ເມືອງທ່າແຂກ ກໍ່ສ້າງ ແລະ ຂະຫຍາຍເສັ້ນທາງບ້ານນາເມືອງ ມູນຄ່າການກໍ່ສ້າງປະມານ 10 ຕື້ກວ່າກີບ
November 17, 2022 - 4:35 PM
ຕາມການລາຍງານຈາກ ທ່ານ ຍຸກໄຊ ຈິດຕິລາດລັງສີ ຜູ້ຈັດການໂຄງການ ບໍລິສັດ PPST ກໍ່ສ້າງຄົບວົງຈອນ ໃນນາມຜູ້ຮັບເໝົາ ໄດ້ໃຫ້ຮູ້ກ່ຽວກັບການຈັດຕັ້ງປະຕິບັດ ໂຄງການກໍ່ສ້າງ ແລະ ຂະຫຍາຍເສັ້ນທາງ ແຕ່ 3 ແຍກອ່າງນໍ້າປະປາ ບ້ານຈອມແກ້ວ ຫາ ບ້ານນາເມືອງ ເມືອງທ່າແຂກ ແຂວງຄຳມ່ວນ ຄາດວ່າຈະໃຫ້ສຳເລັດ 100% ພາຍໃນທ້າຍເດືອນທັນວາ 2022 ນີ້ ລວມມູນຄ່າການກໍ່ສ້າງປະມານ 10 ຕື້ກວ່າກີບ.
ເສັ້ນທາງດັ່ງກ່າວ ມີຄວາມຍາວ 3,2 ກິໂລແມັດ, ເປັນປະເພດທາງປູຢາງ 2 ຊັ້ນ: ກວ້າງ 9 ແມັດໄດ້ເລີ່ມລົງມືຈັດຕັ້ງປະຕິບັດ ໃນວັນທີ 2 ພະຈິກ 2022 ໂດຍແບ່ງອອກເປັນ 2 ທີມງານ, ໃນແຕ່ລະທີມແມ່ນມີວິຊາການ ແລະ ເຄື່ອງກົນຈັກຢ່າງພຽງພໍ ເພື່ອເລັ່ງລົງມືຈັດຈັ້ງປະຕິບັດບັນດາໜ້າວຽກຕ່າງໆ ເປັນຕົ້ນ ການລອກດິນໜ້າທາງເດີມ, ຕັດໄມ້, ບຸກເບີກສິ່ງກີດຂວາງ ແລະ ລົງດິນຊັ້ນຍົກລະດັບ.
ໂອກາດນີ້, ທ່ານ ຍຸກໄຊ ຍັງໄດ້ແຈ້ງມາຍັງປະຊາຊົນ ຈົ່ງລະມັດລະວັງໃນການນຳໃຊ້ເສັ້ນທາງດັ່ງກ່າວ ເພາະປັດຈຸບັນ ແມ່ນຢູ່ໃນໄລຍະກໍ່ສ້າງ, ການສັນຈອນຈຶ່ງມີຄວາມຫຍຸ້ງຍາກ. ພ້ອມນີ້, ກໍ່ຮຽກຮ້ອງມາຍັງພໍ່ແມ່ປະຊາຊົນ ຈົ່ງໃຫ້ການຮ່ວມມື ເພື່ອເຮັດໃຫ້ການກໍ່ສ້າງສຳເລັດຕາມລະດັບຄາດໝາຍທີ່ວາງໄວ້.
