ອົງການໄອຍະການປະຊາຊົນສູງສຸດ ມອບປື້ມປະມວນກົດໝາຍອາຍາ ແລະ ກົດໝາຍວ່າດ້ວຍການດຳເນີນຄະດີອາຍາ ໃຫ້ກະຊວງປ້ອງກັນຄວາມສະຫງົບ

ວັນທີ 18 ພະຈິກ 2022 ຜ່ານມາ, ທ່ານ ພຸດທະວົງ ບົວລະພາ ຫົວໜ້າຫ້ອງການອົງການໄອຍະການປະຊາຊົນສູງສຸດ ພ້ອມດ້ວຍຄະນະ ໄດ້ນຳເອົາປື້ມປະມວນກົດໝາຍອາຍາ ແລະ ກົດໝາຍວ່າດ້ວຍການດຳເນີນຄະດີອາຍາ ຈຳນວນ 1000 ຫົວ ມາມອບໃຫ້ຫ້ອງວ່າການກະຊວງປ້ອງກັນຄວາມສະຫງົບ ໂດຍກ່າວຮັບແມ່ນ ທ່ານ ພົຈວ ພອນໄຊ ຍົດສົມບັດ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ.

ເພື່ອເປັນບ່ອນອີງພື້ນຖານໃຫ້ແກ່ເຈົ້າໜ້າທີ່ຕໍາຫລວດ ໄດ້ຮຽນຮູ້, ຄົ້ນຄວ້າ ແລະ ເຂົ້າໃຈ, ກຳແໜ້ນຕໍ່ນິຕິກຳ, ກົດໝາຍຕ່າງໆ ທີ່ພັກລັດວາງອອກຢ່າງເຂັ້ມງວດ ໂດຍຫັນເອົາການຄຸ້ມຄອງພັກ, ຄຸມຄອງລັດດ້ວຍກົດໝາຍ ໃນການແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນທົ່ວສັງຄົມ, ໂດຍສະເພາະແມ່ນເຈົ້າໜ້າທີ່ສືບສວນ-ສອບສວນ ທັງຢູ່ຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ໃນການຈັດຕັ້ງປະຕິບັດວຽກງານໃຫ້ຖືກຕ້ອງສອດຄ່ອງກັບກົດໝາຍໃນປັດຈຸບັນ.

ດັ່ງນັ້ນ, ການນຳຂອງອົງການໄອຍະການປະຊາຊົນສູງສຸດ ຈຶ່ງເຫັນໄດ້ຄວາມສຳຄັນໃນການປະຕິບັດໜ້າທີ່ວຽກງານທີ່ຍັງມີຄວາມຫຍຸ້ງຍາກ ໂດຍສະເພາະປື້ມກົດໝາຍແມ່ນຍັງບໍ່ທັນທົ່ວເຖິງ ຫລື ເວົ້າອີກຢ່າງໜຶ່ງວ່າຍັງບໍ່ທັນພຽງພໍເປັນຕົ້ນແມ່ນ ບັນດາ ປກສ ແຂວງ, ປກສ ເມືອງ, ສະຖາບັນການສຶກສາຕ່າງໆ ຂອງກໍາລັງປ້ອງກັນຄວາມສະຫງົບ ສະນັ້ນ, ຈຶ່ງໄດ້ມອບປື້ມກົດໝາຍດັ່ງກ່າວ ໃຫ້ກະຊວງປ້ອງກັນຄວາມສະຫງົບ ເພື່ອເອົາໄປນຳໃຊ້ໃຫ້ເກີດຜົນປະໂຫຍດສູງສຸດ ເພື່ອເຮັດໃຫ້ການດຳເນີນຄະດີຂອງເຈົ້າໜ້າທີ່ສືບສວນ-ສອບສວນ ໄປຕາມບົດບັນຍັດຂອງກົດໝາຍ ແລະ ເປັນເອກະພາບກັນໃນຂອບເຂດທົ່ວປະເທດຢ່າງເຂັ້ມງວດ.