີ່ເຮັດໃຫ້ສັງຄົມສົນໃຈ ຄື 1. ກໍລະນີຄົນຂັບລົດບອກວ່າຕົນເອງໄດ້ເຮັດຜ່ານມາແລ້ວຫລາຍຄັ້ງ ແລະ 2. ຂົນສົ່ງຜ່ານດ່ານສາກົນ ຂົວມິດຕະພາບລາວ-ໄທ ເປັນເສັ້ນທາງການຂົນສົ່ງ ຊຶ່ງມັນຜິດແປກກັບຂະບວນການຄ້າຢາເສບຕິດທົ່ວໄປ.

ດັ່ງນັ້ນ, ຈຶ່ງເປັນສິ່ງທີ່ຕົກຕະລຶງກັນທຸກຖ້ວນໜ້າທີ່ໄດ້ເຫັນຂ່າວ ພ້ອມຕັ້ງໂຈດຂຶ້ນວ່າ ກໍລະນີຄ້າຢາເສບຕິດລາຍໃຫຍ່ຂະໜາດນີ້ສາມາດຫລຸດລອດອອກໄປໄດ້ແນວໃດ? ແລະ ສາມາດຜ່ານດ່ານຝັ່ງລາວໄປໄດ້ແນວໃດ?.

 ກໍລະນີສຸດທ້າຍນີ້ ຖືວ່າເປັນສິ່ງທີ່ສັງຄົມຄາໃຈເປັນທີ່ສຸດ ແລະ ເປັນສິ່ງທ້າທາຍຕໍ່ເຈົ້າໜ້າທີ່ທີ່ສຸດ ເພາະ ວ່າ ການມີຢາເສບຕິດຊຸກເຊື່ອງໃນລົດຂ້າມດ່ານສາກົນແບບສະບາຍ ບໍ່ສາມາດກວດຈັບໄດ້ນັ້ນຍ້ອນຫຍັງກັນແທ້? ເປັນນຳລະບົບກວດຜ່ານ, ເປັນນຳຄົນກວດຜ່ານ ຫລື ມີການຮູ້ເຫັນເປັນໃຈ? ປະເດັນນີ້ຖືວ່າຍັງເປັນໂຈດທີ່ເຈົ້າໜ້າທີ່ກ່ຽວຂ້ອງຕ້ອງໄດ້ເຮັດວຽກໜັກເພື່ອຊີ້ແຈງຕໍ່ສັງຄົມຕໍ່ໄປ ແລະ ຈະມີມາດຕະການເຂັ້ມງວດແນວໃດຕໍ່ໄປໃນອະນາຄົດ ເພື່ອບໍ່ໃຫ້ເກີດບັນຫານີ້ຂຶ້ນອີກ.

 ແນວໃດກໍດີ, ປະຊາຊົນ ຍັງເຊື່ອໝັ້ນຕໍ່ການເຮັດວຽກຂອງເຈົ້າໜ້າທີ່ກ່ຽວຂ້ອງທີ່ຮັບຜິດຊອບຕ້ານ ແລະ ປາບປາມຢາເສບຕິດ ແລະ ປະຕິບັດໜ້າທີ່ຢ່າງຈິງຈັງຈິງໃຈ ຄືດັ່ງພົນເອກ ວິໄລ ຫລ້າຄຳຟອງ ຮອງນາ ຍົກລັດຖະມົນຕີ, ລັດຖະມົນຕີກະຊວງ ປກສ ກ່າວຢໍ້າມາໂດຍຕະຫລອດເລື່ອງການປາບປາມຢາເສບຕິດ, ປາບປາມຂະບວນການທຸຈະລິດຕ່າງໆໃນກອງກຳລັງປ້ອງກັນຄວາມສະຫງົບ ແລະ ປະຊາຊົນກໍໄດ້ຝາກຄວາມຫວັງໄວ້ເຈົ້າໜ້າທີ່ທຸກພາກສ່ວນ ແລະ ຫວັງວ່າຄວາມຫວັງອັນບໍລິສຸດຂອງປະຊາຊົນນັ້ນຈະສົມຫວັງ ເພື່ອຍົກສູງບົດບາດຂອງເຈົ້າໜ້າທີ່ຕະຫລອດໄປ.