ຮອງຫົວໜ້າພະແນກ ຍທຂ ແຂວງຄຳມ່ວນ ລົງຕິດຕາມ-ກວດກາ ການສ້ອມແປງເສັ້ນທາງຢູ່ເມືອງເຊບັ້ງໄຟ

ວັນທີ 21 ພະຈິກ 2022 ຜ່ານມາ, ທ່ານ ສີສຸວັນ ໂອລິຍະວົງ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງຄຳມ່ວນ ພ້ອມດ້ວຍການນຳເມືອງເຊບັ້ງໄຟ ນຳໂດຍ ທ່ານ ທອງໄຊ ມັງໜໍ່ເມກ ເຈົ້າເມືອງເຊບັ້ງໄຟ, ທ່ານ ບຸນທັນ ພິມພົມມາ ຫົວໜ້າຫ້ອງການໂຍທາທິການແລະຂົນສົ່ງເມືອງ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງຢ້ຽມຢາມ ແລະ ຕິດຕາມການສ້ອມແປງເສັ້ນທາງແຕ່ ບ້ານຫາດເພັກ ຫາ ບ້ານນາຊອຍ ແລະ ບ້ານ ນາຊອຍ ຫາ ບ້ານ ວັງເດືອນຫ້າ ເມືອງເຊບັ້ງໄຟ.

ທ່ານຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ລາຍງານວ່າ:  ເສັ້ນທາງດັ່ງກ່າວໄດ້ເລີ່ມສ້ອມແປງ ແຕ່ວັນທີ 5 ພະຈິກ 2022 ເຊິ່ງມີຄວາມກວ້າງ 4 ແມັດ, ຍາວ 38,700 ກິໂລແມັດ, ການສ້ອມແປງແມ່ນໄດ້ເກດໜ້າດິນ, ປັບໜ້າທາງ ພ້ອມຮ່ອງລະບາຍນໍ້າ, ການສ້າງຮ່ອງລະບາຍນໍ້າຄືນໃໝ່, ມາຮອດປັດຈຸບັນແມ່ນສຳເລັດແລ້ວ 3,79%, ເຊິ່ງແມ່ນບໍລິສັດພິນທອງ ກໍ່ສ້າງສ້ອມແປງຂົວທາງ ແລະ ຊົນລະປະທານ ຈຳກັດຜູ້ດຽວ ໃນມູນຄ່າທັງໝົດ 2.505.381.340 ກີບ ໂດຍແມ່ນທຶນຂອງໄພພິບັດແຂວງຄໍາມ່ວນ ເສັ້ນທາງດັ່ງກ່າວແມ່ນມີ 2 ສັນຍາຄື: ທາງແຕ່ ບ້ານ ຫາດເພັກ ຫາ ບ້ານນາຊອຍ ກວ້າງ 4 ແມັດ, ຍາວ 22.600 ກິໂລແມັດ, ມີມູນຄ່າ: 1.365.424.690 ກີບ ແລະ ທາງແຕ່ ບ້ານ ວັງເດືອນຫ້າ ຫາ ບ້ານ ນາຊອຍ ກວ້າງ 4 ແມັດ, ຍາວ 16.100 ກິໂລແມັດ ມີມູນຄ່າ: 1.139.959.650 ກີບ.