ເກີດເຫດກວາດຍິງຢູ່ຫ້າງ Walmart ໃນລັດເວີຈິເນຍ ເສຍຊີວິດ-ບາດເຈັບຫລາຍຄົນ

Leo Kosinski ເຈົ້າໜ້າທີ່ຝ່າຍປະຊາສຳພັນຂອງກົມຕຳຫລວດເມືອງເຊສພີກ ລັດເວີຈີເນຍ ອາເມລິກາ ເປີດເຜີຍວ່າ: ເຈົ້າໜ້າທີ່ຕຳຫລວດໄດ້ເຂົ້າຄວບຄຸມເຫດກວາດຍິງຢູ່ຫ້າງ Walmart ເຊິ່ງມີຜູ້ບາດເຈັບ ແລະ ເສຍຊີວິດຢ່າງໜ້ອຍ 6 ຄົນ.

ຕຳຫລວດໄດ້ເດີນທາງໄປເຖິງຫ້າງສັບພະສິນຄ້າດັ່ງກ່າວໃນໄລຍະເວລາປະມານ 22:12 ໂມງ ຂອງວັນທີ 22 ພະຈິກ ຕາມເວລາທ້ອງຖິ່ນ ຫລື ກົງກັບຕອນບ່າຍວັນທີ 23 ພະຈິກ ຕາມເວລາປະເທດລາວ ໂດຍພົບວ່າມີຜູ້ບາດເຈັບ ແລະ ເສຍຊີວິດຫລາຍຄົນໃນຈຸດເກີດເຫດ ເຊິ່ງປັດຈຸບັນເຈົ້າໜ້າທີ່ຍັງບໍ່ໄດ້ລະບຸຕົວເລກຢືນຢັນຈຳນວນຜູ້ເສຍຊີວິດ, ແຕ່ຄາດວ່າບໍ່ຕໍ່າກວ່າ 10 ຄົນ.

Kosinski ລະບຸວ່າ: ຜູ້ກໍ່ເຫດໄດ້ເສຍຊີວິດແລ້ວ, ແຕ່ຍັງບໍ່ຮູ້ສາເຫດການເສຍຊີວິດທີ່ແນ່ນອນ, ແຕ່ຄາດວ່າຜູ້ກໍ່ເຫດບໍ່ໄດ້ຖືກເຈົ້າໜ້າທີ່ວິສາມັນຂະນະເຂົ້າຮັບມືຕໍ່ເຫດການທີ່ເກີດຂຶ້ນ ໂດຍຕອນນີ້ເຈົ້າໜ້າທີ່ຕຳຫລວດຫລາຍຄົນກຳລັງຄົ້ນຫາຫລັກຖານເພີ່ມອີກໃນຫ້າງສັບພະສິນຄ້າ ລວມທັງຄົ້ນຫາອີກວ່າຍັງມີເຫຍື່ອຈາກເຫດການທີ່ເກີດຂຶ້ນເພີ່ມອີກ ຫລື ບໍ່ ເນື່ອງຈາກຫ້າງສັບພະສິນຄ້າຂ້ອນຂ້າງກວ້າງ ຈຶ່ງອາດມີປະຊາຊົນທີ່ຍັງລີ້ຊ້ອນຢູ່.

ປັດຈຸບັນທາງເມືອງໄດ້ຈັດຕັ້ງສູນປະສານງານຂຶ້ນ ສຳລັບໃຫ້ຄອບຄົວໄດ້ຕິດຕໍ່ສອບຖາມຖ້າມີຍາດພີ່ນ້ອງທີ່ເຂົ້າໄປໃຊ້ບໍລິການໃນຫ້າງ Walmart ໃນໄລຍະເກີດເຫດ ໂດຍຂໍໃຫ້ສະເພາະຄອບຄົວ ແລະ ຜູ້ຕິດຕໍ່ສຸກເສີນເຂົ້າມາໃຊ້ບໍລິການເທົ່ານັ້ນ.

ເຫດສະເທືອນຂວັນທີ່ເກີດຂຶ້ນຖືເປັນເຫດກວາດຍິງຄັ້ງທີ 2 ໃນໄລຍະເວລາພຽງ 3 ວັນທີ່ເກີດຂຶ້ນໃນອາເມລິກາ ຫລັງຈາກທ້າຍອາທິດຜ່ານມາໄດ້ເກີດເຫດກວາດຍິງຂຶ້ນຢູ່ຮ້ານ Club Q ໄນຄລັບ ເຊິ່ງເປັນແຫລ່ງລວມຕົວຂອງຊາວ LGBTQIA+ ໃນລັດໂຄໂລຣາໂດ ສົ່ງຜົນໃຫ້ມີຜູ້ເສຍຊີວິດ 5 ຄົນ.

ອ້າງອີງ:

https://edition.cnn.com/…/chesapeake…/index.html

https://www.nytimes.com/…/multiple-people-are-fatally…

https://www.reuters.com/…/deaths-reported-virginia…/