ຊຽງຂວາງເກມ ເຈົ້າພາບ ຕັ້ງເປົ້າໃຫ້ໄດ້ຫລຽນຄຳ 33 ຫລຽນ

ໃນມະຫະກຳກິລາແຫ່ງຊາດ ຄັ້ງທີ XI ຫລື ຊຽງຂວາງເກມທີ່ຈະຈັດຂຶ້ນແຕ່ວັນທີ 13-22 ທັນວາ 2022, ທັບນັກກິລາແຂວງຊຽງຂວາງ ຕັ້ງເປົ້າຈະໃຫ້ໄດ້ 33 ຫລຽນຄຳ, 37 ຫລຽນເງິນ ແລະ 41 ຫລຽນທອງ ລວມ 111 ຫລຽນ ເພື່ອໃຫ້ຢູ່ໃນອັນດັບທີ 4-6 ຂອງຕາຕະລາງສະຫລຸບຫລຽນລາງວັນ. ຂະນະດຽວກັນກໍ ໄດ້ສົ່ງນັກກິລາເຂົ້າຮ່ວມແຂ່ງຂັນ 25 ປະເພດກິລາ.
ທ່ານ ບຸນເລື່ອນ ວັນນາຮັກ ຫົວໜ້າພະແນກສຶກສາທິການ ແລະ ກິລາແຂວງຊຽງຂວາງ ເປີດເຜີຍເມື່ອບໍ່ດົນມານີ້ວ່າ: ມາຮອດປັດຈຸບັນ, ນັກກິລາພວກເຮົາພ້ອມເຂົ້າຮ່ວມແຂ່່ງຂັນທັງ 25 ປະເພດກິລາພາຍຫລັງ ເຂົ້າສູນຝຶກແອບແຕ່ວັນທີ 1 ຕຸລາ 2022 ເປັນຕົ້ນມາ. ສຳລັບກຳມະການ, ອະນຸກຳມະການຕ່າງໆ ໂດຍ ລວມເຫັນວ່າ ມີຄວາມພ້ອມເຊັ່ນກັນ, ແຕ່ຍັງມີບາງໜ້າວຽກຂອງບາງກຳມະການຕ້ອງໄດ້ລົງລາຍລະອຽດ ເປັນຕົ້ນ ກຳມະການເປີດ-ປິດ ພວມຝຶກແອບກ້ອນກຳລັງຕາມແຜນ ແລະ ລາຍການສະແດງໄດ້ຮັບຮອງແລ້ວ, ສຸມໃສ່ຕົກແຕ່ງພິທີເປີດ-ປິດ ແລະ ຕິດຕັ້ງອຸປະກອນຮັບໃຊ້, ອະນຸກຳມະການຂຶ້ນທະບຽນ ແລະ ອອກບັດ ໄດ້ຂຸ້ນຂ້ຽວເຮັດບັດຄ້ອງຄໍໃຫ້ກຳມະການ, ແຂກເຂົ້າຮ່ວມ ແລະ ນັກກິລາຈາກພາກສ່ວນຕ່າງໆ ໃຫ້ສຳເລັດກ່ອນມື້ເປີດ. ສ່ວນກໍາມະການຂົນສົ່ງໄດ້ຈັດຈຸດພັກ-ຈຸດຈອດລົດຕາມສະໜາມແຂ່ງຂັນຕ່າງໆ ເພື່ອໃຫ້ສະດວກ-ປອດໄພ, ກໍາມະການສຸຂະພາບ-ການແພດ ໄດ້ອອກແຈ້ງການຮັບປະກັນປ້ອງກັນການ ລະບາດພະຍາດໂຄວິດ-19 ແລະ ພະຍາດຕາມລະດູການ, ໄດ້ອົບຮົມທີມງານແພດປະຈໍາສະໜາມແຂ່ງ ຂັນ, ຈຸດພັກເຊົາຂອງແຂກການນໍາ ແລະ ຈຸດປະສານງານຂອງສະຖານທີ່ພັກນັກກິລາພາກສ່ວນຕ່າງໆ.
ທ່ານ ບຸນເລື່ອນ ກ່າວອີກວ່າ: ໃນໄລຍະຈັດມະຫະກຳກິລາແຫ່ງຊາດຄັ້ງທີ XI, ໂຮງຮຽນ 19 ແຫ່ງ ຈະປິດການຮຽນ-ການສອນຊົ່ວຄາວເພື່ອໃຊ້ເປັນທີ່ພັກຄູຝຶກ, ນັກກິລາຈາກພາກສ່ວນຕ່າງໆເລີ່ມພັກຮຽນແຕ່ວັນທີ 14 ພະຈິກ ຫາ ວັນທີ 25 ທັນວາ 2022. ສ່ວນບັນດາໂຮງຮຽນພາຍໃນເທສະບານເມືອງແປກ ກຸ່ມ 1, 2, 3 ໃຫ້ພັກຮຽນເລີ່ມແຕ່ວັນທີ 1-25 ທັນວາ 2022 ແລະ ຈະປິດການຮຽນ-ການສອນທຸກໂຮງ ຮຽນທົ່ວແຂວງທັງພາກລັດ-ເອກະຊົນເລີ່ມແຕ່ວັນທີ 13-25 ທັນວາ 2022 ແລະ ໃຫ້ທຸກລະບົບການຮຽນ ການສອນທັງພາກລັດ ແລະ ເອກະຊົນ ສືບຕໍ່ຈັດຕັ້ງການຮຽນ-ການສອນເລີ່ມແຕ່ວັນທີ 26 ທັນວາ 2022 ເປັນຕົ້ນໄປ.