ໂຮງຮຽນກໍ່ສ້າງນາຍສິບເລກ 2 ວຽງໄຊ ສະຫລອງວັນສ້າງຕັ້ງຄົບຮອບ 60 ປີ

ທ່ານ ພັນເອກ ພູເວີນ ວົງຄໍາຊາວ ຫົວໜ້າການເມືອງໂຮງຮຽນກໍ່ສ້າງນາຍສິບເລກ 2 ວຽງໄຊ ໄດ້ຍົກໃຫ້ເຫັນປະຫວັດຄວາມເປັນມາ, ມູນເຊື້ອແຫ່ງການກໍາເນີດເຕີບໃຫຍ່ຂະຫຍາຍຕົວ ຂອງໂຮງຮຽນກໍ່ສ້າງນາຍສິບເລກ 2 ວຽງໄຊ ໃນຕະຫລອດ 60 ປີ ທີ່ຜ່ານມາ ເຊິ່ງໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນວັນທີ 22 ພະຈິກ 1962 ໃນສະພາບແວດລ້ວມທີ່ປະເທດຊາດ ດໍາເນີນສົງຄາມຕໍ່ສູ້ປົດປ່ອຍຊາດ ໂດຍແມ່ນ ທ່ານ ພົນເອກ ຄຳໄຕ ສີພັນດອນ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດໃນເວລານັ້ນ ເປັນຜູ້ປະກາດປະກາດສ້າງຕັ້ງ ໂດຍມີຕົ້ນກໍາເນີດສືບທອດມູນເຊື້ອມາຈາກໂຮງຮຽນວັດທະນະທໍາຊວນແທ໋ງ, ໂຮງຮຽນວັດທະນະທຳກອງທັບວຽງໄຊໃນເມື່ອກ່ອນ, ພາຍຫລັງໄດ້ຮັບການສ້າງຕັ້ງຂຶ້ນຄະນະພັກ-ຄະນະບັນຊາ, ພະນັກງານຄູ-ອາຈານແຕ່ລະຮຸ້ນ ໄດ້ອອກແຮງເສີມຂະຫຍາຍຫົວຄິດປະດິດສ້າງຂອງຕົນ ເຂົ້າໃນການກໍ່ສ້າງບຸກຄະລະກອນຮຸ້ນສືບທອດປ່ຽນແທນ ໃຫ້ກໍາລັງປະກອບອາວຸດກອງທັບປົດປ່ອຍປະຊາຊົນລາວໃນເມື່ອກ່ອນ ກໍຄື ກອງທັບປະຊາຊົນລາວໃນປັດຈຸບັນ ເປັນແຕ່ລະໄລຍະ ໄດ້ທາງດ້ານປະລິມານ ແລະ ຄຸນະພາບ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງ ໜ້າທີ່ການເມືອງຂອງກອງທັບ ຢ່າງມີໝາກຜົນອັນຈົບ ງາມ.

ຕະຫລອດໄລຍະ 60 ຜ່ານມາໂຮງຮຽນກໍ່ສ້າງນາຍສິບເລກ 2 ວຽງໄຊ ສາມາດສ້າງນັກຮຽນໄດ້ທັງໝົດ 23.143 ຄົນ ກາຍເປັນກໍາລັງແຮງສັງລວມໃຫ້ແກ່ກອງທັບ ກໍຄື ປະເທດຊາດ ໃນນີ້ຫລາຍສະຫາຍໄດ້ກາຍເປັນພະນັກງານການນຳຂັ້ນສູງຂອງພັກ-ລັດ ກໍຄື ຂອງກອງທັບ, ປົກປັກຮັກສາ ແລະ ເສີມຂະຂາຍໄດ້ທາດແທ້, ມູນເຊື້ອອັນມີກຽດສະຫງ່າຂອງຕົນ ກາຍເປັນເບົ້າຫລໍ່ຫລອມນັກຮຽນ-ນັກສຶກສາ ໃຫ້ມີຄວາມຮູ້-ຄວາມສາມາດ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ພັກ, ຕໍ່ກອງທັບ, ຕໍ່ປະເທດຊາດ ແລະ ຕໍ່ປະຊາຊົນບັນດາເຜົ່າ. ຈາກຜົນງານ ແລະ ມູນເຊື້ອອັນສະຫງ່າງາມທີ່ສ້າງມາໄດ້ ເຮັດໃຫ້ໂຮງຮຽນກໍ່ສ້າງນາຍສິບເລກ 2 ວຽງໄຊ ໄດ້ຮັບການຍ້ອງຍໍຈາກພັກ-ລັດຖະບານ, ກະຊວງປ້ອງກັນປະເທດ ແລະ ອົງການຈັດຕັ້ງຕ່າງໆ.

ໂອກາດນີ້, ທ່ານ ພົນໂທ ຄໍາລຽງ ອຸທະໄກສອນ ໄດ້ສະແດງຄວາມຍ້ອງຍໍຊົມເຊີມຕໍ່ຄະນະພັກ-ຄະນະອໍານວຍການ, ພະນັກງານ-ຄູອາຈານ ແຕ່ລະຮຸ້ນ ທີ່ສາມາດສ້າງມາໄດ້ມູນເຊື້ອອັນດີງາມຂອງໂຮງຮຽນ ດ້ວຍດີຕະຫລອດມາ. ພ້ອມທັງເນັ້ນໃຫ້ສືບຕໍ່ເພີ່ມທະວີຄວາມຕັ້ງຕໍ່ບໍລິສຸດຕໍ່ພັກ, ຕໍ່ປະເທດຊາດ, ຕໍ່ປະຊາຊົນບັນດາເຜົ່າ ເຊື່ອມຊຶມມະຕິກອງປະຊຸມໃຫຍ່ຄັ້ງທີ 11 ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງປະເທດ ແລະ ມະຕິກອງປະຊຸມໃຫຍ່ຂອງໂຮງ ຮຽນໃຫ້ໄດ້ຮັບໝາກຜົນຕົວຈິງ, ສາມາດປົກປັກຮັກສາ ແລະ ເສີມຂະຫຍາຍມູນເຊື້ອຂອງໂຮງຮຽນແຕ່ລະໄລຍະ ໃຫ້ຈະເລີຍງອກງາມຍິ່ງໆ ຂຶ້ນ.

ໃນໂອກາດ ສະເຫລີມສະຫລອງວັນສ້າງຕັ້ງໂຮງຮຽນກໍ່ສ້າງນາຍສິບເລກ 2 ວຽງໄຊ ຄົບຮອບ 60 ປີ ນີ້, ກະຊວງປ້ອງກັນປະເທດ ຍັງໄດ້ມອບຫລຽນໄຊພິລະອາດຫານຊັ້ນ II ໃຫ້ໂຮງຮຽນກໍ່ສ້າງນາຍສິບເລກ 2 ວຽງໄຊ, ປະເພດຫລຽນໄຊພິລະອາດຫານຊັ້ນ III ໃຫ້ກົມກອງລວມໝູ່ 7 ກົມກອງ, ໃບຍ້ອງຍໍກະຊວງປ້ອງກັນປະເທດ 39 ກົມກອງ, ໃບຍ້ອງຍໍກົມໃຫຍ່ການເມືອງກອງທັບ 22 ກົມກອງ, ໃບຍ້ອງຍໍໂຮງຮຽນກໍ່ສ້າງນາຍສິບເລກ 2 ວຽງໄຊ ໃຫ້ກົມກອງລວມໝູ່ 4 ກົມກອງ, ບຸກຄົນ 324 ສະຫາຍ ທີ່ມີຜົນງານດີເດັ່ນປະກອບສ່ວນສໍາຄັນ ເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ກໍຄື ປົກປັກຮັກສາ ແລະ ສ້າງສາພັດທະນາປະເທດຊາດ ຕື່ມອີກ.