UN ເຜີຍປະຊາກອນໂລກເຖິງ 8 ພັນລ້ານ ອິນເດຍອາດມີປະຊາກອນຫລາຍກວ່າຈີນປີໜ້າ
ໃນໂອກາດທີ່ປະຊາກອນໂລກປັດຈຸບັນ ມີຈຳນວນເຖິງ 8 ພັນລ້ານຄົນ ໃນວັນທີ 15 ພະຈິກ ອົງການສະຫະປະຊາຊາດ (UN) ໄດ້ອອກມາເປີດເຜີຍຄາດຄະເນວ່າ: ອິນເດຍອາດກ້າວຂຶ້ນມາເປັນປະເທດທີ່ມີປະຊາກອນຫລາຍທີ່ສຸດໃນໂລກແຊງຈີນໃນປີໜ້າ.
ສຳນັກຂ່າວ CNBC ລາຍງານວ່າ: ປະຊາກອນໂລກມີຈຳນວນເພີ່ມຂຶ້ນຫລາຍກວ່າ 3 ເທົ່າ ນັບແຕ່ປີ 1950 ເນື່ອງຈາກອັດຕາການເສຍຊີວິດຫລຸດລົງ ແລະ ອາຍຸສະເລ່ຍຂອງມະນຸດເພີ່ມຂຶ້ນ ໂດຍໄດ້ປັດໄຈໜຸນຫລັກຈາກສຸຂາພິບານທີ່ດີຂຶ້ນ, ການເຂົ້າເຖິງນ້ຳດື່ມສະອາດ, ການພັດທະນາວັກຊີນ ແລະ ຢາປະຕິຊີວະນະ ລວມທັງໂພຊະນາການທີ່ດີຂຶ້ນ.
ຂໍ້ມູນຂອງ UN ສະແດງໃຫ້ເຫັນວ່າ: ລະຫວ່າງປີ 1990 ຫາປີ 2019 ອາຍຸສະເລ່ຍເມື່ອເກີດຂອງມະນຸດເພີ່ມຂຶ້ນເກືອບ 9 ປີ ລະດັບອາຍຸ 72 ປີ. ເຖິງຢ່າງໃດກໍຕາມ, ປະຊາກອນໃນປະເທດທຸກຍາກທີ່ສຸດເສຍຊີວິດ 7 ປີກ່ອນຄ່າສະເລ່ຍໂລກພັດເພີ່ມສູງຂຶ້ນ ເນື່ອງຈາກການເສຍຊີວິດຂອງແມ່ ແລະ ເດັກ ລວມທັງສົງຄາມ ແລະ ເຊື້ອໄວຣັສ HIV.
ຂໍ້ມູນລະບຸວ່າ: ອາຍຸສະເລ່ຍຂອງມະນຸດຫລຸດລົງ 1 ປີສູ່ລະດັບ 71 ປີໃນປີ 2021 ເຊິ່ງປັດໄຈຫລັກມາຈາກການແພ່ລະບາດຂອງໂຄວິດ-19. ເຖິງຢ່າງໃດກໍຕາມ, ຄາດວ່າຜູ້ທີ່ເກີດໃນປີ 2050 ຈະມີຊີວິດຢູ່ເຖິງອາຍຸ 77 ປີໂດຍສະເລ່ຍ.
ເຖິງວ່າມະນຸດຈະມີຈຳນວນຫລາຍແບບບໍ່ເຄີຍເປັນມາກ່ອນ, ແຕ່ອັດຕາການເພີ່ມຂຶ້ນພັດຊ້າລົງຫລາຍທີ່ສຸດນັບແຕ່ປີ 1950 ໂດຍຫລາຍຄອບຄົວເລີ່ມມີລູກໜ້ອຍລົງ ເຊິ່ງທາງ UN ຄາດວ່າຈຳນວນປະຊາກອນໂລກຈະເຖິງຈຸດສູງສຸດ 1,04 ໝື່ນລ້ານຄົນໃນໄລຍະປີ 2080 ແລະ ຈະຄົງຢູ່ໃນລະດັບດັ່ງກ່າວຈົນເຂົ້າສູ່ໄລຍະປີ 2097.
ທັງນີ້, ປັດຈຸບັນ 2 ໃນ 3 ຂອງປະຊາກອນອາໄສຢູ່ໃນປະເທດທີ່ຜູ້ຍິງມີລູກ 2 ຄົນໂດຍສະເລ່ຍ ຫລຸດລົງຈາກມີລູກ 5 ຄົນໂດຍສະເລ່ຍໃນປີ 1950 ແລະ ຄາດວ່າປະຊາກອນມີອາຍຸ 65 ປີຂຶ້ນໄປ ຈະເພີ່ມຂຶ້ນ 6% ທົ່ວໂລກຈົນຮອດປີ 2050.
