ເອັນກຸນກູ ໂຊກຮ້າຍບາດເຈັບຕອນຊ້ອມ ຕ້ອງຖອນໂຕຈາກທີມຊາດຝຣັ່ງ ຊຸດບານໂລກ 2022
ຄຣິສໂຕເຟີ ເອັນກຸນກູ ໂຊກຮ້າຍໄດ້ຮັບບາດເຈັບໃນລະຫວ່າງການຝຶກຊ້ອມ ຕ້ອງຖອນຕົວອອກຈາກທີມຝຣັ່ງ ຊຸດແຂ່ງຂັນບານໂລກ 2022.
ຖືເປັນຂ່າວຮ້າຍທີ່ບໍ່ມີໃຜໃນທີມຊາດຝຣັ່ງຕ້ອງການໃຫ້ມັນເກີດຂຶ້ນເມື່ອ ຄຣິສໂຕເຟີ ເອັນກຸນກູ ກອງຫນ້າຂອງ ໄລປຊິກ ຕ້ອງຖອນຕົວຈາກການແຂ່ງຂັນບານໂລກ 2022 ທີ່ປະເທດກາຕ້າ ຫລັງຈາກທີ່ໂຊກຮ້າຍໄດ້ຮັບບາດເຈັບໃນລະຫວ່າງການຝຶກຊ້ອມ
ທັບ “ກາໄກ່” ແຊ້ມເກົ່າ ມີຄິວລົງແຂ່ງຂັນນັດທໍາອິດຮອບແບ່ງກຸ່ມ ບານໂລກ ພົບກັບ ອົດສະຕຣາລີ ໃນວັນທີ 22 ພະຈິກ. ແຕ່ພວກເຂົາຕ້ອງສູນເສຍ ເອັນກຸນກູ ຫນຶ່ງໃນກອງຫນ້າຂອງທີມທີ່ຖືກເອີ້ນໃຫ້ຮັບໃຊ້ຊາດ ເນື່ອງຈາກການບາດເຈັບ
ລາຍງານເຜີຍໃຫ້ເຫັນວ່າ ເອັນກຸນກູ ອາຍຸ 25 ປີ ໄດ້ຮັບບາດເຈັບຂາເຊິ່ງເກີດຂຶ້ນໃນຂະນະທີ່ຍາດບານກັບເພື່ອນຮ່ວມທີມ ເອດູອາໂດ ກາມາວິນກ້າ ກອງກາງເພື່ອຮ່ວມທີມ ເຊິ່ງທ່ານໝໍໄດ້ປະເມີນແລະພົບວ່າບໍ່ສາມາດຟື້ນຟູຮ່າງກາຍໄດ້ທັນເວລາ ເຮັດໃຫ້ເຂົາຕ້ອງຖອນຕົວອອກຈາກທີມໃນທີ່ສຸດ
ນັບເປັນເລື່ອງໜ້າເສຍດາຍສໍາລັບ ເອັນກຸນກູ ແລະ ທີມຊາດຝຣັ່ງ. ເນື່ອງຈາກວ່າລະດູການນີ້ ລາວຢູ່ໃນຟອມທີ່ດີເລີດ ເປັນຜູ້ຍິງປະຕູສູງສຸດໃນບຸນເດສລີກາ ຫລັງຍິງໄດ້ 12 ປະຕູຈາກ 15 ນັດໃນລີກ, ຂະນະທີ່ຝ່າຍຂອງ ດີດິເອ້ ເດຊັອງ ຍັງບໍ່ທັນປະກາດວ່າຈະເອີ້ນໃຜເຂົ້າມາແທນແຕ່ຢ່າງໃດ.
