ເຈົ້າໜ້າທີ່ໄທ ຈັບຮ້ານຂາຍຢາສູບໄຟຟ້າອອນລາຍ ລາຍໃຫຍ່ ພ້ອມຍຶດຂອງກາງ

ສຳນັກຂ່າວຕ່າງປະເທດລາຍງານໃຫ້ຮູ້ວ່າ: ວັນທີ 17 ພະຈິກ 2022 ນີ້, ເຈົ້າໜ້າທີ່ຕຳຫລວດຮ່ວມກັນຖະແຫລ່ງຜົນປະຕິບັດການທຳລາຍເຄືອຂ່າຍຢາສູບໄຟຟ້າ ລາຍໃຫຍ່ ພ້ອມຍຶດຂອງກາງ 80 ລ້ານບາດ ແລະ ຈັບກຸມ ທ້າວ ສັນຕິ ອາຍຸ 23 ປີ ຜູ້ຕ້ອງຫາໄດ້ທີ່ ຈັງຫວັດ ສະລະບູຣີ.

ເຈົ້າໜ້າທີ່ ກ່າວວ່າ: ໄດ້ຮັບແຈ້ງວ່າພົບການລັກລອບນຳເຂົ້າຢາສູບໄຟຟ້າ ແລະ ນ້ຳຢາ ມາຂາຍຜ່ານເວັບໄຊ, ອິນຕຣາແກຣມ, @ thisissalts_official ແລະ ເພຈເຟສບຸກ thisissaltsofficial ເຊິ່ງສົ່ງຜ່ານຂົນສົ່ງຈາກ ອຳເພີ ຕາກໃບ ຈັງຫວັດ ນາຣາທິວາດ ໄປທີ່ ອຳເພີ ໜອງແຄ ຈັງຫວັດສະລະບູຣີ ຕຳຫລວດຈຶ່ງຈັບກຸມຜູ້ຕ້ອງຫາ ຂະນະທີ່ກຳລັງຂົນສິນຄ້າມາສົ່ງ ຈາກການລວບລວມທັງໝົດ ພົບນ້ຳຢາສຳຫລັບເຕີມຢາສູບໄຟຟ້າ 514,000 ອັນ ອຸປະກອນຢາສູບໄຟຟ້າ 4,000 ອັນ ມີມູນຄ່າ 80 ລ້ານບາດ.

ເບື້ອງຕົ້ນຕຳຫລວດແຈ້ງຂໍ້ຫາຝ່າຝືນຄຳສັ່ງຄະນະກຳມະການຄຸ້ມຄອງຜູ້ບໍລິໂພກເຊິ່ງຫ້າມຂາຍບາຣາກູ ຫລື ຢາສູບໄຟຟ້າ ພ້ອມຍຶດຂອງກາງທັງໝົດໄປທຳລາຍ ພ້ອມສືບສວນຂະຫຍາຍຜົນຜູ້ກະທຳຜິດ ແລະ ປະສານງານກັບກະຊວງດິຈິຕອນ ແລະ ສັງຄົມ ປິດເວັບໄຊທີ່ລອບຂາຍສິນຄ້າຜິດກົດໝາຍໃນຊ່ອງທາງອອນລາຍອີກຕໍ່ໄປ