ຄວາມຄືບໜ້າການກໍ່ສ້າງທາງປູຢາງ 2 ຊັ້ນຢູ່ແຂວງໄຊສົມບູນ

ທ່ານ ເພັດສະຫວັນ ພັນສະດາ ຫົວໜ້າຂະແໜງຂົວທາງ ແລະ ທາງນໍ້າ ລາຍງານວ່າ: ໂຄງການກໍ່ສ້າງທາງປູຢາງ 2 ຊັ້ນຢູ່ແຂວງໄຊສົມບູນ ເຖິງວ່າໝົດສັນຍາທີ່ປືກສາຄວບຄຸມການກໍ່ສ້າງ 24 ເດືອນ ແລ້ວ, ແຕ່ປັດຈຸບັນກໍາລັງດໍາເນີນຂັ້ນຕອນການສະເໜີຕໍ່ສັນຍາສໍາລັບໜ້າວຽກທີ່ໄດ້ຈັດຕັ້ງປະຕິບັດ, ໃນນີ້ໄດ້ບຸກເບີກ ແລະ ອະນາໄມສໍາເລັດ 100%, ຕັດດິນສໍາເລັດເກືອບ 95%, ຕັດຫີນສໍາເລັດເກືອບ 82%, ດິນຖົມຍົກລະດັບ ສໍາເລັດເກອບ 95%, ດິນຖົມຊັ້ນຮອງພື້ນທາງ ສໍາເລັດກວ່າ 31%, ດິນຖົມຊັ້ນພື້ນທາງ ສໍາເລັດກວ່າ 30%, ປູຢາງຊັ້ນ 1 ສໍາເລັດກວ່າ 27%, ສໍາເລັດການວາງທໍ່ລ່ຽມ 6 ຈຸດ, ຍັງເຫລືອ 7 ຈຸດ ທີ່ຈະສືບຕໍ່ວາງທໍ່ໃຫ້ສຳເລັດ ແລະ ສໍາເລັດທໍ່ກົມ 52 ຈຸດ, ຍັງເຫລືອ 10 ຈຸດ. ສ່ວນໜ້າວຽກຕ່າງໆທີ່ຍັງບໍ່ທັນສໍາເລັດ ກໍຈະສືບຕໍ່ໃຫ້ສໍາເລັດຕາມຄາດໝາຍທີ່ວາງໄວ້.

ແນວໃດກໍດີ, ທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ກ່າວໃນໂອກາດຕິດຕາມຊຸກຍູ້ການກໍ່ ສ້າງ ເສັ້ນທາງດັ່ງກ່າວໃນວັນທີ 11 ພະຈິດ 2022 ໂດຍເນັ້ນໃຫ້ພາກສ່ວນກ່ຽວຂ້ອງໂດຍສະເພາະຄະນະກໍາມະການ, ເຈົ້າຂອງໂຄງການ ແລະ ບໍລິສັດຮັບເໝົາກໍ່ສ້າງຈົ່ງພ້ອມກັນເອົາໃຈໃສ່ສືບຕໍ່ແກ້ໄຂ ແລະຈັດ ຕັ້ງປະຕິບັດທຸກໜ້າວຽກໃຫ້ສໍາເລັດເພື່ອເຮັດໃຫ້ປະຊາຊົນບັນດາເຜົ່າ ສາມາດສັນຈອນໄປ-ມາ ດ້ວຍຄວາມສະດວກສະບາຍ ແລະ ປອດໄພ.