ປະທານ ຟີຟາ ບໍ່ປິດໂອກາດ ສປປ ເກົາຫລີ ຮັບໜ້າທີ່ເປັນເຈົ້າພາບບານໂລກ

ຈານນີ ອິນຟານຕີໂນ ປະທານສະຫະພັນບານເຕະນາໆຊາດ (ຟີຟາ) ເປີດເຜີຍວ່າບໍ່ປິດໂອກາດຫາກ ສປປ ເກົາຫລີ ຢາກຈະຮັບໜ້າທີ່ເປັນເຈົ້າພາບບານໂລກໃນອະນາຄົດ.

ໂດຍ ອິນຟານຕີໂນ ໄດ້ເປີດເຜີຍເລື່ອງລາວດັ່ງກ່າວໃນລະຫວ່າງງານຖະແຫລ່ງຂ່າວກ່ອນເປີດສາກບານເຕະໂລກ 2022 ທີ່ກາຕ້າ ໂດຍລະບຸວ່າ ທຸກປະເທດໃນໂລກສາມາດມີສິດເປັນເຈົ້າພາບບານໂລກໄດ້ ບໍ່ເວັ້ນແມ່ນແຕ້ ສປປ ເກົາຫລີ ເພາະຟີຟາ ເປັນອົງການທີ່ຕ້ອງການຊ່ວຍລວມທຸກປະເທດໃນໂລກໃຫ້ເປັນຫນຶ່ງດຽວ.

“ ຟີຟາ ເປັນອົງການບານເຕະລະດັບໂລກ ເຮົາເປັນຄົນບານເຕະ ບໍ່ແມ່ນນັກການເມືອງ ແລະ ເຮົາຕ້ອງການນຳຜູ້ຄົນມາລວມກັນ ປະເທດໃດໆ ກໍສາມາດຈັດງານໄດ້ ຫາກ ສປປ ເກົາຫລີ ຕ້ອງການເປັນເຈົ້າພາບບາງຢ່າງ ”.

“ ຂ້ອຍໄປ ສປປ ເກົາຫລີ ເມື່ອຫລາຍປີກ່ອນເພື່ອຖາມປະຊາຊົນວ່າ ພວກເຂົາພ້ອມທີ່ຈະເປັນເຈົ້າພາບບານໂລກຍິງກັບ ສ.ເກົາຫລີ ຫລື ບໍ່ ເຫັນໄດ້ຈະແຈ້ງວ່າ ບໍ່ປະສົບຄວາມສຳເລັດ ແຕ່ຂ້ອຍຈະໄປອີກ 100 ຄັ້ງ ຖ້າມັນຈະຊ່ວຍໄດ້ ”.

“ ການມີສ່ວນຮ່ວມເທົ່ານັ້ນທີ່ຈະນຳມາເຊິ່ງການປ່ຽນແປງທີ່ແທ້ຈິງ ເຮົາເປັນອົງການລະດັບໂລກ ແລະ ຕ້ອງການທີ່ຈະຍັງຄົງເປັນອົງການທີ່ຮ່ວມໂລກເປັນຫນຶ່ງດຽວ ”.

ທັງນີ້ ສປປ ເກົາຫລີ ບໍ່ໄດ້ລົງແຂ່ງຂັນບານໂລກຮອບສຸດທ້າຍຕັ້ງແຕ່ປີ 2010 ຂະນະທີ່ປັດຈຸບັນພວກເຂົາຢູ່ໃນອັນດັບທີ 112 ຂອງໂລກ.