IOC ປະກາດຈັດສັບປະດາອີສະປອດ ໂອລິມປິກ ຄັ້ງທຳອິດ ປີໜ້າທີ່ສິງກະໂປ
ຄະນະກຳມະການໂອລິມປິກສາກົນ ຫລື IOC ອອກມາຢືນຢັນວ່າ ຈະມີການຈັດສັບປະດາອີສະປອດ ໂອລິມປິກ ຂຶ້ນເປັນຄັ້ງທຳອິດ ທີ່ປະເທດສິງກະໂປ ລະຫວ່າງວັນທີ 22-25 ມິຖຸນາ 2023.
E-Sport ໄດ້ເລີ່ມມີການຈັດການແຂ່ງຂັນໃນມະຫະກຳກິລາເຊ່ັນກິລາຊີເກມ ທັງປີ 2019 ທີ່ປະເທດຟີລິບປິນ ແລະ ຄັ້ງຫລ້າສຸດທີ່ປະ ເທດ ສສ.ຫວຽດນາມ ສ່ວນມະຫະກຳກິລາເອຊຽນເກມ ພວມຈະມີການຊີງຫລຽນກັນໃນການແຂ່ງຂັນທີ່ປະເທດ ສປ ຈີນ ໃນປີຫນ້າ ແຕ່ກິລາໂອລິມປິກ ນັ້ນກໍຈະມີທິດທາງດີຂຶ້ນ.
ເມື່ອຫລ້າສຸດທາງເວັບໄຊຂອງໂອລິມປິກ ອອກມາປະກາດວ່າຄະນະກຳມະການໂອລິມປິກສາກົນ ຫລື IOC ໄດ້ຢືນຢັນຈະມີການ ຈັດສັບປະດາອີສະປອດໂອລິມປິກ ທີ່ປະເທດສິງກະໂປ ລະຫວ່າງວັນທີ 22-25 ມິຖຸນາ ປີ 2023 ເຊິ່ງຖືເປັນກ້າວສຳຄັນຂອງ ອີສະປອດ ທີ່ຈະໄດ້ເຂົ້າຮ່ວມເປັນສ່ວນຫນຶ່ງຂອງມະຫະກຳກິລາທີ່ຍິ່ງໃຫຍ່ທີ່ສຸດໃນໂລກຢ່າງໂອລິມປິກ.
ໂດຍຂໍ້ມູນເບື້ອງຕົ້ນກ່ຽວກັບງານດ່ັງກ່າວມີການເປີດເຜີຍວ່າຈະມີການສະແດງກິລາເຫມືອນຈິງ ຫລື Virtual Sport ກິລາທີ່ມີການປະສົມປະສານທີ່ເອີ້ນວ່າ Hybrid physical and simulated sports ລວມເຖິງຕະຫລາດນັດກ່ຽວກັບ ເທັກໂນໂລຢີຕ່າງໆ ແລະ ໂຊແມັດ ນຳອີກ.
