ຄວາມຄືບໜ້າ ຈາກເຫດແຜ່ນດິນໄຫວທີ່ ເກາະຊາວາ ປະເທດອິນໂດເນເຊຍ ມີຄົນເສຍຊີວິດເພີ່ມຂຶ້ນ 268 ຄົນ ໄດ້ຮັບບາດເຈັບຫລາຍກວ່າ 1,000 ຄົນ
ສຳນັກຂ່າວຕ່າງປະເທດລາຍງານວ່າ: ວັນທີ 23 ພະຈິກ 2022 ນີ້, ຄວາມຄືບໜ້າເຫດການແຜ່ນດິນໄຫວ ທີ່ເກາະຊາວາ ປະເທດອິນໂດເນເຊຍ ເປັນເຫດເຮັດໃຫ້ມີຜູ້ເສຍຊີວິດເພິ່ມຂື້ນຢ່າງໜ້ອຍ 268 ຄົນແລ້ວ ຫລັງຈາກທີ່ທີມກູ້ໄພໄດ້ຂຸດຄົ່ນຜູ້ປະສົບເຫດທີ່ຕິດຢູ່ຕາມອາຄານບ້ານເຮືອນທີ່ໄດ້ຮັບຄວາມເສຍຫາຍຈາກແຮງສັ່ນສະເທືອນຂອງແຜ່ນດິນໄຫວ.
ໃນຂະນະທີ່ສຳນັກງານຈັດການໄພພິບັດແຫ່ງຊາດຂອງອິນໂດເນເຊຍຖະແຫລ່ງວ່າ: ຍັງມີຜູ້ສູນຫາຍອີກປະມານ 151 ຄົນ, ມີຜູ້ໄດ້ຮັບບາດເຈັບຫລາຍກວ່າ 1,000 ຄົນ ແລະ ບ້ານເຮືອນຫລາຍກວ່າ 22,000 ຫລັງພັງເສຍຫາຍ, ປະຊາຊົນຫລາຍກວ່າ 58,000 ຄົນກາຍເປັນທີ່ບໍ່ມີທີ່ພັກອາໄສ.
ທັງນີ້, ປະທານາທິບໍດີ ໂຈໂກ ວິໂດໂດ ໄດ້ເດີນທາງລົງພື້ນທີ່ໄພພິບັດໃນວັນທີ 22 ພະຈິກ ພ້ອມໃຫ້ຄຳແນະນຳເຈົ້າໜ້າທີ່ໃນການເລັ່ງຊ່ວຍເຫລືອຜູ້ປະສົບໄພທີ່ຍັງຕົກຄ້າງຢູ່ໃຕ້ຊາກອາຄານບ້ານເຮືອນເປັນອັນດັບທຳອິດ ໂດຍເຈົ້າໜ້າທີ່ກູ້ໄພພ້ອມຕຳຫລວດຫລາຍຮ້ອຍຄົນ ຍັງພະຍາຍາມດຳເນີນການຄົ້ນຫາ ແລະ ຊ່ວຍເຫລືອຜູ້ລອດຊີວິດຢ່າງຕໍ່ເນື່ອງ.
