ມຽນມາປະກາດຫລຸດຜ່ອນໂທດໃຫ້ນັກໂທດ 5.774 ຄົນເນື່ອງໃນວັນຊາດ

ສະຖານີວິທະຍຸໂທລະພາບແຫ່ງຊາດມຽນມາ (MRTV) ລາຍງານວ່າ: ສະພາບໍລິຫານແຫ່ງລັດຂອງມຽນມາໄດ້ປະກາດອະໄພຍະໂທດໃຫ້ນັກໂທດ 5.774 ຄົນໃນວັນທີ 17 ພະຈິກ ເນື່ອງໃນວັນຊາດຂອງມຽນມາ ເຊິ່ງລວມທັງອະດີດລັດຖະມົນຕີ, ສິລະປິນ ແລະ ຊາວຕ່າງປະເທດ 4 ຄົນ.

ລາຍງານລະບຸວ່າ: ການຫລຸດໂທດຄັ້ງນີ້ມີຂຶ້ນເນື່ອງໃນວັນຊາດຂອງມຽນມາ ແລະ ເພື່ອເຫດຜົນດ້ານມະນຸດສະທຳ ລວມທັງການພົວພັນກັບຕ່າງປະເທດ.

ນອກຈາກນີ້, ສະພາບໍລິຫານແຫ່ງລັດຂອງມຽນມາຍັງສັ່ງປິດຄະດີກັບສິລະປິນ 11 ຄົນທີ່ຍັງຖືກດຳເນີນຄະດີໃນສານຕ່າງໆ ເນື່ອງໃນວັນຊາດນຳອີກ.

ສຳນັກຂ່າວຊິນຮົວລາຍງານວ່າ: ມຽນມາອະໄພຍະໂທດໃຫ້ນັກໂທດແລ້ວ 1.619 ຄົນ ລວມທັງນັກໂທດຕ່າງປະເທດ 42 ຄົນ ໃນວັນປີໃໝ່ຕາມປະເພນີ ໃນເດືອນເມສາຂອງປີນີ້.