3 ຊາດ ລາວ-ໄທ-ມຽນມາ ຍົກສູງການຮ່ວມມືການຕ້ານ ແລະ ສະກັດກັ້ນອາຊະຍາກໍາຢາເສບຕິດ ຂົງເຂດສາມຫລ່ຽມຄຳ
ກອງປະຊຸມຮ່ວມມືວຽກງານໄອຍະການໃນຂົງເຂດສາມຫລ່ຽມຄຳ ລາວ-ໄທ-ມຽນມາ ຄັ້ງທີ II ໃນການຕ້ານ ແລະ ສະກັດກັ້ນ ອາຊະຍາກໍາຢາເສບຕິດ ໄດ້ມີຂຶ້ນໃນວັນທີ 16 ພະຈິກ 2022 ຢູ່ແຂວງຫລວງພະບາງ ສປປ ລາວ, ໂດຍ ການເຂົ້າຮ່ວມຂອງ ທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ, ທ່ານ ຈຸມພົນ ພັນສໍາລິດ ຮອງໄອຍະການສູງສຸດ ແຫ່ງ ຣາຊະອານາຈັກໄທ, ທ່ານ ນາງ ສະເວ ສະເວ ອອງ ຫົວໜ້າກົມກົດໝາຍສາກົນ ສໍານັກງານໄອຍະການສູງສຸດ ແຫ່ງ ສະຫະພາບ ມຽນມາ.
ເພື່ອຍົກສູງການຮ່ວມມືວຽກງານໄອຍະການໃນຂົງເຂດສາມຫລ່ຽມຄໍາ ໃນການຕ້ານອາຊະຍາກຳຂ້າມຊາດ, ເປັນການຈັດຕັ້ງຜັນຂະຫຍາຍວິໄສທັດ ປະຊາຄົມອາຊຽນ ກໍຄືການຈັດຕັ້ງປະຕິບັດແຜນແມ່ບົດສໍາລັບສາມເສົາຄໍ້າປະຊາຄົມອາຊຽນ, ແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີສາມ ແລະ ແຜນແມ່ບົດເພື່ອການເຊື່ອມຈອດອາຊຽນ 2025 ຢ່າງມີປະສິດທິຜົນ.
ໃນກອງປະຊຸມໄດ້ທົບທວນການຈັດຕັ້ງປະຕິບັດຜົນຂອງກອງປະຊຸມຮ່ວມມືວຽກງານໄອຍະການໃນຂົງເຂດສາມຫລ່ຽມຄຳ ລາວ-ໄທ-ມຽນມາ ຄັ້ງທີ I ທີ່ຈັດຂຶ້ນຢູ່ແຂວງ ຊຽງລາຍ ຣາຊະອານາຈັກໄທ ໃນປີ 2018, ໄດ້ຮັບຟັງການນໍາສະເໜີກ່ຽວກັບພື້ນຖານທາງດ້ານກົດໝາຍທີ່ກ່ຽວຂ້ອງໃນການຕ້ານ ແລະ ສະກັດກັ້ນ ອາຊະຍາກໍາຢາເສບຕິດ; ສະເໜີກ່ຽວກັບກົດໝາຍ ແລະ ວິທີການຈັດຕັ້ງປະຕິບັດການຮ່ວມມືລະຫວ່າງປະເທດໃນບັນຫາອາຍາ ຂອງ ສປປ ລາວ, ລາຊະອານາຈັກໄທ ແລະ ສະຫະພາບມຽນມາ. ພ້ອມຍັງໄດ້ປຶກສາຫາຫລື ແລະ ຮ່ວມກັນຊອກຫາວິທີຮັບມື ແລະ ປາບປາມອາຊະຍາກໍາຂ້າມຊາດ ໂດຍສະເພາະການຄ້າ-ຂາຍຢາເສບຕິດໃນບໍລິເວນຊາຍແດນສາມຫລ່ຽມຄໍາ ຢ່າງມີປະສິດທິພາບ, ປະສິດທິຜົນ ແລະ ທັນການ.
ນອກນີ້ກໍເຫັນວ່າບັນຫາອາຊະຍາກຳຂ້າມຊາດ ໂດຍສະເພາະອາຊະຍາກໍາຢາເສບຕິດ ໄດ້ກາຍເປັນບັນຫາລວມຂອງໂລກ ອັນເປັນໄພຂົ່ມຂູ່ຕໍ່ຄວາມໝັ້ນຄົງຂອງບັນດາປະເທດໃນພາກພື້ນ ແລະ ໃນໂລກ. ໃນແຕ່ລະປີບັນຫາອາຊະຍາກໍາຢາເສບຕິດບໍ່ພຽງແຕ່ສ້າງຄວາມເສຍຫາຍແກ່ຊີວິດ ແລະ ຊັບສິນຂອງປະຊາຊົນຢ່າງມະຫາສານເທົ່ານັ້ນ ແຕ່ຍັງເປັນອຸປະສັກຕໍ່ການພັດທະນາເສດຖະກິດ-ສັງຄົມຂອງບັນດາປະຊາຊາດ ແລະ ການຮ່ວມມືໃນພາກພື້ນອີກດ້ວຍ. ດັ່ງນັ້ນ, ເພື່ອຕ້ານກັບບັນຫາອາຊະຍາກຳດັ່ງກ່າວໄດ້ຢ່າງມີປະສິດທິຜົນ ແລະ ທັນການ, ຮຽກຮ້ອງໃຫ້ບັນດາປະຊາຊາດ ກໍຄືບັນດາປະເທດສະມາຊິກອາຊຽນ ຕ້ອງໄດ້ເພີ່ມທະວີການຮ່ວມມືກັນຢ່າງຮອບດ້ານ ຊຶ່ງລວມທັງການປະສານງານ, ການແລກປ່ຽນຂໍ້ມູນຂ່າວສານ ແລະ ການສົ່ງເສີມຄວາມສາມາດຂອງພະນັກງານ ໂດຍຜ່ານບັນດານິຕິກໍາຕ່າງໆຂອງສາກົນ ແລະ ພາກພື້ນ.
