ສິງກະໂປມອບເງິນ 50.000 ໂດລາ ຊ່ວຍຜູ້ປະສົບໄພແຜ່ນດິນໄຫວຢູ່ອິນໂດເນເຊຍ
ກາແດງສິງກະໂປປະກາດມອບເງິນຈຳນວນ 50.000 ໂດລາສະຫະລັດ ເພື່ອຊ່ວຍເຫລືອຜູ້ປະສົບໄພຈາກເຫດແຜ່ນດິນໄຫວຢູ່ອິນໂດເນເຊຍ.
ເງິນບໍລິຈາກດັ່ງກ່າວຈະເນັ້ນໃຫ້ການຊ່ວຍເຫລືອດ້ານອາຫານ ແລະ ນ້ຳ, ທີ່ພັກອາໄສ ລວມທັງສຸຂະອະນາໄມຂອງເຫຍື່ອແຜ່ນດິນໄຫວ.
ກາແດງສິງກະໂປຈະຍັງປະເມີນສະຖານະການຕໍ່ໄປ ແລະ ພ້ອມສົ່ງເຈົ້າໜ້າທີ່ເຂົ້າສະໜັບສະໜູນຄວາມພະຍາຍາມໃນການບັນເທົາທຸກເຫດໄພພິບັດໃນຄັ້ງນີ້.
ທັງນີ້, ຜູ້ເສຍຊີວິດຈາກເຫດແຜ່ນດິນໄຫວ 5,6 ແມກນິຈູດທີ່ເກີດຂຶ້ນໃນວັນທີ 21 ພະຈິກ ໃນແຂວງຊາວາຕາເວັນຕົກຂອງອິນໂດເນເຊຍມີຈຳນວນເພີ່ມຂຶ້ນຢ່າງຕໍ່ເນື່ອງ.
ຫລ້າສຸດ, ສຳນັກງານໄພພິບັດແຫ່ງຊາດອິນໂດເນເຊຍເປີດເຜີຍຈຳນວນຜູ້ເສຍຊີວິດຢູ່ລະດັບ 271 ຄົນ, ຂະນະທີ່ຜູ້ບາດເຈັບມີຫລາຍກວ່າ 1.000 ຄົນ ແລະ ສູນຫາຍ 40 ຄົນ.
ນອກຈາກນີ້, ເຫດແຜ່ນດິນໄຫວດັ່ງກ່າວເຮັດໃຫ້ມີຜູ້ບໍ່ມີບ່ອນຢູ່ອາໄສຫລາຍກວ່າ 58.000 ຄົນ.
ຜູ້ຊ່ຽວຊານລະບຸວ່າ: ການທີ່ມີຜູ້ເສຍຊີວິດຈຳນວນຫລາຍຈາກເຫດແຜ່ນດິນໄຫວຄັ້ງນີ້ທີ່ມີຄວາມຮຸນແຮງພຽງ 5,6 ແມກນິຈູດ ມີສາເຫດຫລາຍປະການ ເຊິ່ງໜຶ່ງໃນນັ້ນຄືແຜ່ນດິນໄຫວໄດ້ເກີດຂຶ້ນໃນແຂວງຊາຕາຕາເວັນຕົກ ເຊິ່ງເປັນພື້ນທີ່ທີ່ມີປະຊາຊົນອາໄສຢູ່ຢ່າງໜາແໜ້ນຫລາຍທີ່ສຸດຂອງອິນໂດເນເຊຍ.
ນອກຈາກນີ້, ແຜ່ນດິນໄຫວໄດ້ເກີດໃກ້ກັບບໍລິເວນຮອຍເລື່ອນ ຂະນະທີ່ຈຸດສູນກາງຢູ່ລະດັບຄວາມເລິກພຽງ 10 ກິໂລແມັດ ເຮັດໃຫ້ເກີດດິນຖະຫລົ່ມໃນຫລາຍແຫ່ງ ລວມທັງອາຄານໃນພື້ນທີ່ບໍ່ໄດ້ຮັບການອອກແບບເພື່ອຮອງຮັບເຫດແຜ່ນດິນໄຫວ ຈຶ່ງເຮັດໃຫ້ເກີດການຖະຫລົ່ມຈົນເຮັດໃຫ້ມີຜູ້ເສຍຊີວິດຈຳນວນຫລາຍ ໂດຍເຈົ້າໜ້າທີ່ພົບຮ່າງຜູ້ເສຍຊີວິດເປັນເດັກຫລາຍຄົນທີ່ຕົກຄ້າງຢູ່ໃນຊາກອາຄານຂອງໂຮງຮຽນສອນສາສະໜາທີ່ພັງຖະຫລົ່ມລົງມາ.
ແຮງສັ່ນສະເທືອນຂອງແຜ່ນດິນໄຫວຄັ້ງນີ້ສາມາດຮັບຮູ້ໄດ້ໄກເຖິງນະຄອນຫລວງຈາກາຕາ ເຊິ່ງຫ່າງຈາກສູນກາງແຜ່ນດິນໄຫວເຖິງ 70 ກິໂລແມັດ ແລະ ເຮັດໃຫ້ປະຊາຊົນຕ້ອງພາກັນອົບພະຍົບອອກຈາກເຮືອນ ແລະ ອາຄານຕ່າງໆ.
