ໂຄງການກໍ່ສ້າງເຂື່ອນໄຟຟ້ານໍ້າຮຸ່ງ 1 ເມືອງໄຊຍະບູລີ ມີຄວາມຄືບໜ້າແລ້ວ 99,89%

ແຫ່ລງຂ່າວຈາກແຂວງໄຊຍະບູລີໃຫ້ຮູ້ວ່າ: ກອງປະຊຸມຄະນະຊີ້ນໍາຮ່ວມໂຄງການເຂື່ອນໄຟຟ້ານໍ້າຮຸ່ງ 1 ເມືອງໄຊຍະບູລີ ໄດ້ຈັດຂຶ້ນໃນ ວັນທີ 17 ພະຈິກ 2022 ນີ້ ທີ່ຫ້ອງປະຊຸມພະແນກພະລັງງານ ແລະ ບໍ່ແຮ່ ໂດຍໃຫ້ກຽດເຂົ້າຮ່ວມເປັນປະທານ ຂອງທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍພະນັກງານວິຊາການ ແລະ ອໍານາດການປົກຄອງບ້ານທີ່ໄດ້ຮັບຜົນກະທົບຈາກໂຄງການເຂົ້າຮ່ວມ.

ທ່ານ ພອນພິໄຊ ພົມພິພັກ ຫົວໜ້າໂຄງການກໍ່ສ້າງເຂື່ອນໄຟຟ້ານໍ້າຮຸ່ງ 1 ເມືອງໄຊຍະບູລີ ໄດ້ລາຍງານໃນກອງປະຊຸມຄະນະຊີ້ນໍາຮ່ວມໂຄງການເຂື່ອນໄຟຟ້ານໍ້າຮຸ່ງ 1 ທີ່ໄດ້ຈັດຂຶ້ນໃນຕອນບ່າຍຂອງວັນທີ 17 ພະຈິກ 2022 ນີ້ ທີ່ຫ້ອງປະຊຸມພະແນກພະລັງງານ ແລະ ບໍ່ແຮ່ ແຂວງໄຊຍະບູລີ ວ່າ: ມາຮອດປັດຈຸບັນໂຄງການກໍ່ສ້າງເຂື່ອນໄຟຟ້ານໍ້າຮຸ່ງ 1 ເມືອງໄຊຍະບູລີ ແມ່ນສໍາເລັດແລ້ວ 99,89 % ຂອງໜ້າວຽກທັງໝົດ ເຊິ່ງເຂື່ອນດັ່ງກ່າວ ເປັນເຂື່ອນເຮັດດ້ວຍເບຕົງເສີມເຫຼັກ ຄວາມສູງຂອງສັນເຂື່ອນ 34,17 m, ລະດັບຄວາມສູງ ຂອງສັນເຂື່ອນ 276,17 m, ຄວາມຍາວຂອງສັນເຂື່ອນ 235 m, ຄວາມກວ້າງຂອງສັນເຂື່ອນ 7,90 m, ຄວາມກວ້າງຂອງຕີນເຂື່ອນ 39 m ມີເຄື່ອງປັ້ນໄຟ 3 ໜ່ວຍ ປະເພດກົງຫັນໜ່ວຍໜຶ່ງ. ສາມາດຜະລິດກະແສໄຟຟ້າໄດ້ 5 ເມກາວັດ, ມີກໍາລັງຕິດຕັ້ງລວມ 15 ເມກາວັດ ພະລັງງານໄຟຟ້າຜະລິດສະເລ່ຍ 71.767.500 ກິໂລວັດໂມງ ຕໍ່ປີ.

ປະລິມານນໍ້າໄຫລກົງຫັນທັງໝົດ 28,7 m3 /s ຄວາມສູງຂອງນໍ້າຕົກທັງໝົດ 24 m ຄວາມສູງຂອງນໍ້າຕົກມີປະສິດທິຜົນ 20 m ມີສາຍສົ່ງໄຟຟ້າ 22 kv ມີຄວາມຍາວ 32 km ແຕ່ໂຄງການຫາສະຖານີໄຟຟ້າໂຄກທານາເມືອງໄຊຍະບູລີ ປະລິມານນໍ້ານອງອອກແບບ 4.431,10 m3 /s ຄວາມຍາວຂອງສັນປ່ອຍລະບາຍນໍ້າລົ້ນຍາວ 60 m ປະຕູລະບາຍນໍ້າລົ້ນມີ 5 ປ່ອງ ມີຂະໜາດ 12×12,5 m ສາມາດລະບາຍນໍ້າໄດ້ 6.677,88 m3/s ເປັນປະຕູປິດ-ເປີດ ດ້ວຍລະບົບໄຮໂດຼລິກ ມີປະຕູລະບາຍຕະກອນ 1 ປ່ອງ ຂະໜາດ 5x5m ສາມາດລະບາຍຕະກອນໄດ້ 348,50 m3/s ເຂື່ອນໄຟຟ້ານໍ້າຮຸ່ງ 1 ສາມາດຜະລິດໄຟຟ້າຂາຍອອກໄດ້ 57.398.544 ກິໂລວັດໂມງຕໍ່ປີ. ໂດຍແມ່ນບໍລິສັດໄຟຟ້າລາວເປັນຜູ້ຮັບຊື້ໃນລາຄາສະເລ່ຍ 6,5 ກີບ ຕໍ່ກິໂລວັດໂມງ ຄາດຄະເນຈະມີລາຍຮັບໃນການຂາຍພະລັງງານໄຟຟ້າ 3.730.905$ ຕໍ່ປີ ຜູ້ສໍາປະທານກໍ່ສ້າງລົງທຶນແມ່ນບໍລິສັດສີເມືອງກຼູບຈໍາກັດເອກະຊົນ 100% ເຊິ່ງໄດ້ເລີ່ມກໍ່ສ້າງມາແຕ່ ປີ 2015 ລວມມູນຄ່າຂອງໂຄງການ 34.744. 800 ໂດລາສະຫະລັດ. ໃນນີ້ ມີທຶນກູ້ຢືມຈາກທະນາຄານ JDB 50% ແລະ ບໍລິສັດສີເມືອງກຼູບ 50%.

ທ່ານຍັງໄດ້ກ່າວຕື່ມວ່າ: ດ້ານການຊົດເຊີຍຜົນກະທົບທັງໝົດຂອງໂຄງການ ມີທັງໝົດ 6.616.169.159 ກີບ ໃນນີ້ ຊົດເຊີຍຂຸມຝັງສົບ, ຕອນດິນວັດທະນະທໍາຫ້ວຍນໍ້າໃສ ແລະ ເສັ້ນທາງຕັດໃໝ່ ແລະ ສາຍສົ່ງທີ່ຍັງຕົກຄ້າງ, ໂຮງຮຽນປະຖົມ ແລະ ຫ້ອງການບ້ານຫ້ວຍແກ້ງ ແລະ ມາຮອດປັດຈຸບັນການຊົດເຊີຍຜົນກະທົບຈາກໂຄງການຍັງພິຈາລະນາ ແລະ ກວດກາເອກະສານຄືນ ຜົນກະທົບຕໍ່ເຮືອນພັກຫ້ວຍນໍ້າໃສໃນມູນຄ່າ 573 ລ້ານກວ່າກີບ.