IMF ອະນຸມັດເງິນກູ້ຊ່ວຍເຫລືອດ້ານອາຫານແກ່ມາລາວີ ຫລັງຜະເຊີນວິກິດອາຫານຄັ້ງປະຫວັດສາດ

ສຳນັກຂ່າວບລູມເບີກລາຍງານວ່າ: ມາລາວີກາຍເປັນປະເທດທີ່ມີລາຍໄດ້ໜ້ອຍປະເທດທຳອິດທີ່ໄດ້ຮັບເງິນຈາກກອງທຶນການເງິນສາກົນ (IMF) ພາຍໃຕ້ມາດຕະການໃໝ່ທີ່ມີຈຸດປະສົງເພື່ອຊ່ວຍໃຫ້ປະເທດຕ່າງໆຮັບມືລາຄາອາຫານທີ່ເພີ່ມສູງຂຶ້ນ.

IMF ເຫັນພ້ອມຈະອະນຸມັດເງິນກູ້ຈຳນວນ 88,3 ລ້ານໂດລາສະຫະລັດແກ່ມາລາວີ ເພື່ອຮັບມືບັນຫາຄວາມຕ້ອງການດຸນການຊຳລະເງິນຮີບດ່ວນທີ່ກ່ຽວຂ້ອງກັບຕົ້ນທຶນອາຫານທີ່ເພີ່ມສູງຂຶ້ນ. ພ້ອມກ່າວວ່າ: ອັດຕາເງິນເຟີ້ດ້ານອາຫານປະຈຳປີເພີ່ມຂຶ້ນກວ່າ 2 ເທົ່າ ຢູ່ລະດັບ 34,5% ນັບແຕ່ຣັດເຊຍບຸກໂຈມຕີອູແກຣນໃນເດືອນກຸມພາ.

ລາຍງານການແບ່ງຄວາມໝັ້ນຄົງທາງອາຫານໃນຖານຂອງສະພາບວິກິດທີ່ຈຳເປັນຕໍ່ການດຳລົງຊີວິດ (Integrated Food Security Phase Classification – IPC) ລະບຸວ່າ: ມາລາວີເປັນ 1 ໃນ 48 ປະເທດທີ່ IMF ລະບຸວ່າ ໄດ້ຮັບຜົນກະທົບຮ້າຍແຮງທີ່ສຸດຈາກວິກິດອາຫານທີ່ຮຸນແຮງທີ່ສຸດເທົ່າທີ່ໂລກເຄີຍປະສົບມານັບແຕ່ວິກິດການເງິນໂລກ ໂດຍຄາດວ່າປະມານ 1 ໃນ 5 ຂອງປະຊາກອນຈະຜະເຊີນຄວາມບໍ່ໝັ້ນຄົງທາງອາຫານຢ່າງຮຸນແຮງໃນໄລຍະລະຫວ່າງລໍຖ້າເກັບກ່ຽວຜົນຜະລິດໃນເດືອນຕຸລາ-ເດືອນມີນາ ເມື່ອທຽບໃສ່ພຽງ 15% ໃນປີກ່ອນໜ້າ.

IMF ເປີດຕົວມາດຕະການເງິນກູ້ຄ່າອາຫານໃນເດືອນກັນຍາ ສຳລັບປະເທດທີ່ຕ້ອງການດຸນການຊຳລະເງິນຮີບດ່ວນ ເນື່ອງຈາກຄວາມບໍ່ໝັ້ນຄົງທາງດ້ານອາຫານ, ການເກັບພາສີນຳເຂົ້າອາຫານທີ່ເພີ່ມຂຶ້ນຢ່າງວ່ອງໄວ ຫລື ສະພາບຢຸກສະງັກຂອງການສົ່ງອອກທັນຍາພືດ ໂດຍການຊ່ວຍເຫລືອນີ້ມີອາຍຸ 1 ປີ ແລະ ອູແກຣນກໍໄດ້ຮັບເງິນຊ່ວຍເຫລືອພາຍໃຕ້ມາດຕະການນີ້ເຊັ່ນກັນ.