ອັນໂຕນີ ສະຫລອງຄວາມສຳເລັດຕິດທີມຊາດບຣາຊີວ ຈ່າຍເງິນໄປ 337.000 ປອນ(ປະມານ 6.990 ລ້ານກີບ) ຊື້ລົດຫລູແລັມໂບກີນີ ຕົບລາງວັນໃຫ້ໂຕເອງ
ອັນໂຕນີ ແນວບຸກຂອງ ແມນເຊັສເຕີ ຢູໄນເຕັດ ສະຫລອງຄວາມສຳເລັດທີ່ຖືກເອີ້ນຕິດທີມຊາດບຣາຊີວ ດ້ວຍການຈ່າຍເງິນໄປພຽງເລັກນ້ອຍເພື່ອຊື້ ແລັມໂບກີນີ ລົດຫລູຊຸບເປີຄາມາປະດັບບາລະມີ.
ຍອດນັກເຕະຊາວແຊັມບາ ສ້າງຜົນງານໄດ້ຢ່າງໂດດເດັ່ນກັບທັບ “ຜີສາດແດງ” ຕັ້ງແຕ່ຍ້າຍຈາກ ອາແຈັກ ອຳສະເຕີດຳ ມາຫລິ້ນຢູ່ທີ່ ໂອແທຣັບຟອດໃນລະດູການນີ້
ຫລ້າສຸດ, ປີກຈອມພີ້ວອາຍຸ 22 ປີໄດ້ຖືກເອີ້ນຈາກ ຕີເຕ້ ເປັນ 1 ໃນ 26 ນັກຮົບສໍາລັບບານໂລກ 2022 ທີ່ປະເທດກາຕ້າທີ່ຈະເລີ່ມຕົ້ນໃນທ້າຍອາທິດນີ້
ສໍາລັບການຕິດທີມແຊັມບາຄັ້ງນີ້ຈະເຮັດໃຫ້ ອັນໂຕນີ ໄດ້ລຸຍການແຂ່ງຂັນບານໂລກເປັນຄັ້ງທໍາອິດໃນຊີວິດຂອງລາວ ແລະ ເພື່ອເປັນການສະຫລອງຄວາມສໍາເລັດນີ້ ລາວເອົາເງິນ£ 337,000 (ປະມານ 6.990 ລ້ານກີບ) ເພື່ອຊື້ ແລັມໂບກີນີ ລຸ້ນ Aventador ມາຈອດຫລິ້ນໃນໂຮງລົດເລີຍ
ອັນໂຕນີ ໂພສຄລິບວີດີໂອຜ່ານ ອິນສະຕາແກຣມ ໃນຂະນະທີ່ລາວຮູ້ສຶກດີໃຈທີ່ສຸດທີ່ໄດ້ເຫັນລົດຊຸບເປີຄາລົດທີ່ນິຍົມຂອງບັນດາຄົນດັງ ສີຂີ້ເຖົ່າເປັ່ງປະກາຍຈອດຢູ່ຕໍ່ໜ້າໂດຍມີຄົນຂາຍລົດຄົນໜຶ່ງຢືນຢູ່ຂ້າງໆ ນອກຈາກນັ້ນລາວຍັງຂັບລົດໃຫ້ເຫັນເປັນຄັ້ງທໍາອິດໃນຄລິບອີກດ້ວຍ.
